-
Matewu 8
1 Kutiloko axiki anhaveni, svitsrhungu lesvikulu svimulandzrelela.
2 Kutani kuhumelela mhunu wa nhlokonho amukhinsamela, aku: “Hosi, loko ntsena usvijula, ndzrisuse nhlokonho, ndzribasa.”
3 Kutani analavuta voko dzrakwe, amukhumba, aku: “Ndzrasvijula! Nhlokonho ayisuke, ubasa!” Kolahu nhlokonho yakwe yisuka, abasa.
4 Kutani Yesu aku ku yene: “Tivonele! Ungabzele mhunu, kambe famba uyatikombekisa ku muprista uva unyikela gandzrelo ledzri Moxe adzrihlayiki akuva bziva vumboni ku vone.”
5 Atiki awanhingena Kapernawume, ndzruna yin’we ya masocha yita ku yene, yimukombela,
6 yiku: “Hosi, nandzra wanga alatiwi andlwini hi mhaka ya kuwonyana svizro, nakone axaniseka ngopfu.”
7 Aku ku yene: “Loko ndzritlhasa, ndzritamudaha.”
8 Ndzruna ya masocha yimuhlamula, yiku: “Hosi, andzri na mfanelo ya kukunhingenisa andlwini yanga; yenca hi kuleleta ntsena kutani nandzra wanga atahanya.
9 Hikusa na mine ndzri le hansi ka vuhosi, ndzringa ni masocha hansi kwanga; kutani loko ndzribzela ledzri, ndzriku: ‘Famba’, dzrofamba; loko ndzribzela dzrin’wana, ndzriku: ‘Buya’, dzrobuya; ni loko ndzribzela nandzra wanga, ndzriku: ‘Yenca lesvi’, ayenca svosvo.”
10 Loko Yesu ayingela lesvo, ahlamala, aku ku lava afaka vamulandzra: “Ndzrihlayela mfuzri ndzrili ku n’wine: Atikweni hinkwadzru dzra Yisrayele andzringisama ndzrikuma lipfumelo ledzrikulu dzra kufana ni ledzri.
11 Kambe ndzrin’wibzela lesvaku vanyingi vatata hi le vuxeni ni le mpeladambu, vatatadela tafuleni na Abrahamu, Izaki na Yakobe amfun’wini wa matilo;
12 kambe vana va Mfumu vatacukumeteliwa ahandle amunyameni. Hi laha vatakadzrila vatlhela vaketsrela menyo kone.”
13 Kutani Yesu aku ku ndzruna ya masocha: “Muka. Lesvi upfumelisiki xisvone asviyencekise xisvosvo.” Kutani nandzra ahanya hi nkama wolowo.
14 Kutani loko Yesu anhingena akaya ka Petrosi, avona mamana wa nkata Petrosi na ayetlelile, avabza hi kuhiseta ka mizri.
15 Amukhumba voko, kutani kuhiseta ka mizri kunyamalala; mamana lweyo apfuka asungula kuyencela Yesu lesvi ni lesviya.
16 Loko dambu dzripelile, atiseliwa vhanu va vanyingi lavanga ni mademona; kutani amahlongola hi zritu, adaha ni hinkwavu lava afaka vaxaniseka,
17 akuva kuhetiseka lesvihlayiwiki hi muprofeta Ezaya, aku: “Hi yene lwatekiki svivavu svezru atlhela azrwala mavabzi yezru.”
18 Loko Yesu avona xitsrhungu amatlhelweni kwakwe, aleleta lesvaku vawela, vaya halahaya ka lwandle.
19 Kutani kuhumelela mun’we wa mutsrali, aku ku yene: “Mudondzrisi, ndzritakulandzra kwini na kwini lomu uyaka kone.”
20 Kambe Yesu aku ku yene: “Mabuwana ma ni mimpala, ni tinyanyana ta tilo ti ni svisaka, kambe N’wana wa Mhunu anga naku ka kudama nhloko yakwe.”
21 Kutani mun’wana wa vadondzrisiwa aku ku yene: “Hosi, ndzripfumelele kuzranga hi kuya akaya ndzriyalahla tatana wanga.”
22 Yesu aku ku yene: “Landzra mine, utsrhika vafi valahla vafi.”
23 Kutiloko anhingeni abzatsrhwini, vadondzrisiwa vakwe vamulandzra.
24 Kutani kupfuka xidzedze lexikulu alwandle, lakakuva bzatsrhu dzrijula kukhupumetiwa hi mavimbi; kambe yene afa ayetlelile.
25 Kutani vabuya vamupfuxa, vaku: “Hosi, hihuluxe, hadlawa!”
26 Kambe aku ku vone: “Hayini n’wi ni vutoya, n’wine va lipfumelo dzritsrongo?” Kutani apfuka akhwavela xidzedze ni lwandle, kutani kukuzwee!
27 Kutani vavanuna lavaya vahlamala, vaku: “I mhunu muni lweyi? Nambi svidzedze ni lwandle svamuyingiseta!”
28 Loko atlhasa halahaya ka lwandle amugangeni wa vagadareni, atlhangavetiwa hi vavanuna vabizri lavanga ni mademona na vahuma amakazri ka maxizra. Afa valebza kutlulisa mpimu, lakakuva kunge na mhunu lweyi afaka atiya kuhundzra hi ndlela leyo.
29 Kutani vabandlukana, vaku: “Ujula yini ku hine, N’wana wa Xikwembu Nkulukumba? Uteli kutahixanisa na kungasitlhasa nkama wa kone?”
30 Le kule na vone, afa ku ni tinguluve ta tinyingi afaka tili kazri tida.
31 Kutani mademona mamukombela, maku: “Loko uhihlongola, hizrumele atingulubzeni.”
32 Kutani aku ku wone: “Fambani!” Kolahu, mahuma mayanhingena atingulubzeni! Kutani tinguluve hinkwatu titsrutsrumela aligingizrini, tihojomela alwandle, tifela matini.
33 Kambe vabzisi vatsrutsruma, vanhingena adoropeni, vayadzrungula hinkwasvu, kupatsra ni ndzrava ya vavanuna lava afaka va ni mademona.
34 Kutani vhanu hinkwavu va doropa vahuma vayatlhangaveta Yesu; loko vamuvona, vamutsratsriya lesvaku asuka amugangeni wavu.