-
Yakobe 1
1 Yakobe, nandzra wa Xikwembu Nkulukumba ni wa Hosi Yesu Kriste, ku khume dzra tinxaka na tibizri letihangalakiki amatikweni: Ndzran’wilosa!
2 Vamakwezru, loko n’wikumana ni mindzringo ya kusiyanasiyana, lesvo svivonani na svili kunyonxa lokukulu,
3 hi kutiva lesvaku kudzringiwa ka lipfumelo dzrenu kupsala kutiyisela.
4 Kambe kutiyisela kujuleka kuyenca ntizro wa kone wukota wuhela, akuva n’witakota kuva lavawupfiki ni lavaheleliki hi matlhelo hinkwawu, n’wingakiyeleliwi hi nchumu.
5 Kutani loko mhunu wa kukazri apfumala vutlhazri, aakombele ku Xikwembu Nkulukumba, lweyi anyikaka hinkwavu hi mbilu ya kuzrandzra kuhanana na angaxopaxopi, kutani atanyikiwa.
6 Kambe kujuleka akombela hi lipfumelo, na angaganaganeki ni kutsrongo, hikusa lweyi aganaganekaka afana ni vimbi dzra lwandle ledzrisusumetiwaka hi moya dzriya phambili dzritlhela dzriya ntsrhaku.
7 Nakone mhunu lweyo ni kupimisa angapimise lesvaku atakuma nchumu ku Yehovha!
8 I mhunu lwanga ni mbilu leyiyavaniki hi makazri, angatiyanga atindleleni takwe hinkwatu.
9 Kutani makwezru lwanga xisiwana aatibume hi kutlakuxiwa kwakwe,
10 ni lwanga xipfundzri aatibume hi kutsrongahatiwa kwakwe, hikusa atanyamalala kufana ni xiluva xa nhova.
11 Hikusa svanga hesvi dambu dzrihumaka ni mumu wa dzrone lowuhisaka dzribavula muzri, ni sviluva sva wone sviwa kutani kuhela kuxonga ka wone ka le handle, ni yelweyi anga xipfundzri atabuna na ali phete ni kuhlongolisa svakwe.
12 Mawaku mhunu lwatiyiselaka loko adzringiwa, hikusa loko ahlula, atakuma ngiyana ya vutomi, leyi Yehovha ayidumbisiki lavamuzrandzraka.
13 Loko mhunu adzringiwa, angafanelanga kuhlaya lesvi: “Ndzrodzringiwa ha Xikwembu Nkulukumba.” Hikusa Xikwembu Nkulukumba angedzringiwi hi minchumu ya kubiha, nakone yene hi ntshima angadzringi mhunu.
14 Kambe mun’wana ni mun’wana adzringiwa hi kukokiwa ni kuwongiwa hi kunavela kwakwe hi ntshima.
15 Kutani loko kunavela kuwupfile, kupsala xidoho; na xone xidoho, loko xiwupfi xihelela, xitisa lifu.
16 N’wingakanganyisiweni, vamakwezru lavazrandzrekaka.
17 Nyiko yin’wana ni yin’wana leyinene ni xihananu xin’wana ni xin’wana lexinene svipfa he henhla, na svixika hi le ku Tatana wa svivaningo sva le tilweni, lweyi akalaka angatsrhami hi kucincacinca kumbe kukumiwa hi kundzruluka ka ntsrhuti.
18 Hi kuzrandzra kwakwe, ahibelekile hi kola ka zritu dzra xihlayelamfuzri, akuva hitava va kusungula ku svivumbiwa svakwe kufana ni mihandzru ya kuluma nguva ha yone.
19 Tivani lesvi, vamakwezru lavazrandzrekaka: Mun’wana ni mun’wana afanela kuhangwesa kuyingiseta, ahlwela kukanela, ahlwela kuhlundzruka,
20 hikusa kuhlundzruka ka mhunu akutisi vululami bza Xikwembu Nkulukumba.
21 Xilesvo, cukumetani nsila hinkwayu ni vubihi bzini na bzini lebzahasaliki. Nangweso, hi kutitsrongahata, tsrhikani zritu ledzribzaliwiki timbilwini tenu dzritizra, hikusa dzrasvikota kuhuluxa vutomi bzenu.
22 Kambe, vanani vayenci va zritu, n’wingavi vayingeli ntsena, n’witikanganyisa.
23 Hikusa loko mhunu wa kukazri ali muyingeli wa zritu kambe angavi muyenci, lweyo afana ni mhunu lweyi atilavisaka vuso ku xivonivoni,
24 hikusa atilavisa agama asuka afamba, ava atekela kudzrivala lesvi atsrhamisisiki xisvone.
25 Kambe lweyi alavisisaka anawini lowuhetisekiki, lowunyikanaka ntsrhunxeko, ava awulandzrelela, andzruluki muyenci wa zritu, angavanga muyingeli lwanga ni xidzrivalisana. Lweyo atakateka ku lesvi asviyencaka.
26 Loko mhunu wa kukazri ativona na ali mukhongoti, nakuve angatikhomi loko avulavula, otikanganyisa mbilu; vukhongoti bzakwe abzipfuni nchumu.
27 Vukhongoti lebzi Xikwembu Nkulukumba wezru, lwanga Tatana wezru, abzivonaka na bzibasile, na bzinge na xa kubzinyamisa, hi lebzi: I kupfuna vana lavafeliwiki hi vapsele ni vasati lavafeliwiki hi vanuna loko vali kuxanisekeni; ni kuva mhunu atsrhama na ange na bati dzra misava.