BRX

1   Afa ndzrinavela n’windzrilehisela mbilu loko ndzrimphuntile kutsrongonyana. Kambe, svone, n’wandzrilehisela mbilu!

2   Hikusa ndzri ni vukwele ha n’wine bza kufana ni vukwele bza Xikwembu Nkulukumba, hikuva ndzrin’wibuteli nuna mun’we lesvaku ndzritan’winyiketa ku Kriste na n’wili nhwanyana lwabasiki.

3   Kambe ndzrachava lesvaku na n’wine, svanga hesvi nyoka yingakanganyisa Evha hi maqhinga ya yone, miyanakanyu yenu hi tindlela ta kukazri mingachuka mihoniwa, n’witsrhika kubasa ka mbilu ni kubasa ka mahanyela lokufanelaka Kriste.

4   Hikusa, kunene, loko kutlhasa mhunu an’wibzela ta Yesu wa kuhambana ni lweyi hingan’wibzela yene, kumbe loko n’wiyamukela moya wa kuhambana ni lowu n’wiwuyamukeliki, kumbe madzrungula lamanene ya kuhambana ni lawa n’wimapfumeliki, n’wihangwesa n’wimulehisela mbilu.

5   Hikusa ndzripimisa lesvaku andzrivanga ntsrongo ha nchumu ku vapostola volavo va xiyimu xa le henhla.

6   Kambe, nambiloko ndzrivulavula sva kuka svingatwali, kutiva ndzrativa; mfuzri lesvi hin’wikombisi hi kukhanya hi tindlela hinkwatu ni le minchun’wini hinkwayu.

7   Kumbe ndzredoha xana hilesvi ndzringatitsrongahata lesvaku n’wine n’witlakuxiwa, hilesvi ndzringan’wizrezrela madzrungula lamanene ya Xikwembu Nkulukumba mahala?

8   Mabandla mambeni “ndzrimatekeli” sva wone hi kuyamukela svipfunu sva wone akuva ndzrikota kutizrela n’wine.

9   Kambe, ankama lowu afaka ndzrili na n’wine andzribindzriselanga mhunu ni mun’we loko ndzrivilela xa kukazri, hikusa hinkwasvu lesvi afaka ndzrisvivilela ndzrinyikiwi hi vamakwezru lava afaka vabuya hi le Masedonya. Kutani andzrisami ndzrin’wibindzrisela hi nchumu ni wa wun’we nakone ndzrahatatsrhamisisa xisvosvo.

10   Svanga hesvi xihlayelamfuzri xa Kriste xinga ku mine, ndzringetsrhiki kutibuma hi mhaka leyi amigangeni hinkwayu ya le Akaya.

11   Hi mhaka muni? Hi kuka ndzringan’wizrandzri kee? Xikwembu Nkulukumba awasvitiva lesvaku ndzran’wizrandzra.

12   Kambe lesvi ndzrisviyencaka svosvi, ndzritaya amahlweni ndzrisviyenca akuva ndzrisusela mukhandlu lavajulaka kutinyika mukhandlu wa kukumeka na vafana na hine ku lesvi vatibumaka ha svone.

13   Hikusa vhanu lavo i vapostola va madzrimi, vatizri va kukanganyisana, lavatiyencaka ingiki i vapostola va Kriste.

14   Nakone asvihlamalisi, hikusa nambi Sathana atiyenca ingiki i ntsrumi ya livaningo.

15   Xilesvo, ahi nchumu wa kuhlamalisa loko vatizreli vakwe na vone vatiyenca ingiki i vatizreli va lesva kululama. Kambe vugamu bzavu bzitafana ni mintizro yavu.

16   Ndzritlhela ndzriphindha, ndzriku: Kungave na mhunu lwapimisaka lesvaku ndzremphunta. Kambe, nambiloko ndzrimphuntile, ndzriyamukelani svanga ximphunta, lesvaku na mine ndzritatibumanyana.

17   Lesvi ndzrisvihlayaka andzrisvihlayi hi kutekelela Hosi, kambe ndzrisvihlaya svanga ximphunta, amhakeni leyi ya kutidumba ni kutibuma.

18   Lesvi vanyingi vatibumaka hi lesvi vanga xisvone hi tlhelo dzra nyama, na mine ndzritatibuma.

19   Hikusa n’wine n’wasvizrandzra kulehisela mbilu svimphunta, nambilesvi n’witlhazrihiki.

20   Mfuzri, nambiloko mhunu an’wiyenca svikazrawa svakwe, nambi an’widela svakuda svenu, nambi an’wiwutlela minchumu yenu, nambi atikulisa ahenhla kwenu, nambi an’wiba hi mpama, n’wine n’wimulehisela mbilu.

21   Svadanisa kusvihlaya, hikusa ingiki hi loko afa hova ni vutoya. Kambe loko lavan’wana va ni xixixi (laha ndzrivulavula svanga ximphunta), na mine ndzri ni xixixi.

22   I vaheberu? Na mine ndzri yene. I vayisrayele? Na mine ndzri yene. I vana va Abrahamu? Na mine ndzri yene.

23   I vatizreli va Kriste? Ndzrikanela ingiki toka tingabi, ndzriku ndzrivasiya kule: ndzritizri sva kubindzra kuvatlula; ndzrikhomiwi kunyingi kuvatlula; ndzribeteteliwi kutlula mpimu; nakone ndzrihuluki kufa kunyingi;

24   ndzripshitiwi hi vayuda kuntlhanu hi mune wa makume ya minkhavi kusala wun’we;

25   ndzribiwi hi tinhonga kuzrazru; ndzrikhandliwi hi mazribze kan’we; ndzrihonekeliwi hi ngalawa kuzrazru; ndzriheti siku dzrin’we ni vusiku bzin’we na ngalawa yezru yopengwa alwandle.

26   Ndzritsrhami hi kufambafamba, ndzriwela milambu ya kuchavisa, ndzrivhikisana ni vayivi, ndzrivhikisana ni vhanu va tiko dzranga, ndzrivhikisana ni vhanu va matiko man’wana, ndzrikumana ni makhombo adoropeni, ndzrikumana ni makhombo anhoveni, ndzrikumana ni makhombo alwandle, ndzrivhikisana ni vamakwezru va madzrimi,

27   na ndzritizra ndzringawisi, ndzriheleliwa hi vuzrongo kunyingi, ndzridlawa hi ndlala ni tozra, ndzritsrhama na ndzringadi masiku ya kutala, ndzribiwa hi xizrami, ndzripfumala mpahla.

28   Handle ka minchumu leyo ya le handle, ku ni lexi xindzrikazrataka miyanakanyu siku ni siku: inga kuhlatiyela hi mabandla hinkwawu.

29   I mani angeke na ntamu? Na mine a ndzri nawu. I mani akhunguvanyisiwaka? Na mine svandzrihisa.

30   Loko svijula ndzritibuma, ndzritatibuma hi kupfumala kwanga ntamu.

31   Xikwembu Nkulukumba, lwanga Tatana wa Hosi Yesu, lwafanelaka kudzrumisiwa hi la kungahelikiki, awasvitiva lesvaku andzrihembi.

32   Le Damaxku, hosi ya xifundzrankulu leyingabekiwa hi hosi Areta yizrumi vhanu vavonelela doropa hinkwadzru akuva vandzrikhoma,

33   kambe ndzrixixiwi hi jinela hi khumbi dzra doropa, na ndzrili ndzreni ka xihundzru, ndzriva ndzrihulukisa xisvosvo amavokweni ya yone.