-
Luka 2
1 Kutani amasikwini lawo, Khezari Aguxtu abeka nawu wa lesvaku vhanu hinkwavu amfun’wini wakwe vafanela kutsralisiwa.
2 (Kutsralisa loka kusungula kayenceki loko Kirinu afuma Sirya.)
3 Kutani vhanu hinkwavu vayatitsralisa, mun’wana ni mun’wana adoropeni dzrakwe.
4 Xilesvo, na yene Yosefa asuki Galileya, adoropeni dzra Nazareta, atlhantukela Yudeya, adoropeni dzra Davhida, ledzrivitaniwaka Bethlehema, hikusa afa ali wa muti ni ndangu wa Davhida.
5 Ayititsralisa na Mariya, lweyi afaka amubutile, lweyi afaka ali kusuhi ni kuphuluka.
6 Kutani na vehe kohala, kotlhangana masiku yakwe ya kuphuluka.
7 Kutani aphuluka n’wanakwe wa jaha, wa mativula, amufuneketela hi makapulana agama amulata ankumbzini, hikuva afa kunge na mbangu wa kuvayanela andlwini ya vayeni.
8 Nangweso, amugangeni wolowo mfuzri afa ku ni vabzisi lava afaka vatsrhama anhoveni vavonelela svifuyo svavu ni vusiku.
9 Kutani ntsrumi ya Yehovha yihumelela amahlweni kwavu, ni kuphatima ka Yehovha kuvaninga hinkwaku amatlhelweni kwavu. Kutani vachava ngopfu svinene.
10 Kambe ntsrumi yiku ku vone: “N’wingachaveni, hikusa, lavisani, ndzrin’wibuyela ni madzrungula lamanene lamatakayenca lesvaku vhanu hinkwavu vanyonxa ngopfu svinene.
11 Hikusa namunhla n’wiphulukeliwi muhuluxi adoropeni dzra Davhida, lweyi anga Kriste, Hosi.
12 Kutani lexi n’witakavona ha xone hi lexi: n’witakuma xibebetana na xifuneketeliwi hi makapulana xitlhela xilatiwa ankumbzini.”
13 Kutani kola ni kola kuhumelela xitsrhungu xa tintsrumi ta le tilweni kun’we ni ntsrumi leyo, na tidzrumisa Xikwembu Nkulukumba, tiku:
14 “Akuyisiwe lidzrumu ku Xikwembu Nkulukumba ahenhlahenhla; ni le misaveni akuve ni kuzrula amakazri ka vhanu lava avanyonxelaka!”
15 Kutani loko tintsrumi tisukile tivasiya, tiya tilweni, vabzisi vabzelani, vaku “Ahiyeneni, kunene, le Bethlehema, hiyavona mhaka leyiyencekiki, leyi Yehovha ahitivisiki yone.”
16 Kutani vafamba hi kuhangwesa, vayakuma Mariya na Yosefa, ni xibebetana na xilatiwi ankumbzini.
17 Kutani loko vasvivonile, vasungula kudzrungula mhaka leyi vangabzeliwa yone mayelanu ni xin’wanana lexo.
18 Kutani hinkwavu lava vasviyingeliki vahlamala hi lesvi vabzisi vadzrunguliki svone,
19 kambe Mariya afa abekisa mazritu lawo hinkwawu atlhela apimisa ha wone ambilwini yakwe.
20 Kutani vabzisi vamuka, na vatwalisa Xikwembu Nkulukumba vatlhela vamudzrumisa hi mhaka ya hinkwasvu lesvi vangasviyingela vatlhela vasvivona, hi la vangabzeliwa ha kone.
21 Loko n’wana apfali ntlhanu wa masiku na mazrazru, ya kuva asoka, achuliwi vito dzra Yesu, ledzri angachuliwa dzrone hi ntsrumi na angasiva kone akhuzrini dzra mamana wakwe.
22 Nangweso, loko vapfali masiku ya kuva vatibasisa hi kulandzra nawu wa Moxe, vamuyisi Yerusalema vayamuvonekisa amahlweni ka Yehovha,
23 hi la svitsraliwiki ha kone anawini wa Yehovha lesvaku: “Jaha dzrin’wana ni dzrin’wana dzra mativula dzrifanela kubekeliwa Yehovha hi tlhelo.”
24 Kutani vahumexa xitlhavelo hi kulandzra lesvitsraliwiki anawini wa Yehovha, lowuliki: “Matuva mabizri kumbe mavondlo mabizri ya svituvana.”
25 Kutani, lavisani, le Yerusalema afa ku ni wanuna mun’we lwavitaniwaka Simiyoni. Wanuna lweyo afa ali mhunu wa kululama ni lwachavaka Xikwembu Nkulukumba, lweyi afaka ayimela kuchaveleliwa ka Yisrayele, nakone moya lowa kuxwenga afa wuli henhla kwakwe.
26 Nangweso, afa apfuleteliwi ha Xikwembu Nkulukumba hi kutizrisa moya lowa kuxwenga lesvaku afa angativona lifu na angasivona Kriste wa Yehovha.
27 Kutani moya wumuyisa atempeleni. Kutiloko vapsele vabuyisa xin’wanana xavu, Yesu, akuva vaxiyenca hi kulandzra mukhuva wa Nawu,
28 axitamela hi mavoko, adzrumisa Xikwembu Nkulukumba, aku:
29 “Svosvi, Hosi, ulelela nandzra waku hi kuzrula hi la uhlayiki ha kone,
30 hikuva mahlo yanga mavoni kuhuluxa kwaku,
31 loku ukubekisiki amahlweni ka matiko hinkwawu,
32 kunga livaningo dzra kuvaningela vhanu va matiko, ni kuphatima ka tiko dzraku, Yisrayele.”
33 Kutani tatana ni mamana wa Yesu afa vahlamala hi lesvingahlayiwa ha yene.
34 Simiyoni agama avakatekisa, aku ku mamana wa kone, Mariya: “Lavisa, lweyi n’wana abekeliwi kuwisa ni kupfuxa vanyingi Yisrayele, ni kuva xikombiso lexitakakanetiwa,
35 akuva kuvoneka lesvi vhanu vanyingi vasvipimisaka atimbilwini tavu; na wene mamana wa kone, utatlhaviwa hika hi lipanga.”
36 Kutani afa ku ni muprofeta mun’we wa xisati, Ana, n’wana wa Fanuweli, wa lixaka dzra ka Axeri. Afa akuli ngopfu hi ntanga nakone afa ahanyi ni nuna wakwe ntlhanu wa malembe na mabizri kusukela loko vachatile,
37 kutani svosvi afa ali mufelwa lwanga ni ntlhanu na mazrazru wa makume ya malembe ni mune hi kuhanya. Afa angasuki atempeleni, nakone afa agandzrela Xikwembu Nkulukumba vusiku ni nhlikanhi hi kutitsrona svakuda ni kuhamba svikhongoto.
38 Kutani hi nkama wolowo anhingena asungula kukhensa Xikwembu Nkulukumba, akanela hi n’wana ni hinkwavu lava afaka vayimela kuhuluxiwa ka Yerusalema.
39 Kutiloko vahetile kuyenca hinkwasvu hi kulandzra Nawu wa Yehovha, vamuka Galileya, adoropeni dzravu dzra Nazareta.
40 Kutani xin’wanana xiya amahlweni xikula xitlhela xitiya, xitala hi vutlhazri, nakone afa xinyonxeliwa ha Xikwembu Nkulukumba.
41 Kutani lembe ni lembe, vapsele va Yesu afa vaya Yerusalema, ankhubzini wa Paxkwa.
42 Kutani loko ali ni khume dzra malembe na mabizri, vatlhantukela kone hi kulandzra mukhuva wa nkhuvu.
43 Kambe loko masiku ya nkhuvu mahelile, loko vaku vamuka, mufana lweyo, Yesu, osala Yerusalema na vapsele vakwe vangasvivoni.
44 Kambe, hi kupimisa lesvaku afa ali makazri ka lava afaka valongoloka navu, vafamba mpfhuka wa kuheta siku dzrin’we, vagama vasungula kumujuletela amakazri ka maxaka ni lava afaka vativana navu.
45 Kambe loko vangamukumi, vatlhelela Yerusalema vayamujuletela kone.
46 Kutani, antsrhaku ka masiku mazrazru vamukuma atempeleni, na etsrhama amakazri ka vadondzrisi avayingiseta na avahamba svivutiso.
47 Kutani hinkwavu lava afaka vamuyingiseta afa vahlamala hi kutlhazriha kwakwe ni tinhlamulo takwe.
48 Kutani loko vapsele vakwe vamuvona, vahlamala ngopfu; mamana wakwe aku ku yene: “N’wananga, uhiyenceli yini lesvi? Lavisa, mine ni tatana waku afa hifamba hikujuletela na mbilu hetamela hi voko.”
49 Kambe aku ku vone: “Afa n’windzrijulela yini? Afa n’wingasvitivi lesvaku ndzrifanela kutsrhama andlwini ya Tatana wanga?”
50 Kambe, avasvitwisisanga lesvaku afa ajula kuhlaya lesvaku yini.
51 Agama afulamela navu, amuka Nazareta, atama atibeka ahansi kwavu. Nangweso, mamana wakwe afa abekisa mazritu lawo hinkwawu ambilwini yakwe.
52 Kutani Yesu atama akula hi vutlhazri ni le mizrini, anyonxeliwa hi Xikwembu Nkulukumba ni hi vhanu.