-
Matewu 24
1 Kutiloko Yesu asuka atempeleni, vadondzrisiwa vakwe vatsrhindzrekela ku yene akuva vamukomba mayakiwela ya temple.
2 Avahlamula, aku: “An’wisvivoni hinkwasvu lesvi? Ndzrihlayela mfuzri ndzrili ku n’wine: Kungatisala nambi zribze ahenhla ka zribze laha dzra kuva dzringagilhitiwanga.”
3 Kutani ankama lowu afaka atsrhamisi Nhaveni ya Minhlwazri, vadondzrisiwa vamutsrhindzrekelela hi tlhelo, vaku: “Hibzele, xana lesvo svitayenceka siku muni, nakone xitava xini xikombiso xa kuhumelela kwaku ni xa kuhela ka misava?”
4 Kutani Yesu avahlamula, aku: “Tivonelani akuva kungavi na mhunu lwamikanganyisaka,
5 hikusa vanyingi vatata hi vito dzranga, na vaku: ‘Hi mine Kriste’, kutani vatakanganyisa vanyingi.
6 N’witayingela sva tiyimpi ni madzrungula ya tiyimpi. Tivonelani akuva n’wingatichavisiwa, hikusa svajuleka kuva lesvo sviyenceka, kambe abzisiva vugamu.
7 “Hikuva tiko dzrin’we dzritalwa ni tiko dzrin’wana ni mfumu wun’we wutalwa ni mfumu wun’wana, nakone kutava ni tindlala ni svimbeta amimbangwini ya kusiyanasiyana.
8 Hinkwasvu lesvi i kusungula ka svikazratu lesvikulu.
9 “Kutani vhanu vatan’winyikela akuva n’wixanisiwa vava van’widlaya, nakone n’witavengiwa hi matiko hinkwawu hi nkonta ya vito dzranga.
10 Nakone ankameni wolowo vanyingi vataphasiwa vawa, vadlayisana, vava vavengana.
11 Kutatumbuluka vaprofeta vanyingi va madzrimi nakone vatakanganyisa vanyingi;
12 nakone hi mhaka ya kuyandzra ka vubihi, lizrandzru dzra lavanyingi dzritahola.
13 Kambe lweyi atakava na atiyiseli kuyatlhasa avugan’wini atahuluka.
14 Nakone madzrungula lawa lamanene ya Mfumu matazrezriwa amisaveni hinkwayu akuva bziva vumboni ku matiko hinkwawu, kutani hi kone kutakatlhasa vugamu.
15 “Xilesvo, loko n’wivona nchumu lowunyenyentsaka wa kuhonetela, lowuhlayiwiki hi muprofeta Daniyele, na wuyimi ambangwini lowa kuxwenga, (lweyi adondzraka aatwisise),
16 ankameni lowo, lavanga Yudeya avatsrutsrumele atinhaveni;
17 kutani lwanga henhla ka yindlu angaxikele kuhumexa lesvinga ndlwini yakwe,
18 ni lwanga masin’wini angahabuye akaya atatateka mpahla yakwe.
19 Nangweso, yowee, vavasati lavanga ni tinyimba ni lavayan’wisaka amasikwini wolawo!
20 Mfuzri khongotani lesvaku nkama wenu wa kutsrutsruma ha wone wungavi hi vuxika kumbe hi siku dzra Savata;
21 hikuva ankameni lowo kutava ni nhlomulo lowukulu, lowu kungasamikiki kuhumelela wa kufana na wone kusukela akutumbuluxiweni ka misava kutatlhasa svosvi, ni lowu kungatikitlhela kuhumelela wa kufana na wone.
22 Nangweso, loko masiku wolawo afa mangapumbiwanga, inha kungatihuluka mhunu; kambe hi nkonta ya vahlawuliwa masiku wolawo matapumbiwa.
23 “Kutani loko mhunu wa kukazri aku ku n’wine: ‘Lavisani! Hi lweyi Kriste’, kumbe: ‘Hi lwiya lee’, n’wingapfumeleni.
24 Hikusa kutatumbuluka VaKriste va madzrimi ni vaprofeta va madzrimi, kutani vatahamba mahlolana lamakulu ni svihlamaliso akuva, loko svikoteka, vatakanganyisa nambi vahlawuliwa.
25 Lavisani! Ndzrin’wibzeli na wehe nkama.
26 Xilesvo, loko vaku ku n’wine: ‘Lavisani! Ale huleni’, n’wingahumeni; kumbe vaku: ‘Lavisani! Ale ndlwini ya kufihleka’, n’wingapfumeleni.
27 Hikusa svanga hesvi lihati dzrihumaka avuxeni dzrivaninga kuyatlhasa mpeladambu, na ko kuhumelela ka N’wana wa Mhunu kutava xitanu.
28 Kwini na kwini lomu kunga ni mintsrumbu, magama matatlhangana kolahu.
29 “Kutani antsrhakunyana ka nhlomulo wa masiku wolawo, dambu dzritayenca ntima, nakone ni hweti yingativaninga, ni tinyeleti titawa hi le tilweni, nakone mintamu ya matilo mitatsrekatsrekisiwa.
30 Kutani xikombiso xa N’wana wa Mhunu xitavoneka atilweni, nakone ankameni wolowo tinxaka hinkwatu ta misava titatibetetela svifuva hi kudzrila, mfuzri titavona N’wana wa Mhunu na abuya hi matlavi ya tilo na a ni ntamu ni kuphatima lokukulu.
31 Kutani atazrumela tintsrumi takwe tihuma hi kupfuma lokukulu ka xipalapala; kutani titahlengeleta vahlawuliwa vakwe ku mune wa matlhelo ya misava, kusukela avugan’wini bzin’we bza matilo kuyatlhasa avugan’wini lebzin’wana bza wone.
32 Kutani dondzrani hi xifaniso lexi xa nkuwa: Loko mazravi ya wone masungula kunyuketa mahluka ni makamba, n’wasvitiva lesvaku malanga ma kusuhi.
33 Hi ndlela leyifanaka, na n’wine, loko n’wivona lesvi hinkwasvu, svitivani lesvaku N’wana wa Mhunu ale kusuhi, atinyangweni.
34 Ndzrihlayela mfuzri ndzrili ku n’wine: Vhanu va nkama lowu vangatinyamalala na lesvo hinkwasvu svingasiyenceka.
35 Tilo ni misava svitanyamalala, kambe mazritu yanga mangaka manganyamalali.
36 “Kambe mayelanu ni siku ledzro ni nkama wa kone, anga kone asvitivaka, nambi tintsrumi ta matilo nambi N’wana, kambe svitibziwa ntsena hi Tatana.
37 Hikuva svanga hesvi afaka mali xisvone masiku ya Nowa, ni ko kuhumelela ka N’wana wa Mhunu kutava xitanu.
38 Hikuva svanga hesvi afaka vali xisvone amasikwini wolawo na kungasitlhasa Ntita, lesvi afaka vada, vanwa, vachata vatlhela vachatisa, kuyatlhasa asikwini ledzri Nowa anhingeniki angalaweni ha dzrone,
39 vava vangavoni nchumu kuko kutlhasa Ntita yivakukula hinkwavu, na ko kuhumelela ka N’wana wa Mhunu kutava xitanu.
40 Ankameni lowo vavanuna vabizri vatava masin’wini; mun’we atatekiwa kutani lwemun’wana atsrhikiwa.
41 Vavasati vabizri vatava na vagaya axigaywini; mun’we atatekiwa kutani lwemun’wana atsrhikiwa.
43 “Kambe twisisani lesvi: Loko n’winyi wa muti afa esvitiva lesvaku muyivi atata nkama muni, anha atsrhami na alavelela, angatsrhiki yindlu yakwe yitlhanyiwa.
42 Xilesvo, tsrhamani na n’wilavelela, hikusa an’widzritivi siku ledzri Hosi yenu yitakabuya ha dzrone.
44 Hi mhaka leyi, na n’wine tsrhamani na n’witibekiselile, hikusa N’wana wa Mhunu ata hi nkama lowu n’wikaka n’wingawupimiseli.
45 “Xilesvo hi mani nandzra lwewa kudumbeka ni lwewa kutlhazriha, lweyi n’winyi wakwe amubekiki akuva alavisela vatizri va ndangu wakwe, akuva avanyika svakuda svavu hi nkama lowunene?
46 A ni njombo nandzra lweyo, lweyi loko n’winyi wakwe atlhasa, atakamukuma na ayenca tanu!
47 Ndzrihlayela mfuzri ndzrili ku n’wine: Atamubeka akuva alavisela minchumu yakwe hinkwayu.
48 “Kambe loko nandzra lweyo wa kubiha ochuka apimisa lesvi ambilwini yakwe: ‘N’winyi wanga awahlwela’,
49 kutani asungula kuba malandzrakulobze ni kuda ni kunwa ni timpopsi,
50 n’winyi wa nandzra lweyo atabuya hi siku ledzri akaka angadzriyimelanga ni hi nkama lowu angawutivikiki,
51 kutani atamukhatisa ngopfu svinene ava amubeka ambangwini wun’we ni vakanganyisi. Hi laha atakadzrila atlhela aketsrela menyo kone.