BRX

1   Kutani kutiloko xitsrhungu ximukamanyalata, na xiyingela zritu dzra Xikwembu Nkulukumba, ayayima atlhelweni ka tiva dzra Genezareti,

2   kutani avona mabzatsrhu mabizri na matsrimbiwi atlhelweni ka tiva, kambe vaphasi va kone afa vahumi vayahlampsa minkukutu.

3   Lesvi anhingeniki ku dzrin’we dzra mabzatsrhu, dzra Simoni, amukombela lesvaku adzritsrhindzreta kulenyana ni sava. Loko atsrhamisile, asungula kudondzrisa svitsrhungu na ali bzatsrhwini.

4   Loko aheti kukanela, aku ku Simoni: “Weta uya lomu ka kuyeta, n’wiyapeta kone minkukutu yenu n’witaphasa.”

5   Kambe Simoni ahlamula, aku: “Mudondzrisi, hitikazrati vusiku hinkwabzu kambe ahiphasanga nchumu, kambe hi kuhlaya kwaku ndzritapeta minkukutu.”

6   Loko vayenci lesvo, vaphasi tinhlampfi ta kutala ngopfu svinene, lakakuva minkukutu yavu mihandzrukela.

7   Kutani vakwehleta vanakulobze lava afaka vali bzatsrhwini ledzrin’wana lesvaku vabuya vavapfuna. Kutani vabuya, vatata mabzatsrhu ha mabizri, lakakuva masungula ni kumbombomela.

8   Kutani loko avona lesvo, Simoni Petrosi awela amatsrolweni ya Yesu, aku: “Hosi, suka la ku mine, hikuva ndzri mhunu wa svidoho.”

9   Hikusa yene ni lava afaka vali naye afa vatali hi kuhlamala lokukulu hi mhaka ya tinhlampfi ta kutalisa xilesviya leti vatikumiki,

10   kutani svivi tanu na Yakobe na Yohani, vanga vana va Zebedewu, lava afaka vatizrisana na Simoni. Kambe Yesu aku ku Simoni: “Ungachave. Kusukela namunhla utaphasa vhanu.”

11   Kutani vatlhelisa mabzatsrhu asaveni, vatsrhika hinkwasvu, vamulandzra.

12   Kutiloko ali ku dzrin’we dzra madoropa, okuma lesvaku afa ku ni mun’we wanuna wa kutala hi nhlokonho! Loko avona Yesu, awela hansi hi mombo, amukombela, aku: “Hosi, loko usvijula, ungandzribasisa.”

13   Kutani Yesu analavuta voko, amukhumba, aku: “Ndzrasvijula! Basisiwa.” Kolahu nhlokonho yinyamalala ku yene.

14   Agama amuleleta akuva angabzeli mhunu, aku: “Kambe famba uyatikomba ku muprista, uyahumexa gandzrelo dzraku dzra kubasisiwa, hi la Moxe aleletiki ha kone, lesvaku bziva vumboni ku vone.”

15   Kambe ndhuma yakwe afa yoya yihangalaka, ni svitsrhungu lesvikulu afa svihlengeletana lesvaku svimuyingiseta ni kudahiwa mavabzi ya svone.

16   Kambe afa atolovela kuya mimbangwini ya mananga ayakhongota.

17   Siku dzrin’wana na ali kazri adondzrisa, afa kutsrhamisi vafarisi ni vadondzrisi va Nawu, na vapfa hi le svidoropaneni hinkwasvu sva Galileya ni sva Yudeya, ni le Yerusalema; kutani Yehovha amunyika ntamu wa kuhanyisa vhanu.

18   Kohumelela vavanuna lava afaka vazrwali mhunu wa kukhwanyala svizro hi likuku, vadzringisa kumunhingenisa lesvaku vatamubeka amahlweni ka Yesu.

19   Kutani, hi kuvona lesvaku avayikumi ndlela ya kumunhingenisa hi mhaka ya xitsrhungu, vakhwela ahenhla ka lwangu, vaphendla mathayela vamuxixa hi likuku amakazri ka lava afaka vali amahlweni ka Yesu.

20   Loko avona lipfumelo dzravu, aku: “Nandzruwe, svidoho svaku svidzrivaleliwile.”

21   Kutani vatsrali ni vafarisi vasungula kupimisa lesvi atimbilwini tavu: “I mani lweyi, lwavulavulaka svisandzru? I mani angadzrivalelaka loko ange Xikwembu Nkulukumba ntsena?”

22   Kambe Yesu, hi kuvona mimpimiso yavu, avayangula, aku: “N’wipimisa yini atimbilwini tenu?

23   Xana kunabzala ngopfu yini: Kuhlaya lesvaku ‘Svidoho svaku svidzrivaleliwile’, kumbe kuhlaya lesvaku ‘Sekeleka ufamba’ kee?

24   Kambe akuva n’witasvitiva lesvaku N’wana wa Mhunu a ni ntamu la misaveni wa kudzrivalela svidoho—”, aku ku mhunu lwewa kukhwanyala svizro: “Ndzrili ku wene: ‘Sekeleka utlakula likuku dzraku, utimukela.’”

25   Kutani kolahu asekeleka amahlweni kwavu atlakula likuku ledzri afaka ayetleli ku dzrone, amuka akaya kwakwe, na adzrumisa Xikwembu Nkulukumba.

26   Kutani hinkwavu vatala hi kuhlamala, vasungula kudzrumisa Xikwembu Nkulukumba, vatlhela vatala hi nchavu, vaku: “Hivoni minchumu ya kuhlamalisa namunhla!”

27   Kutani antsrhaku ka lesvi, ahuma, agama avona muhakelisi wa tinemba lwavitaniwaka Levhi na atsrhami andlwini ya kuhakelisa tinemba. Kutani aku ku yene: “Buya undzrilandzra.”

28   Ahangatsrhika hinkwasvu, asekeleka amulandzra.

29   Levhi agama amuhambela nkhuvu wa wukulu akaya kwakwe, kutani kukumeka xitsrhungu lexikulu xa vahakelisi va tinemba ni vambeni lava afaka vada navu.

30   Kutani vafarisi ni vatsrali vasungula kusola vadondzrisiwa vakwe, vaku: “N’widela yini n’witlhela n’winwa ni vahakelisi va tinemba ni vadohi?”

31   Kutani Yesu avayangula, aku: “Lavanga vatomi avajuli mudahi; ntsena lavavabzaka.

32   Andzritelanga kutavitana lavalulamiki, kambe ndzriteli kutavitana vadohi lesvaku vatisola.”

33   Kutani vaku ku yene: “Vadondzrisiwa va Yohani vatsrhama hi kutitsrona svakuda ni kuhamba svikhongoto; na vone vadondzrisiwa va vafarisi vayenca tanu, kambe lava ka kwaku vada vatlhela vanwa.”

34   Kutani Yesu aku ku vone: “Xana n’wingayenca vanghanu va muteki vatitsrona svakuda na muteki ehe navu kee? Ihina.

35   Kambe mata masiku lawa muteki atakahambanisiwa navu; laha ke, ina, vatatitsrona svakuda amasikwini lawo.”

36   Atlhela avahambela xifaniso, aku: “Aku na mhunu atsremaka xihlama ku xiyambalu xa ximpsha axizrungela ku xiyambalu xa kuguga. Hikusa loko oyenca lesvo, kutani xihlama leximpsha xitahandzruka nakone xihlama xa xiyambalu leximpsha xingatiyelana ni xiyambalu xa kuguga.

37   Nangweso, aku na mhunu lweyi achelaka vhinyo dzrimpsha ku minkwama ya kuguga. Hikusa loko oyenca lesvo, vhinyo ledzrimpsha dzritahandzrula minkwama, bzihalakela, nakone minkwama ya kone mitahoneka.

38   Kambe vhinyo ledzrimpsha dzrifanela kubekisiwa aminkwameni lemimpsha.

39   Nakone aku na mhunu ajulaka vhinyo ledzrimpsha antsrhaku ka kunwa ledzra khale, hikusa ali: ‘Kunandzrika ledzra khale.’”