BRX

1   Yamukelani mhunu lwangeke na lipfumelo dzra kutiya, mfuzri n’wingayavanyiseni mhunu hi mhaka ya mavonela ya kuhambana.

2   Hikusa mun’we apfumela kuda hinkwasvu, kambe lweyi akalaka angatiyanga ada ntsena sva makamba.

3   Lweyi adaka angamuvonele hansi lweyi akalaka angadi, ni yelweyi akalaka angadi angasole lweyi adaka, hikuva Xikwembu Nkulukumba amuyamukelile.

4   Wova mani wene uyavanyisaka nandzra wa mun’wana? Lesvaku awayima kumbe awawa, svitibziwa hi n’winyi wakwe. Nakone atatiya, hikuva Yehovha angamuyimisa.

5   Kunene mun’we avona siku dzra kukazri na dzrili dzra lisima kutlula dzrin’wana; mun’wana avona siku dzra kukazri na dzrifana ni man’wana; mun’wana ni mun’wana aakholwiseke ku lesvi miyanakanyu yakwe mimubzelaka svone.

6   Lweyi abekisaka siku dzra kone adzribekisela Yehovha. Ni yelweyi adaka, ada hi mhaka ya Yehovha, hikuva akhensa Xikwembu Nkulukumba; ni yelweyi akalaka angadi, angadi hi mhaka ya Yehovha, kambe akhensa Xikwembu Nkulukumba.

7   Hikuva anga kone ku hine lweyi atihanyelaka, mfuzri anga kone lweyi atifelaka.

8   Hikuva nambiloko hihanya, hihanyela Yehovha, nambiloko hifa, hifela Yehovha. Kutani nambiloko hihanya kumbe nambiloko hifa, hi va Yehovha.

9   Hikuva Kriste afeli svosvo ava apfuxiwa, lesvaku atafuma lavafiki ni lavahanyaka.

10   Kambe wene umuyavanyisela yini makwenu? Kumbe nakone umudzrelela yini makwenu? Hikuva hinkwezru hitayima amahlweni ka xitsrhamu xa vuyavanyisi xa Xikwembu Nkulukumba.

11   Hikuva kutsraliwi lesvi: “‘Ndzrifunga ha mine’, kuhlaya Yehovha, ‘matsrolo hinkwawu matandzrikhinsamela, ni milomu hinkwayu mitadzrumisa Xikwembu Nkulukumba.’”

12   Kutani ke, mun’wana ni mun’wana atatiyangulela amahlweni ka Xikwembu Nkulukumba.

13   Xilesvo, ahahafanelanga kuyavanyisana kambe, ahitibekiseleni kuka hingabeki nchumu wa kuwisana kumbe xikhunguvanyiso amahlweni ka makwezru.

14   Nakone mine ndzritiva ndzritlhela ndzrikholwiseka ku Hosi Yesu lesvaku aku na nchumu lowunyamiki hi vusvawone; ntsena loko mhunu awuvona na wungabasanga, ku yene awubasanga.

15   Hikuva loko makwenu avaviseka hi mhaka ya svakuda, awahafambi hi lizrandzru. Ungayence lesvaku mhunu lweyo, lweyi Kriste angamufela, afa hi mhaka ya svakuda.

16   Xilesvo, ungatsrhike minchumu leminene leyi umiyencaka misoliwa svanga hi loko mebiha.

17   Hikuva mfumu wa Xikwembu Nkulukumba ahi kuda ni kunwa, kambe i vululami ni kuzrula ahansi ka moya wa kuxwenga.

18   Hikuva mani na mani lwatizrelaka Kriste svanga xikazrawa atimhakeni leti awayamukeleka ku Xikwembu Nkulukumba nakone awayamukeliwa hi vhanu.

19   Kutani ke, ahilandzreleleni minchumu lemitisaka kuzrula ni lemiyakanaka.

20   N’wingahoneteleni ntizro wa Xikwembu Nkulukumba hi mhaka ya svakuda. Kunene, minchumu hinkwayu mibasile, kambe svibihile loko mhunu ayenca van’wana vawa hi mhaka ya kuda.

21   Svayampsa kuka ungadi nyama kumbe kunwa vhinyo, kumbe kuyenca yini na yini lexiwisaka makwenu.

22   Lipfumelo ledzri unga nadzru, tibekisele dzrone amahlweni ka Xikwembu Nkulukumba. Nyonxani ka yene mhunu lweyi angatikokelikiki kuyavanyisiwa hi minchumu leyi amizrandzraka!

23   Kambe lweyi aganaganekaka, loko oda, ayavanyisiwile kutani, hikusa angadi na svisukela alipfumelweni. Kunene, hinkwasvu lesvingasukelikiki alipfumelweni i xidoho.