BRX

1   Svosvi, vamakwezru, hijula kun’wibzela mayelanu ni vumbilu bza Xikwembu Nkulukumba lebzingakombiwa mabandla ya le Masedonya.

2   Hikusa hi nkama lowu vangadzringiwa svinene hi kuxaniseka, kutsrhava kwavu lokukulu ni vusiwana bzavu lebzikulu sviyengeteli moya wavu wa kuhanana ngopfu.

3   Hikusa vahanani hi kulandzra vusvikoti bzavu, mfuzri ndzringavabekela vumboni bza lesvaku vatluli ni vusvikoti bzavu,

4   loko vahikombeli hi ntamu svinene lesvaku vakuma mukhandlu wa kuhanana ni kuhlengela avutizrelini bza kupfuna vhanu va Xikwembu Nkulukumba lava kuxwenga.

5   Nakone avagamelanga ntsena ku lesvi afaka hisviyimelile, kambe kusungula vatinyikelile hi xivone ku Hosi ni ku hine, hi kuzrandzra ka Xikwembu Nkulukumba.

6   Hi svosvo hingakota hitsratsriya Tito ha svone akuva ahetisa na n’wine ntizro lowu wa kupfuna van’wana, svanga hesvi anga yene awusunguliki.

7   Kambe, svanga hesvi n’wine n’witaliki hi hinkwasvu: lipfumelo, kuvulavula, vutivi, kutihita hinkwaku ni lizrandzru ledzri hinga nadzru ha n’wine, talani hi moya kuhanana ngopfu.

8   Lesvi andzrihlayeli kun’wileleta nchumu kambe ntsena ndzroyencela kun’wikomba lesvi van’wana vazron’wekisaka xisvone ni kuva ndzrikamba lesvaku lizrandzru dzrenu i dzra xihlayelamfuzri hakunene.

9   Hikusa n’wabzitiva vumbilu bza Hosi yezru, Yesu Kriste, lesvaku nambilesvi afaka ali xipfundzri, andzruluki xisiwana hi mhaka yenu, akuva n’wine n’wiyenciwa svipfundzri hi vuzrombe bzakwe.

10   Kutani amhakeni leyi, ndzrivona lesvaku kutapfuneka n’wine, hikusa n’wanxemu hi n’wine n’wingasungula ntizro lowu n’witlhela n’wikombisa lesvaku n’wosvizrandzra.

11   Kutani svosvi hetisani lesvi n’wingasvisungula, akuva moya wenu wa kuyenca minchumu hi kusvizrandzra wutatiseka, hi kuya hi makotela yenu.

12   Hikusa loko mhunu ayenca nchumu hi kusvizrandzra, svayamukeleka hi kuya hi lesvi anga nasvu, kunge hi lesvi angeke nasvu.

13   Hikusa asvijuleki lesvaku van’wana svivavevukela, kambe n’wine svin’wibindzrela;

14   kambe kujuleka lesvaku kuva ni kudzringanana. Lesvi n’wine n’winga nasvu hi ntalu svosvi asvitatise lomu vone vakiyeleliwaka kone, akuva lesvi vone vanga nasvu hi ntalu svitatisa lomu n’wine n’wikiyeleliwaka kone, lesvaku kuva ni kudzringanana.

15   Svanga hesvi kutsraliwiki ha kone: “Lweyi anga ni svinyingi angavanga ni sva kutala kutlula mpimu, ni yelweyi anga ni svitsrongo angavanga na sva svitsrongo kutlula mpimu.”

16   Kambe akukhensiwe Xikwembu Nkulukumba hilesvi ayenciki lesvaku Tito azron’weka ha n’wine kufana na mine!

17   Hikuva axipfumelile xikombelo xezru hakunene, nakone, lesvi anga mhunu wa nkhinkhi, awabuya an’wipfuxela hi kuzrandzra kwakwe.

18   Kambe hizrumela makwezru mun’we abuya naye, lweyi amabandleni hinkwawu akhensiwaka hi mhaka ya madzrungula lamanene.

19   Ahi lesvo ntsena, kambe ahlawuliwi hi mabandla akuva afambafamba na hine lomu hiyencaka kone ntizro lowu wa kupfuna van’wana akuva kudzrumisiwa Hosi ni kuva hikomba lesvaku hasvizrandzra kupfuna vhanu.

20   Lesvo hiyencela akuva kungakumeki mhunu wa kuhisola hilesvi hitamelisaka xisvone xihananu lexi xa xikulu.

21   Hikusa hilwela kuyenca hinkwasvu hi ndlela leyilulamiki, kunge ntsena amahlweni ka Yehovha kambe ni le mahlweni ka vhanu.

22   Nakone hizrumela makwezru mun’wana abuya navu, lweyi hingasvivona kunyingi lesvaku awahiseka aminchun’wini minyingi, ngopfungopfu svosvi hilesvi an’widumbaka svinene.

23   Mayelanu na Tito, yene i nakulozri nakone atizrisana na mine kupfuna n’wine; kasi vamakwezru lavan’wana i vapostola va mabandla ni kuphatima ka Kriste.

24   Kutani ke, vakombisani lesvaku n’wavazrandzra, nakone yencani mabandla hinkwawu masvivona lesvaku svatwisiseka loko hitibuma ha n’wine.