-
Marku 4
1 Atlhela asungula kudondzrisa atlhelweni ka lwandle, kutani kuhlengeletana xitsrhungu lexikulu svinene kusuhi na yene. Kutani anhingena bzatsrhwini atsrhamisa hi le lwandle, kambe vhanu hinkwavu afa vali saveni kusuhi ni lwandle.
2 Kutani asungula kuvadondzrisa minchumu ya kutala hi svifaniso. Kutani loko avadondzrisa, afa aku ku vone:
3 “Yingisetani. Lavisani! Kuhumi mubzali aya kubzaleni.
4 Kutani ankama lowu abzalaka, timbewu tin’we tiwela atlhelweni ka ndlela, tinyanyana tibuya titida.
5 Timbeni tiwela amimbangwini ya mazribze, lomu afaka kunge na misava minyingi, kutani titekela kumila hikusa misava afa mingayetanga.
6 Kambe loko dambu dzrihuma, tipsha titlhela tibuna, hikusa afa tinge na mitsru.
7 Timbewu tin’wana tiwela makazri ka mitwa, kutani kubuya mitwa mititlimba; kutani tingapsali mihandzru.
8 Kambe timbenyana tiwela amisaveni leminene, kutani tikula tiva tiyandzra, tisungula kupsala mihandzru, lomu afaka tipsala makume mazrazru, ntlhanu wa makume na dzrin’we, ni dzana.”
9 Kutani ayengetela, aku: “Lweyi anga ni tindleve ta kuyingiseta aayingisete.”
10 Kutani loko ali vusvakwe, lava afaka vali matlhelweni yakwe kun’we ni lava khume na vabizri vasungula kumuvutisa mayelanu ni svifaniso.
11 Aku ku vone: “Xihundla xa Mfumu wa Xikwembu Nkulukumba xinyikiwi n’wine, kambe ku lavanga handle hinkwasvu sviyenciwa hi svifaniso,
12 kuyencela lesvaku nambi valavisa, vakota kulavisa ntsena kambe vangavoni; nambi vayingela, vakota kuyingela ntsena kambe vangatwisisi nchumu; akuva vangachuki vandzruluka, vadzrivaleliwa.”
13 Atlhela aku ku vone: “Xana an’wixitwisisi xifaniso lexi? Kutani n’witasvitwisisa xikuyini svifaniso hinkwasvu kee?
14 “Mubzali abzala zritu.
15 Kutani timbewu letinga matlhelweni ka ndlela, lomu zritu dzribzaliwaka kone, hi lava va kuva neti vadzriyingela, Sathana abuya hi kuhangwesa awutla zritu ledzribzaliwiki ku vone.
16 Hi ndlela leyifanaka, timbewu letibzaliwiki amimbangwini ya mazribze hi lavayingelaka zritu, vadzriyamukela hi kutsrhava.
17 Kambe ava na mitsru andzreni kwavu; votsrhama nkamanyana ntsena. Kutani neti kusungula nhlomulo kumbe nxanisa hi mhaka ya zritu, vohangwesa vawa.
18 Kutani timbewu letibzaliwiki amakazri ka mitwa hi lavayingeliki zritu,
19 kambe kunhingena kukazrateka hi sva misava leyi ni kukanganyisiwa hi timali, kun’we ni kunavela ka minchumu hinkwayu lemin’wana, svitlimba zritu, kutani dzringabeki mihandzru.
20 Kasi timbewu letibzaliwiki amisaveni leminene hi lavayingelaka zritu, vadzrinyonxela vatlhela vabeka mihandzru—makume mazrazru, ntlhanu wa makume na dzrin’we, ni dzana.”
21 Atlhela aku ku vone: “Ahi svone lesvaku motsre avawuteki vawubeka hansi ka xihundzru kumbe hansi ka vunanu kee? Ahi svone lesvaku vawuteka vawubeka ku xa kutlhoma motsre?
22 Hikusa aku na nchumu lowufihliwiki lowutakakala wungapaluxiwi; aku na nchumu lowutumbetiwiki ha hombe lowungatikihuma alivaleni.
23 Loko mhunu a ni tindleve ta kuyingela, aayingele!”
24 Atlhela aku ku vone: “Zreyani ndleve ku lesvi n’wisviyingelaka. Hi mpimu lowu n’wipimaka ha wone, n’witapimeliwa ha wone; mfuzri n’witayengeteleliwa wone.
25 Hikusa lweyi anga nasvu atanyikiwa svin’wana, kambe lweyi angeke na nchumu, nambi lesvi anga nasvu atatekeliwa svone.”
26 Atlhela aku: “Mfumu wa Xikwembu Nkulukumba wutsrhamisi xilesvi: Wufana ni loko mhunu axuvela timbewu amisaveni.
27 Agama ayetlela ni vusiku, apfuka ni mixo, svibewu svizrumbuka sviva svikula, kambe angasvitivi lesvaku sviyencekisa kuyini.
28 Misava mibeka mihandzru wusvayone; kusungula xikhava, kulandzrela xichocho, kuyela tizriku dzra kuwupfa axichochweni.
29 Kambe neti mihandzru miwupfa, anhingenisa sikela, hikusa kutlhasi nkama wa ntsrhovelo.”
30 Atlhela aku: “Xana hingawufanisa na yini Mfumu wa Xikwembu Nkulukumba, kumbe hingawutlhamuxela hi xifaniso xini?
31 Wufana ni nhleke ya sinapi, leyi loko yibzaliwa amisaveni yinga leyitsrongo svinene ku timbewu hinkwatu letinga kone amisaveni.
32 Kambe loko yibzaliwile, yikula yiva yitlula svibewu hinkwasvu lesvin’wana, yipsala tinkambu letikulu, lakakuva tinyanyana ta tilo tikota ni kuyaka svisaka ahansi ka ntsrhuti wa kone.”
33 Avabzela zritu hi svifaniso svinyingi sva muxaka lowo, hi laha afaka vakota kuyingela ha kone.
34 Nakone afa angavulavuli navu na angatizrisi xifaniso, kambe afa atlhamuxela vadondzrisiwa vakwe minchumu hinkwayu hi tlhelo.
35 Kutani hi siku ledzro, loko dambu dzripelile, aku ku vone: “Ahitsremakanyeni hiya ku tlhelo ledzrin’wana.”
36 Vatiki vaheta kulelela xitsrhungu, vamuteka loko ali bzatsrhwini; nakone afa ku ni mabzatsrhu man’wana naye.
37 Kutani kusungula xidzedze lexikulu svinene, kutani mavimbi mabetetela bzatsrhu, lakakuva dzrisungula kutala hi mati.
38 Kambe Yesu afa ali nyalwini ya bzatsrhu, na akhutsriyelile axidan’wini. Lesvi vamupfuxiki, vaku ku yene: “Mudondzrisi, awu na mhaka ni lesvi hokombomba?”
39 Kutani apfuka akhwavela moya, aku ku lwandle: “Miyela ukuwhii!” Kutani moya wuzrula, kukuzwee.
40 Kutani aku ku vone: “Hayini n‘wichavisa xilesvi? Xana an’wisiva na lipfumelo?”
41 Kambe vachava hi kuchava lokukulu, vava vavutisana, vaku: “Kasi i mani lweyi, wa kuva nambi moya ni lwandle svamuyingiseta?”