BRX

1   Mine, nkulu wa mhunu, ndzritsralelaka Gayu, muzrandzriwa, lweyi ndzrimuzrandzraka hi xihlayelamfuzri.

2   Muzrandzriwa, atimhakeni hinkwatu ndzrikhongota lesvaku svikufambela ha hombe ni kuva utihanyela, svanga hesvi svikufambelaka ha hombe avuton’wini bzaku.

3   Hikuva ndzritsrhavi ngopfu svinene loko kubuyi vamakwezru, vava vabeka vumboni bza xihlayelamfuzri lexinga na wene, svanga hesvi ufambaka axihlayelamfuzrini. 

4   Andzri na nchumu wa kunyonxisa kutlula kuyingela ndzrava ya lesvaku vana vanga va kazri vafamba axihlayelamfuzrini.

5   Muzrandzriwa, uyenca ntizro wa kudumbeka ku xini na xini lexi uxiyencelaka vamakwezru, nakuve i vayeni,

6   lavabekiki vumboni bza lizrandzru ledzri unga nadzru hi bandla, lava utakayenca svone loko uvaheleketa andleleni yavu hi mukhuva lowufanelaka Xikwembu Nkulukumba. 

7   Hikuva vahumi hi nkonta ya vito dzrakwe, na vangateki nchumu ku vhanu va matiko.

8   Xilesvo, hifanela kukomba malwandla vhanu va muxaka lowo akuva hitizrisana hi xihine axihlayelamfuzrini.

9   Ndzritsraleli bandla, kambe Diyotrefa, lweyi azrandzraka kutibeka phambili amakazri ka vhanu, angahiyamukeli.

10   Hi mhaka yoleyo, loko ndzrochuka ndzrita, ndzritamudzrimuxa mintizro yakwe leyi amiyencetelaka, lesvi apshapshazraka hi hine hi mazritu ya mahlevo. Kambe nambi svosvo asvimukolwi; vamakwezru angavayamukeli hi ndlela ya kone, nakone lavajulaka kuvayamukela awavatsimba atlhela avahlongola abandleni.

11   Muzrandzriwa, ungatekelele lesva kubiha kambe tekelela lesvinene. Lweyi ayencaka lesvinene ahuma ku Xikwembu Nkulukumba. Lweyi ayencaka lesva kubiha angamuvonanga Xikwembu Nkulukumba.

12   Hinkwavu vanyikeli madzrungula lamanyonxisaka hi Demetru; nambi xihlayelamfuzri hi ntshima, na xone xamuseketela. Mfuzri, nambi hi hine hi ni vumboni bza kumuseketela, nakone wene wasvitiva lesvaku vumboni bzezru i bza xihlayelamfuzri.

13   I svinyingi lesvi afaka ndzrili nasvu akuva ndzrikutsralela svone, kambe andzrinaveli svone lesva kuyenca hi kukutsralela hi xitsralu ni ntinta.

14   Kambe ndzrilavisela kukahlula ndzrikuvona, hitakanela na hivonana. Sala hi kuzrula. Vanakulozri vakudzrungula. Ndzridzrungulele vanakulozri hi mavito.