BRX

1   Mhunu mun’wana ni mun’wana aatibeke ahansi ka vuhosi lebzinga henhla, hikuva aku na vuhosi lebzingeke hansi ka Xikwembu Nkulukumba; kambe vuhosi lebzinga kone bzi kone hilesvi bzibekiwiki hi Xikwembu Nkulukumba mimbangwini ya bzone.

2   Xilesvo, mani na mani lweyi alwaka ni vuhosi alwa ni lulamiselo dzra Xikwembu Nkulukumba; kutani lavalwaka na dzrone vatikokela yavanyiso.

3   Hikuva vafumi avachavisi loko mhunu ayenca lesvinene, kambe loko ayenca sva kubiha. Ujula kuhanya na ungachavi lwatamelisiwiki vuhosi? Yenca lesvinene, kutani atakudzrumisa;

4   hikuva i mutizreli wa Xikwembu Nkulukumba akuva akuyencela lesvinene. Kambe loko uyenca lesva kubiha, chava, hikuva angatamelanga lipanga mahala. I mutizreli wa Xikwembu Nkulukumba; i mudzrihiseli akuva akhatisa lwayencaka lesva kubiha.

5   Xilesvo, svasindzrisa lesvaku n’witibeka ahansi, kunge ntsena hi mhaka ya kuchava xikhatiso kambe ni hi mhaka ya lipfalu dzrenu.

6   Hikusa, hi svosvo sviyencaka lesvaku n’wihakela ni tinemba; hikuva i vatizreli va Xikwembu Nkulukumba lavatizrelaka mhaka leyi nkama hinkwawu.

7   Nyikani hinkwavu lesvivafanelaka: tinemba ku lwafaneliwaka hi tinemba; mali ya nhlengo ku lwafaneliwaka hi mali ya nhlengo; xichavu ku lwafaneliwaka hi xichavu; svihluwa ku lwafaneliwaka hi svihluwa.

8   N’wingaveneni na xikweneti ku mhunu loko ange xa kuzrandzranana ntsena; hikuva lweyi azrandzraka mhunukulobze ahetisisi nawu.

9   Hikuva nawu lowuliki: “Ungachuke uyenca vumbuye, ungachuke udlaya mhunu, ungachuke uyiva, ungachuke unavela sva vhanu”, ni xileleto xin’wana ni xin’wana lexinga kone, svisongiwa hi zritu ledzriliki: “Zrandzra walekwenu xilesvi utizrandzrisaka xisvone.”

10   Lizrandzru adzriyenceli mun’wana lesva kubiha; xilesvo, lizrandzru i kuhetisisa ka nawu.

11   Nakone yencani lesvo, svanga hesvi n’witivaka nkama wa kone, lesvaku kutani yichayile akuva n’wipfuka vuzrongweni; hikuva svosvi kuhuluxiwa kwezru kuyi kutsrhindzrekela kutlula nkama lowu hipfumeliki ha wone.

12   Vusiku bzi kusuhi ni kuhela; dambu dzrijula kuxa kutani. Xilesvo ahicukumeteni mintizro ya munyama hiva hiyambala matlhazri ya livaningo.

13   Ahifambeni hi hanyela dzra kuxonga svanga hi loko kuli nhlikanhi, kunge kuya minkhubzini ya pongwe ni le kupopseni, kunge kuhanyeni ka vhanu vabizri na vangachatanga ni mahanyela ya xambza, kunge kuhanya hi timholova ni vukwele.

14   Kambe yambalani Hosi Yesu Kriste, nakone n’wingajuleni maqhinga ya kuva n’wikota kunyonxisa kunavela ka nyama.