-
Vagalatiya 6
1 Vamakwezru, nambiloko mhunu ochuka awela xidohweni, n’wine n’wingawupfa hi le moyeni dzringisani kululamisa mhunu lweyo hi moya wa kunabzala. Kambe tivonele, hikusa na wene ungachuka udzringiwa.
2 Zrwalelanani mintsrhwalu yenu, n’wiva n’wihetisisa xisvosvo nawu wa Kriste.
3 Hikuva loko mhunu wa kukazri apimisa lesvaku i wa nchumu nakuve ahi wa nchumu, otikanganyisa.
4 Kambe mun’wana ni mun’wana aakambele sviyenco svakwe, kutani atava ni xivangelo xa kutibuma hilesvi yene asviyencaka, na angatifanisi ni mun’wana.
5 Hikusa mun’wana ni mun’wana atazrwala ntsrhwalu wakwe.
6 Nangweso, lweyi adondzrisiwaka zritu aayavelane minchumu hinkwayu leminene ni lweyi amudondzrisaka.
7 N’wingakanganyisiweni: Xikwembu Nkulukumba ahi wa kumpfhaviwa. Hikusa lesvi mhunu asvibzalaka, hi svosvo atakatlhela asvitsrhovela;
8 hikusa lweyi abzalelaka kunyonxisa nyama atatsrhovela kubola anyameni yakwe, kambe lweyi abzalelaka kunyonxisa moya atatsrhovela vutomi lebzingahelikiki amoyeni.
9 Xilesvo, hingatsrhikeni kuyenca lesvinene, hikusa hitatsrhovela hi nkama wa kone loko hingakazrali.
10 Kutani ke, loko hikuma mukhandlu, ahiyenceleni hinkwavu lesvinga svinene, kambe ngopfungopfu lava vanga va ndangu wezru wa lipfumelo.
11 Vonani kukula ka maletela lawa ndzringamitsralela ha wone hi voko dzranga!
12 Hinkwavu lavajulaka kuvoneka na vaxongile hi tlhelo dzra nyama vadzringisa kun’wisindzrisa kusoka. Kambe voyencela ntsena kuva vangaxanisiwi hi mhaka ya kuvulavula hi kudlayiwa ka Kriste amhandzreni.
13 Hikusa nambi lava vasokaka avawulandzreleli nawu, kambe vajula lesvaku n’wine n’wisoka akuva vatakuma xa kutibuma ha xone hi matsrhamela yenu ya nyama.
14 Kambe afa ndzrinavela kuva ndzringatibumi ni siku ni dzrin’we, loko kunge hi mhaka ya mhandzre leyi Hosi yezru, Yesu Kriste, yidlayiwiki ku yone. Ha yene, ku mine misava mifile, na mine, ku misava ndzrifile.
15 Hikusa kusoka kumbe kuka kusoka ahi sva nchumu, kambe xa lisima i xivumbiwa leximpsha.
16 Lava vahanyaka hi nsinya lowu wa nawu, kunga Yisrayele wa Xikwembu Nkulukumba, avatale hi kuzrula ni timpsalu!
17 Kusukela svosvi, andzrijuli mhunu andzrinyika ntizro, hikusa amizrini yanga ndzrizrwali mimfungu lemikombaka lesvaku ndzri xikazrawa xa Yesu.
18 Vumbilu bza Hosi yezru, Yesu Kriste, abzive ni moya lowu n’winga na wone, vamakwezru! Amen.