-
Matewu 4
1 Kutani Yesu akongomisiwa le huleni hi moya akuva ayadzringiwa ha Diyavulosi.
2 Antsrhaku ka loko atitsroni svakuda hi mune wa makume ya masiku, nhlikanhi ni vusiku, atwa ndlala.
3 Kutani kutsrhindzrekela Mudzringi, aku ku yene: “Loko uli N’wana wa Xikwembu Nkulukumba, bzela mazribze lawa mandzruluka makati.”
4 Kambe ahlamula, aku: “Kutsraliwi lesvi: ‘Mhunu angafaneli kuhanya hi svakuda ntsena, kambe hi zritu dzrin’wana ni dzrin’wana ledzrihumaka anon’wini wa Yehovha.’”
5 Kutani Diyavulosi amuteka amuyisa adoropeni dzra kuxwenga, amuyimisa axihlungwini xa tempele,
6 aku ku yene: “Loko uli N’wana wa Xikwembu Nkulukumba, jatama, hikusa kutsraliwi lesvaku ‘atazruma tintsrumi takwe tikubuyela’, ni lesvaku ‘titakuqhamukela hi mavoko ya tone, akuva ungachuki utigunya nkondzro hi zribze’.”
7 Yesu aku ku yene: “Kutlheli kutsraliwa ni lesvi: ‘Ungachuke udzringa Yehovha, Xikwembu Nkulukumba waku.’”
8 Diyavulosi atlhela amuteka, amuyisa anhaveni ya kutlakuka ngopfu svinene, kutani amukomba mimfumu hinkwayu ya misava ni kuphatima ka yone.
9 Kutani aku ku yene: “Hinkwayu minchumu leyi ndzritakunyika yone loko uwa hansi, undzrikhinsamela.”
10 Kutani Yesu aku ku yene: “Suka, Sathana! Hikusa kutsraliwi lesvi: ‘Utakhinsamela Yehovha, Xikwembu Nkulukumba waku, ugandzrela yene ntsena.’”
11 Kutani Diyavulosi amutsrhika. Kutani kubuya tintsrumi, tisungula kumutizrela.
12 Kutani loko ayingeli lesvaku Yohani akhomiwile, asuka aya Galileya.
13 Nangweso, loko asuki Nazareta, ayitsrhama Kapernawume kusuhi ni lwandle amugangeni wa Zebuloni na Naftali,
14 akuva kuhetiseka lesvihlayiwiki hi muprofeta Ezaya, lwatiki:
15 “Wene tiko dzra Zebuloni, na wene tiko dzra Naftali, andleleni ya lwandle, halahaya ka Yordani, Galileya wa matiko!
16 Vhanu lavatsrhamiki amunyameni vavoni livaningo ledzrikulu; ni lavatsrhamiki amugangeni wa ntsrhuti wa lifu, vavaningeliwi hi livaningo.”
17 Kusukela ankameni lowo kuya mahlweni, Yesu asungula kuzrezra aku: “Tisolani, hikusa Mfumu wa matilo wutsrhindzrekelile.”
18 Kutiloko afamba ankingeni wa Lwandle dzra Galileya, avona vamakwavu vabizri, Simoni, lwavitaniwaka Petrosi, na Andreye, makwavu, na vacukumetela nkukutu alwandle, hikusa afa vali vaphasi va tinhlampfi.
19 Kutani aku ku vone: “Buyani n’windzrilandzra, ndzritan’wiyenca vaphasi va vhanu.”
20 Kutani vatekela kusiya minkukutu yavu vamulandzra.
21 Kutiloko asuki kone aya mahlweni, avona van’wana vabizri lava afaka vali vamakwavu na makwavu, Yakobe, n’wana Zebedewu, ni makwavu Yohani, na vali bzatsrhwini na Zebedewu, tatana wavu, valulamisa minkukutu yavu; kutani avavitana.
22 Kutani vatekela kusiya bzatsrhu ni tatana wavu, vamulandzra.
23 Kutani afambafamba atikweni hinkwadzru dzra Galileya, adondzrisa amasinagogeni yavu ni kuzrezra madzrungula lamanene ya Mfumu, na adaha mavabzi ya mixaka hinkwayu ni svivavu sva mixaka hinkwayu amakazri ka vhanu.
24 Kutani ndhuma yakwe yihangalaka atikweni hikwadzru dzra Sirya. Vamutisela hinkwavu lava afaka vakazratiwa hi mavabzi ni tinxanisa ta kusiyanasiyana, lava afaka va ni mademona, lava afaka va ni mavabzi ya kuwa ni lava kuwonyana svizro; kutani avadaha.
25 Kutani svitsrhungu lesvikulu svimulandzrelela, na svihuma Galileya, Dekapolisi, Yerusalema, Yudeya ni halahaya ka Yordani.