-
Matewu 3
1 Amasikwini wolawo, kuhumeleli Yohani Mubabatisi atatazrezra le huleni dzra Yudeya,
2 aku: “Tisolani, hikusa Mfumu wa matilo wutsrhindzrekelile.”
3 Hikuva lweyi hi yelweyi kukhaneliwaka ha yene hi kutizrisa muprofeta Ezaya hi mazritu lawa: “Zritu dzra lweyi ahuwelelaka le huleni dzrili: ‘Lulamiselani ndlela ya Yehovha! Wololoxani svitaratu svakwe.’”
4 Kutani Yohani afa ayambala voya bza kamele, atsrimba likhalu hi bandhi dzra xikhumba. Afa ahanya hi kuda humbi ni vulombe bza tinyonxi.
5 Kutani vhanu va Yerusalema ni Yudeya hinkwaku, ni le mugangeni hinkwawu kusuhi na Yordani, afa vahuma vamuyela.
6 Kutani avababatisa anambzeni wa Yordani, na vatihlaya svidoho svavu alivaleni.
7 Loko avona vafarisi ni vasaduki va vanyingi na vatela kubabatisiwa, aku ku vone: “N’wine vana va svipshahla, i mani an’wilumiki ndleve akuva n’wihuluka ku mahlundzru lamataka?
8 Ina ka, humexani mihandzru lemikombisaka kutisola.
9 Nakone n’wingatibzeleni lesvi: ‘Hine hi vana va Abrahamu.’ Hikusa ndzrin’wibzela lesvaku Xikwembu Nkulukumba angahambela Abrahamu vana hi mazribze lawa.
10 Nakone kawula kutani dzrigineteliwi amitsrwini ya mizri. Mizri hinkwayu lemingabekikiki mihandzru leminene mitatsremiwa micukumeteliwa andzrilweni.
11 Kasi loko ali mine, ndzrin’wibabatisa hi mati hi kutisola kwenu, kambe lweyi ataka antsrhaku kwanga awandzritlula hi ntamu; ni kufaneliwa andzrifaneliwi hi kumususa tintangu. Lweyo ke atan’wibabatisa hi moya lowa kuxwenga ni hi ndzrilo.
12 Focholo dzrakwe dzra kuhehezra dzri le vokweni dzrakwe. Atabasisa mbangu wakwe wa kuhula tizriku hi kuhelela, ahlengeleta tizriku dzrakwe axitlhanteni, kambe makamba ya kone atamahisa hi ndzrilo lowungeke na kutimiwa.”
13 Kutani Yesu asuka Galileya aya Yordani ku Yohani, akuva ababatisiwa hi yene.
14 Kambe Yohani afa amusivela, aku: “Hi mine lwajulaka kubabatisiwa hi wene, kasi wene uta kwanga?!”
15 Yesu amuhlamula, aku: “Svitsrhike sviyencekisa xisvosvo svosvi, hikusa hi yo ndlela ya kone leyi svihifanelaka kuhetisisa hinkwasvu lesvilulamiki.” Kutani amutsrhika ababatisiwa.
16 Loko ababatisiwile, Yesu atekela kuhuma amatini. Kutani matilo mapfuleka, avona moya wa Xikwembu Nkulukumba na wuxika kufana ni tuva, wuyima ahenhla kwakwe.
17 Kutani kutwala zritu na dzrihuma amatilweni, dzriku: “Lweyi i N’wananga wa kuzrandzriwa, lweyi ndzrinyonxaka hi yene.”