BRX

1   Kutani asungula kukanela navu hi svifaniso, aku: “Mun’we wanuna adzrimi nsimu ya mavhinya, ayibiyela, akela xipfuvelo xa vhinyo, ayaka xihondzro, agama ayivolekisa ku vadzrimi, aya matikweni.

2   Loko kutlhasa nkama wa kone, azrumela mutizri ku vadzrimi lesvaku vayamukhayela min’we ya mihandzru ya nsimu ya mavhinya.

3   Kambe vamukhoma vamubukutela hi tinhonga, vamutlhelisa hi mavoko.

4   Atlhela avazrumelela mutizri mun’wana; na yene vamupandzra nhloko, vava vamuyenca sva tingana.

5   Azrumeliki mun’wana; na yene vamudlaya. Azrumela ni vambeni va kutala; vabukutela van’we va vone hi tinhonga, van’wana vavadlaya.

6   Afa asali ni mun’we, anga n’wanakwe lwamuzrandzraka. Agamisa ha yene kumuzruma aya ku vone, aku: ‘Lesvi anga n’wananga vatamubekela xichavu.’

7   Kambe vadzrimi lavo vabzelana lesvi: ‘Lweyi hi yene madapfindla. Buyani himudlaya, hitasala hida pfindla.’

8   Kutani vamukhoma vamudlaya, vagama vamucukumetela ahandle ka nsimu ya mavhinya.

9   Xana n’winyi wa nsimu ya mavhinya atayenca yini kee? Atabuya adlaya vadzrimi lavo, ateka nsimu ya mavhinya ayinyika vhanu vambeni.

10   Xana an’wingisama n’widondzra tsralwa ledzriliki: ‘Zribze ledzri vayaki vadzridzreliki hi dzrone dzringayenciwa zribze ledzra lisima dzra masungulu.

11   Lesvi svihuma ku Yehovha, nakone svahlamalisa amahlweni yezru’?”

12   Kutani afa vajula kumukhoma, kambe afa vachava xitsrhungu, hikusa afa vasvitiva lesvaku afa ahlaya vone hi xifaniso lexiyani. Kutani vamutsrhika, vasuka vafamba.

13   Kutani vazrumela van’we va vafarisi ni va ntlawa wa Heroda vaya ku yene akuva vamuphasa hi mazritu.

14   Loko vatlhasile, vaku ku yene: “Mudondzrisi, hasvitiva lesvaku wene ukanela xihlayelamfuzri nakone awuchavi mhunu, hikusa awulangusi wuso bza mhunu, kambe udondzrisa ndlela ya Xikwembu Nkulukumba hi kulandzra xihlayelamfuzri. Xana svapfumeleliwa kuhakela tinemba ku Khezari kumbe ihina?

15   Hihakela kumbe hingahakeli kee?” Loko avona vunyoka bzavu, aku ku vone: “N’windzridzringela yini? Ndzrinyiketani denari dzrin’we ndzridzrivona.”

16   Kutani vamunyiketa denari, aku ku vone: “I xifaniso xa mani lexi, ni vito ledzritsraliwiki laha i dzra mani?” Vaku ku yene: “I sva Khezari.”

17   Kutani Yesu aku: “Tlheliselani Khezari sva Khezari, ni sva Xikwembu Nkulukumba ku Xikwembu Nkulukumba.” Kutani vahlamala ha yene.

18   Agama abuyeliwa hi vasaduki, lavaliki aku na kupfuka ka vafi, vamuvutisa lesvi:

19   “Mudondzrisi, Moxe ahitsraleli lesvaku loko makwavu wa mhunu afa, asiya nsati na ange na n’wana, makwavu afanela kuchata ni wansati lweyo, abelekela makwavu vana.

20   Kavi ni ntlhanu wa vamakwavu na vabizri va xinuna. Lwewa kusungula ateki nsati, kambe afi na angasiyanga n’wana.

21   Kutani lwewa vubizri achata naye kambe afa na angasiyanga n’wana; sviva xitanu ni ku lwewa vuzrazru.

22   Kutani hinkwavu lava ntlhanu na vabizri avasiyanga n’wana. Hi vugamu, lwe wansati na yene afa.

23   Akupfukeni ka vafi, xana lwe wansati atava nsati wa mani? Hikusa lava ntlhanu na vabizri vachati naye.”

24   Yesu aku ku vone: “Ahi svosvi n’wihoxaka ha svone? Hikusa an’wimativi Matsralwa, nambi ntamu wa Xikwembu Nkulukumba!

25   Hikusa loko vafi vapfuka, avachati kumbe kuchatisiwa, kambe vafana ni tintsrumi ta le matilweni.

26   Kambe mayelanu ni vafi, lesvaku vapfuka, xana an’widondzranga abukwini dzra Moxe, amhakeni leyivulavulaka hi nkun’hu, lesvi Xikwembu Nkulukumba angakanelisa xisvone na yene, aku: ‘Hi mine Xikwembu Nkulukumba wa Abrahamu, ni Xikwembu Nkulukumba wa Izaki, ni Xikwembu Nkulukumba wa Yakobe’?

27   Ahi Xikwembu Nkulukumba wa vafi, kambe i wa lavahanyaka. N’wihoxi ngopfu.”

28   Kutani kutsrhindzrekela mun’we wa vatsrali lweyi angavayingela na vadokadokisana naye, lweyi afaka asvitiva lesvaku Yesu avahlamuli ha hombe, amuvutisa lesvi: “Hi wini nawu wa kusungula ku hinkwayu?”

29   Yesu ahlamula, aku: “Lowa kusungula hi lowuliki: ‘Yingela, Yisrayele: Yehovha, Xikwembu Nkulukumba wezru, i Yehovha mun’we ntsena.

30   Kutani zrandzra Yehovha, Xikwembu Nkulukumba waku, hi mbilu yaku hinkwayu, ni hi hika dzraku hinkwadzru, ni hi miyanakanyu yaku hinkwayu, ni hi ntamu waku hinkwawu.’

31   Lowa vubizri wuli: ‘Zrandzra walekwenu xilesvi utizrandzrisaka xisvone.’ Aku na nawu wumbeni wa wukulu kutlula leyi.”

32   Lwewa mutsrali aku ku yene: “Mudondzrisi, lesvi usvihlayiki hi svone; svilongoloka ni xihlayelamfuzri lesvaku ‘i mun’we ntsena, nakone handle kwakwe aku na mumbeni’;

33   nakone kumuzrandzra hi mbilu hinkwayu, ni mimpimiso hinkwayu, ni ntamu hinkwawu, ni kuzrandzra walekwenu xilesvi utizrandzrisaka xisvone hi svone svinga sva lisima ngopfu kutlula magandzrelo hinkwawu ya kuhisiwa ni svitlhavelo.”

34   Kutani Yesu, hi kuvona lesvaku ahlamuli hi vutlhazri, aku ku yene: “Awu kule ni Mfumu wa Xikwembu Nkulukumba.” Kambe akahavanga na mun’wana angasingita amuvutisa xanchumu.

35   Kambe Yesu ayangula, ahlaya lesvi loko adondzrisa atempeleni: “Xana vatsrali vahlayisa kuyini vaku Kriste i n’wana Davhida?

36   Hi moya lowa kuxwenga, Davhida hi ntshima ati: ‘Yehovha ati ku Hosi yanga: “Tsrhamisa avokweni dzranga dzra xinene ndzriko ndzribeka valala vaku ahansi ka minkondzro yaku.”’

37   Davhida hi ntshima amuvitana Hosi. Kutani svikotekisa kuyini lesvaku ava n’wanakwe?” Kutani afa ku ni xitsrhungu lexikulu lexi afaka xinyonxa hi kumuyingiseta.

38   Kutani akudondzriseni kwakwe afa ahlaya lesvi: “Tivonelani ku vatsrali lavazrandzraka kufambafamba na vayambali sviyambalu sva vhanu va xiyimu xa le henhla ni kuloseliwa lomu mabazara,

39   ni svitsrhamu sva kusungula lomu masinagogeni, ni mimbangu leyi kutsrhamaka vamanyana lomu kudiwaka kone;

40   vahetaka miti ya vafelwa hi kumidela sva yone, na vatiyimelela hi svikhongoto sva kuleha. Vatayavanyisiwa hi xikhatiso lexikulu kutlula vambeni.”

41   Agama atsrhama ka kulavisana ni lomu kucheliwaka kone nhlengo; avona vhanu vanyingi na vapetetela mali ku svibokisana sva nhlengo, ni vhanu vanyingi lavanga svipfundzri na vapetetela timali tinyingi.

42   Kutani kubuya mun’we wa mufelwa wa xisiwana apeta minkinyenta mibizri.

43   Kutani avitana vadondzrisiwa vakwe, aku ku vone: “Ndzrihlayela mfuzri ndzrili ku n’wine: Mufelwa lweyi wa xisiwana apeti mali ya kutlula lavaya hinkwavu lavapetiki mali ku svibokisana sva nhlengo.

44   Hikusa hinkwavu vapambuli ku lesvingavatalela vapeta svone, kambe lwe wansati, avusiwaneni bzakwe, anyikeli hinkwasvu lesvi afaka ali nasvu; hinkwasvu sva kuhanya ha svone.”