-
Vaefesa 2
1 Nakone n’wine afa n’wifile asvihonweni ni le svidohweni svenu,
2 lesvi khale afaka n’wihanya ha svone hi kulandzra hanyela dzra misava leyi, hi kuya hi mufumi lwafumaka moya lowuhefemuliwaka, kunga moya lowutizraka svosvi ku vana va kukala kuyingiseta,
3 lava nambi hine hinkwezru hingasama hihanya navu hi kutwanana ni kunavela ka nyama yezru, hiyenca kuzrandzra ka nyama ni ka mimpimiso yezru; nakone hi matsrhamela yezru ya ntumbuluku afa hili vana va kuhlundzrukeliwa svanga hi lavan’wana.
4 Kambe lesvi Xikwembu Nkulukumba ataliki hi timpsalu, hi kola ka lizrandzru dzrakwe ledzrikulu ledzri ahizrandzriki ha dzrone,
5 ahihanyisile kun’we na Kriste, nambilesvi afaka hifile asvihonweni; n’wihuluxiwile hi vumbilu;
6 nakone ahipfuxile kun’we atlhela ahitsrhamisisa kun’we amimbangwini ya matilweni na Kriste Yesu,
7 lesvaku amisaveni lemitaka atahikomba ndlela leyi vumbilu bzakwe bzitaliki bzitlhela bzikhapakhapa ha yone, avumbilwini lebzi ahiyencelaka bzone ha Kriste Yesu.
8 Hikusa hi vumbilu lebzi, n’wihuluxiwile hi kola ka lipfumelo; nakone lesvi asvipfeli ku n’wine kambe i nyiko ya Xikwembu Nkulukumba,
9 kunge nchumu lowutisiwiki hi mintizro, akuva kungavi na mhunu ni mun’we lwatibumaka.
10 Hine hi nchumu lowukhandhiwiki ha yene nakone hitumbuluxiwi kun’we na Kriste Yesu, akuva hiyenca mintizro leminene, leyi Xikwembu Nkulukumba amibekisiki na kehe nkama akuva hifamba ku yone.
11 Xilesvo, dzrimukani lesvaku khale, n’wine vhanu va matiko, hi tlhelo dzra nyama, afa n’wivitaniwa lava kuka vangasokanga hi lavavitaniwaka lavasokiki, svinga lesviyenciwaka hi tlhelo dzra nyama hi mavoko ya mhunu;
12 dzrimukani lesvaku ankameni wa kone afa n’wihambanisiwi na Kriste, n’wibekiwi kule ni vun’wanatiko bza Yisrayele, nakone afa n’wili vayeni va le matikweni lavangasvitivikiki svipfumelelanu sva xidumbiso, n’winge na dumbo nambi Xikwembu amisaveni.
13 Kambe svosvi kun’we na Kriste Yesu, n’wine, lava khale n’wisamiki n’wiva kule svinene, n’witsrhindzrekeli kusuhi hi ngati ya Kriste.
14 Hikusa hi yene kuzrula kwezru, lweyi ayenciki lesvaku mintlawa ha mibizri miva wun’we atlhela ambundzrumuxa khumbi ledzri afaka dzrili makazri ka yone akuva dzrimihambanisa.
15 Hi kutizrisa nyama yakwe ahelisi vulala, Nawu wa svileleto lesvihumexiwaka, akuva atlhanganisa mintlawa ha mibizri miva kun’we na yene hi ntshima ku mhunu lwemumpsha ni kuyenca kuzrula,
16 ni kuyenca lesvaku mintlawa ha mibizri mitlhelelana na Xikwembu Nkulukumba svanga mizri min’we hi kola ka mhandzre leyi afeliki ku yone, lesvi adlayiki vulala bza kone hi lifu dzrakwe.
17 Nakone atile atwalisa madzrungula lamanene ya kuzrula ku n’wine lava afaka n’wili kule svinene, ni ya kuzrula ku lava le kusuhi,
18 hikusa ha yene, hine svanga mintlawa mibizri hipfuleliwi nyangwa akuva hitsrhindzrekela ku Tatana hi kola ka moya wun’we.
19 Xilesvo, n’wine an’wehe vayeni va le matikweni kumbe valuveli, kambe n’wi vana va tiko kun’we ni vhanu va Xikwembu Nkulukumba lava kuxwenga ni svizro sva ndangu wa Xikwembu Nkulukumba,
20 lavayakiwiki ahenhla ka masungulu ya vapostola ni vaprofeta, laha Kriste Yesu hi ntshima anga zribze dzra masungulu.
21 Yindlu hinkwayu, lesvi yitlhanganisiwiki kun’we na yene, yikula yiva tempele dzra kuxwenga dzra Yehovha,
22 ledzri ku dzrone na n’wine n’wiyakiwaka kun’we na yene lesvaku n’wiva mbangu wa kuva Xikwembu Nkulukumba atsrhama ku wone hi moya.