-
Matewu 18
1 Ankameni lowo, vadondzrisiwa vatsrhindzrekela ku Yesu, vaku: “Kutani ke, hi mani lwenkulu kutlula hinkwavu amfun’wini wa matilo?”
2 Kutani avitana xin’wanana xita ku yene, axiyimisa amakazri kwavu,
3 aku: “Ndzrihlayela mfuzri ndzrili ku n’wine: Loko n’wingandzruluki n’wifana ni svivanana, n’wingaka n’winganhingeni amfun’wini wa matilo ni kutsrongo.
4 Xilesvo, lweyi atitsrongahataka kufana ni xin’wanana lexi hi lweyi anga lwenkulu kutlula hinkwavu amfun’wini wa matilo;
5 nakone lweyi ayamukelaka xin’wanana xin’we xa kufana ni xoxi hi vito dzranga na mine awandzriyamukela.
6 Kambe lweyi awisaka xin’we xa svivanana lesvi lesvipfumelaka ku mine, afa svitamuyampsela loko ankolweni wakwe angotsrimbiwa zribze dzra kugaya ledzrikokiwaka hi mbongolo, anyuvetiwa alwandle amatini ya kuyeta.
7 “Yowee, misava, hi mhaka ya svikhunguvanyiso! Hikuva svikhunguvanyiso svitata, kambe khombo dzra mhunu lweyi xikhunguvanyiso xitaka ha yene!
8 Kutani, loko voko dzraku kumbe nkondzro waku wukudohisa, wutsreme uwucukumeta kule na wene. Sviyampsa ngopfu kuva unhingena avuton’wini na ukiyela xizro kumbe ukhuta kutlula kuva ucukumeteliwa andzrilweni lowungahelikiki na u ni mavoko mabizri kumbe minkondzro mibizri.
9 Nakone loko tihlo dzraku dzrikudohisa, dzritlwavule udzricukumeta kule na wene. Svayampsa kuva unhingena avuton’wini na u ni tihlo dzrin’we kutlula kuva ucukumeteliwa Xikheleni xa Kusuvisiwa hi ndzrilo na u ni mahlo mabizri.
10 Tivonelani akuva n’wingadzreli ni mun’we wa lavatsrongo, hikusa ndzrin’wibzela lesvaku tintsrumi tavu atilweni nkama hinkwawu tilavisa liso dzra Tatana wanga lwanga tilweni.
12 “N’wisvivonisa kuyini? Loko mhunu ova ni tihamba ta dzana kutani kulahleka yin’we ya tone, xana angatitsrhika leta ntlhanu ni mune wa makume na ntlhanu na mune atinhaveni, afamba ajuletela leya yin’we leyilahlekiki?
13 Kutani loko ayikuma, ndzrin’wibzela xihlayelamfuzri ndzriku atanyonxa ngopfu ha yone kutlula lesvi anyonxisaka xisvone hi leta ntlhanu ni mune wa makume na ntlhanu na mune ta kuka tingalahlekanga.
14 Hi kufana, Tatana wanga lwanga matilweni angasvinaveli kuva kusuva ni mun’we wa lavatsrongo.
15 “Nangweso, loko makwenu ayenca xidoho, famba uyamukomba nandzru wakwe na n’wili n’wine vabizri ntsena. Loko akuyingiseta, umuhuluxile makwenu.
16 Kambe loko angayingiseti, tlhela ufamba ni mun’we kumbe vabizri, akuva mhaka yitatiyisiwa hi vumboni bza timboni tibizri kumbe tizrazru.
17 Loko angavayingiseti, bzela bandla. Loko ni bandla angadzriyingiseti, ku wene aafane ni mhunu wa matiko ni muhakelisi wa tinemba.
18 “Ndzrihlayela mfuzri ndzrili ku n’wine: Hinkwasvu n’witokosvitsrimba amisaveni svitava na kutani svitsrimbiwile atilweni, nakone hinkwasvu n’wisvitsrhunxaka amisaveni svitava na kutani svitsrhunxiwile atilweni.
19 Ndzritlhela ndzrihlayela mfuzri ndzriku ku n’wine: Loko vabizri ku n’wine amisaveni vatwanana hi nchumu wini na wini lowu vafanelaka kuwukombela, vatayenceliwa wone hi Tatana wanga lwanga matilweni.
20 Hikusa laha kunga na vabizri kumbe vazrazru vatlhanganiki hi vito dzranga, na mine ndzri kone amakazri kwavu.”
21 Kutani Petrosi ata aku ku yene: “Hosi, xana makwezru atandzridohela kangani mine ndzrimudzrivalela? Kuyatlhasa ku ntlhanu na kabizri kee?”
22 Yesu aku ku yene: “Ndzri li ku wene: Kungave kuyatlhasa ku ntlhanu na kabizri, kambe ku ntlhanu wa makume na makume mabidzri na ntlhanu na kabizri.
23 “Hi yo mhaka yoleyo Mfumu wa matilo wungafanisiwaka ni hosi leyi afaka yijula kuhakelisa svikweneti malandzra ya yone.
24 Loko yisungula kukambela tinkonta, kubuyisiwa nandzra mun’we amahlweni ka yone lweyi afaka a ni xikweneti xa dzana dzra madzana ya matalenta akuva ayihakela.
25 Kambe, lesvi afaka ange na ndlela ya kuhakela, n’winyi wakwe aleleta lesvaku kuxavisiwa yene ni nsati wakwe, ni vana vakwe, ni hinkwasvu lesvi afaka ali nasvu, akuva kuhakeliwa xikweneti.
26 Kutani nandzra amukhinsamela, aku: ‘Ndzrilehisele mbilu; ndzritakuhakela hinkwasvu.’
27 Hi kumutwela vuzrombe, n’winyi wakwe amutsrhika afamba, amudzrivalela xikweneti.
28 Kambe loko nandzra lweyo ahuma, atlhangana ni mun’we wa nandzrakulobze, lweyi afaka amuceneki dzana dzra madenari, kutani amukhoma, amutlimba nkolo, aku: ‘Hakela xikweneti xaku.’
29 Kutani nandzrakulobze akhinsama amahlweni kwakwe amukombela, aku: ‘Ndzrilehisele mbilu; ndzritakuhakela.’
30 Kambe angapfumelanga; amatsrhan’wini ya lesvo esuka ayamunhingenisa abohelweni akondzra ahakela xikweneti.
31 Loko malandzrakulobze mavona lesviyencekiki, mavaviseka ngopfu svinene, kutani masuka mayabzela n’winyi wa wone hinkwasvu lesviyencekiki.
32 Kutani n’winyi wa nandzra lweyo amuvitana, aku ku yene: ‘Wene, nandzra wa kubiha! Ndzrikudzrivaleli xikweneti xaku hinkwaxu ankama lowu ungandzrikombela.
33 Xana na wene afa ungafanelanga kutsretsrelela nandzrakuloni kufana na mine ndzringakutsretsrelela?’
34 Kolahu, n’winyi wa nandzra lweyo ahlundzruka ngopfu, amunhingenisa abohelweni akondzra ahakela xikweneti xakwe hinkwaxu.
35 Na yene Tatana wanga wa le tilweni atayencisa xisvosvo ku n’wine loko n’wingadzrivalelani svanga vamakwavu na makwavu na svisukela ambilwini.”