-
Marku 2
1 Kambe, antsrhaku ka masiku mange mangani, atlheli anhingena le Kapernawume; ndzrava ya lesvaku ale kaya yihangalaka.
2 Kutani kutlhangana vhanu va vanyingi lakakuva kungahavi na mbangu, nambi he tlhelweni ka nyangwa; kutani asungula kuvabzela zritu.
3 Kutani vamubuyisela mhunu wa kuwonyana svizro na azrwaliwi hi mune wa vavanuna.
4 Kambe, loko vahluleki kumutsrhindzretela ku Yesu hi mhaka ya xitsrhungu, vagwavuli lwangu ahenhla ka Yesu; kutiloko vapfuli mbhovo, vaxixa xinkukwana lexi mhunu lwawonyaniki svizro afaka ayetleli ku xone.
5 Kutani loko Yesu avona lipfumelo dzravu, aku ku lweyi wa kuwonyana svizro: “N’wananga, svidoho svaku svidzrivaleliwile.”
6 Kutani afa ku ni van’we va vatsrali lava afaka vatsrhamile, lava afaka vapimisa lesvi atimbilwini tavu:
7 “Hayini mhunu lweyi akanelisa xilesvi? Awasandzra. Hi mani lwadzrivalelaka loko kunge mun’we ntsena, anga Xikwembu Nkulukumba?”
8 Kambe hi kuhangwesa Yesu atwisisa hi moya wakwe lesvaku afa vapimisa hi ndlela leyo amakazri kwavu, kutani aku ku vone: “Hayini n’wiyanakanya minchumu leyo atimbilwini tenu?
9 Hi svini svinabzalaka: Kubzela lwe wa kuwonyana svizro lesvaku: ‘Svidoho svaku svidzrivaleliwile’, kumbe kuhlaya lesvaku: ‘Pfuka utlakula xinkukwana xaku, ufamba‘?
10 Kambe akuva n’witasvitiva lesvaku N’wana wa mhunu a ni ntamu wa kudzrivalela svidoho amisaveni, (aku ku lwe wa kuwonyana svizro):
11 “Ndzrili ku wene: Pfuka utlakula xinkukwana xaku, utimukela akaya kwaku.”
12 Kutani asekeleka atekela kutlakula xinkukwana xakwe, ahuma amahlweni ka hinkwavu. Kutani hinkwavu vahlamala, vadzrumisa Xikwembu Nkulukumba, vaku: “Sva kufana ni lesvi, ahingisama hisvivona.”
13 Atlhela ahuma aya ankingeni wa lwandle, kutani xitsrhungu hinkwaxu xibuyetela ku yene; kutani asungula kuxidondzrisa.
14 Atiki awahundzra, avona Levhi, n’wana Alfewu na etsrhama andlwini ya tinemba; kutani aku ku yene: “Ndzrilandzre.” Kolahu asekeleka amulandzra.
15 Kutani ankama lowu Yesu afaka atsrhami ada andlwini ya Levhi, vahakelisi vanyingi va tinemba ni vadohi afa vada na yene ni vadondzrisiwa vakwe, hikuva afa vali vanyingi nakone afa vamulandzra.
16 Kambe loko vatsrali va vafarisi vavona lesvaku ada ni vadohi ni vahakelisi va tinemba, vasungula kuyangula vadondzrisiwa vakwe, vaku: “Kasi awada ni vahakelisi va tinemba ni vadohi?”
17 Loko asviyingela, Yesu aku ku vone: “Lavatiyiki avavileli mudahi, kambe ntsena lavavabzaka. Andzritelanga kutavitana lavalulamiki, kambe vadohi.”
18 Vadondzrisiwa va Yohani ni vafarisi afa vatitsrona svakuda. Kutani vamubuyela, vaku: “Hayini vadondzrisiwa va Yohani ni vadondzrisiwa va vafarisi vatitsrona svakuda, kambe vadondzrisiwa vaku vangatitsroni svakuda?”
19 Kutani Yesu aku ku vone: “Ahi svone lesvaku loko muteki ehe navu, vanghanu va muteki ava na kutitsrona svakuda? Loko muteki ehe navu, ava na kutitsrona svakuda.
20 Kambe masiku mata lawa ha wone muteki atakasusiwa ku vone, kutani laha ke vatatitsrona hi siku ledzro.
21 Anga kone lweyi azrungelaka xihlama hi panu yimpsha ku mujansi wa khale. Loko oxizrungela, panu leyimpsha yitakoka leya khale, kutani kuhandzruka ka kone kutlulisa mpimu.
22 Nangweso, anga kone lweyi achelaka vhinyo dzrimpsha ku minkwama ya khale. Loko odzrichela, vhinyo dzritahandzrula minkwama, kuhalaka vhinyo kutlhela kuhoneka ni minkwama ya kone. Kambe vhinyo dzrimpsha dzricheliwa ku minkwama mimpsha.”
23 Kutiloko ahundzra hi le masin’wini ya tizriku hi Savata, vadondzrisiwa vakwe vakhaya mimoko ya tizriku na vafamba hi ndlela.
24 Kutani vafarisi vaku ku yene: “Hingavona! Vayencela yini lesvikaka svingapfumeleliwi hi Savata?”
25 Kambe yene aku ku vone: “An’wingisama n’widondzra lesvi Davhida asviyenciki ankama lowu angasindzriseka ni loko atwa ndlala, yene ni vavanuna lava afaka vali naye,
26 lesvi anganhingenisa xisvone andlwini ya Xikwembu Nkulukumba amasikwini ya muprista lwenkulu Abiyatari, ada makati ya magandzrelo, lawa svikaka svingapfumeleliwi kuva mhunu ada, handle ka vaprista, ni lesvi angatlhela anyika ni vavanuna lava afaka vali naye?”
27 Kutani aku ku vone: “Savata dzrivi kone hi mhaka ya mhunu; ahi mhunu lweyi ayenceliwiki Savata.
28 Kambe, nambi hi Savata, N’wana wa mhunu i Hosi ya dzrone.”