-
Matewu 15
1 Kutani vafarisi ni vatsrali vasuka Yerusalema vayela Yesu, vaku:
2 “Hayini vadondzrisiwa vaku vatlula mukhuva wa va khale? Hikuva, avahlambi mavoko loko vajula kuda svakuda.”
3 Kutani avahlamula, aku: “Na n’wine hayini n’witlula xileleto xa Xikwembu Nkulukumba hi mhaka ya mukhuva wenu?
4 Hikuva, Xikwembu Nkulukumba ati: ‘Kombisa xichavu ku tatana waku ni mamana waku’, nakone ‘lweyi azruketelaka tatana wakwe kumbe mamana wakwe aadlawe’.
5 Kambe n’wine n’wili loko mhunu aku ku tatana kumbe mamana wakwe: ‘Hinkwasvu lesvi afaka ndzritakupfuna ha svone ndzrisvihambi magandzrelo ku Xikwembu Nkulukumba’,
6 mhunu lweyo angahasindzriseki kukombisa xichavu ku tatana wakwe.’ Kutani n’widlayi ntamu zritu dzra Xikwembu Nkulukumba hi mhaka ya mukhuva wenu.
7 Vakanganyisi! Ezaya aprofeti svone ha n’wine loko aku:
8 ‘Vhanu lava vandzrikomba xichavu hi milomu yavu ntsena, kambe timbilu tavu tile kule ngopfu na mine.
9 Vandzrigandzrela mahala, hikusa tidondzro leti vatidondzrisaka i svileleto sva vhanu.’”
10 Kolahu avitana vhanu lava afaka vali kusuhi aku ku vone: “Yingisetani n’witlhela n’wisvitwisisa:
11 Lesvinyamisaka mhunu ahi lesvinhingenaka anon’wini wakwe, kambe hi lesvihumaka anon’wini wakwe.”
12 Kutani vadondzrisiwa vamuyela, vaku: “Wasvitiva lesvaku vafarisi vakhunguvanyekile hi kuyingela lesvi usvihlayiki?”
13 Kutani avahlamula, aku: “Muzri wini na wini lowungabzaliwangakiki hi Tatana wanga wa le tilweni wutatsruvuliwa.
14 Vatsrhikani. I vakongomisi lavangavonikiki. Kutani loko mhunu lwangavonikiki akongomisa mun’wana wa kuka angavoni, hi vubizri bzavu vatapela xikheleni.”
15 Kutani Petrosi ayangula, aku: “Hitlhamuxele xifaniso lexi.”
16 Kutani Yesu ahlamula, aku: “Na wene ni svosvi awusisvitwisisa?
17 Awusvitivi lesvaku hinkwasvu lesvinhingenaka anon’wini svihundzra hi le khuzrini svigama sviyahumexiwa axikoti?
18 Kambe lesvihumaka anon’wini svipfela ambilwini; kutani lesvi hi svone svinyamisaka mhunu.
19 Hikuva ambilwini kupfela mimpimiso ya kubiha, vudlayi, vumbuye, vugangu, vuyivi, vumboni bza madzrimi, nhlamba.
20 Lesvi hi svone svinyamisaka mhunu; kambe kuda svakuda na ungahlambanga mavoko asvinyamisi mhunu.”
21 Kutiloko Yesu asuka kolahu, anhingena amugangeni wa Tire na Sidoni.
22 Kutani kohumelela wansati mun’we wa mufenisya, apfaka hi le mugangeni lowo, abandlukana, aku: “Ndzritwele vuzrombe, Hosi, N’wana Davhida. N’wananga wa xisati axanisiwa svinene hi mademona.”
23 Kambe Yesu angamuyanguli ni kutsrongo. Kutani vadondzrisiwa vakwe vata vamutsratsriya, vaku: “Mubzele asuka la, hikusa atizra kuhilandzrelela na abandlukana.”
24 Yesu ahlamula, aku: “Andzrizrumeliwanga ku mhunu handle ka tihamba letilahlekiki ta yindlu ya Yisrayele.”
25 Kambe lweyo wansati abuya amukhinsamela, aku: “Hosi, ndzripfune!”
26 Yesu ahlamula, aku: “Asvixonganga kuteka kati dzra vana udzricukumetela svimbzanyana.”
27 Kutani lwe wansati aku: “Ina, Hosi, kambe kunene svimbzanyana svada matlhantlha lamawaka hi le tafuleni dzra vinyi va svone.”
28 Kutani Yesu amuhlamula aku: “He wene wansati! Lipfumelo dzraku i dzrikulu; asvive xilesvi usvijulisaka xisvone.” Kutani n’wanakwe ahanya kusukela ankameni wolowo.
29 Yesu agama asuka kone, atlhasa kusuhi ni Lwandle dzra Galileya; kutiloko atlhantukeli anhaveni, atsrhama.
30 Kutani svitsrhungu sva svinyingi svitsrhindzrekela ku yene, na svitisa vhanu va kukhuta, lavanga ni vulima, va kuka vangavoni, va kuka vangayingeli ni kuvulavula, ni van’wana va kutala, kutani svivatsrhiketela amilengeni yakwe, avahanyisa.
31 Kutani vhanu vahlamala loko vavona va kuka vangavulavuli na vavulavula, lavanga ni vulima na vadahiwa ni va kukhuta na vafamba ni va kuka vangavoni na vavona; vahangadzrumisa Xikwembu Nkulukumba wa Yisrayele.
32 Kambe Yesu avitana vadondzrisiwa vakwe, aku: “Ndzritsretsra vhanu lava, hikusa kutani vatsrhami na mine kudzringana masiku mazrazru kambe avadanga nchumu. Andzrijuli kuvamukisa ni ndlala, hikusa vangachuka vajiyela andleleni.”
33 Kambe vadondzrisiwa vaku ku yene: “Ku mbangu wanga hi lowu, wa le kule ni vhanu, hitamakuma kwini makati ya kudzringana xitsrhungu xa kutalisa xilesvi akuva xida xixuzra?”
34 Yesu avayangula, aku: “N’wi ni makati mangani?” Vaku: “Ntlhanu wa makati na mabidzri, ni svinhlampfana svinge svingani.”
35 Kutiloko aleleti xitsrhungu lesvaku xitsrhamisa hansi,
36 ateka ntlhanu wa makati na mabidzri ni tinhlampfi, akhensa, asvikhemelela, anyika vadondzrisiwa; vadondzrisiwa vasvinyika svitsrhungu.
37 Kutani hinkwavu vada vaxuzra, vava vazrwala ntlhanu wa svihundzru sva kutala hi matlhantlha.
38 Kutani lavadiki afa vali mune wa makume ya madzana ya vavanuna, handle ka vavasati ni vatsrongwana.
39 Kutiloko alelelanile ni svitsrhungu, anhingena abzatsrhwini atlhasa amugangeni wa Magadani.