BRX

1   Mine nkulu wa mhunu, ndzritsralelaka mamana lwahlawuliwiki ni vana vakwe, lava ndzrivazrandzraka hi xihlayelamfuzri, na ange mine ntsena, kambe ni hinkwavu lava kutani vativiki xihlayelamfuzri,

2   hi mhaka ya xihlayelamfuzri lexitsrhamaka andzreni kwezru ni lexitakava na hine hi la kungahelikiki.

3   Vumbilu, timpsalu ni kuzrula asvive na hine, svipfa ku Xikwembu Nkulukumba, Tatana, ni le ku Yesu Kriste, N’wana wa Tatana, hi xihlayelamfuzri ni lizrandzru!

4   Ndzritsrhavi ngopfu svinene hilesvi ndzrikumiki van’we va vanaku na vafamba axihlayelamfuzrini, svanga hesvi Tatana ahileletiki ha kone.

5   Kutani svosvi ndzrakukombela, wene mamana, na ndzringakombeli svanga lweyi akutsralelaka xileleto xa ximpsha, kambe lexi hiviki na xone kusukela akusunguleni, xa lesvaku ahizrandzrananeni.

6   Kutani lizrandzru hi lesvi: I kuva hifamba hi kulandzra svileleto svakwe. Xileleto xa kone hi xolexo, svanga hesvi n’wisviyingeliki ha kone kusukela akusunguleni, lesvaku n’wifanela kufamba ha xone.

7   Hikuva kuhumeleli vakanganyisi vanyingi amisaveni, vhanu lavangapfumelikiki lesvaku Yesu Kriste atile hi nyama. Lweyi hi yene mukanganyisi ni nala wa Kriste.

8   Tivonelani akuva n’wingalahli lesvi hekesvitizrela akuva hisvikuma, akuva n’witakuma hakelo hinkwadzru.

9   Mani na mani lweyi asukaka laha aya kun’wana ava angatsrhami adondzrweni ya Kriste, anga na Xikwembu Nkulukumba. Lweyi atsrhamaka adondzrweni leyi hi yene lwanga na Tatana ni N’wana.

10   Loko mhunu an’wibuyela na angatisi dondzro leyi, n’wingachuki n’wimuyamukela amakaya kwenu kumbe n’wimulosa.

11   Hikuva lweyi amulosaka ahlengela naye amintizrweni yakwe lemimfani.

12   Nambilesvi ndzringa na svinyingi kun’witsralela, andzrinaveli kusviyenca hi papela ni ntinta, kambe ndzrilavisela kun’witlhasela ndzrikanela na n’wine na hivonana, akuva kunyonxa kwenu kutatatiseka.

13   Vana va makwenu wa xisati, lweyi ahlawuliwiki, vakudzrungula.