-
Mintizro 26
1 Kutani Agripa aku ku Pawlu: “Wapfumeleliwa kutiyimelela.” Kutani Pawlu atlakuxa voko asungula kutiyimelela, aku:
2 “Mayelanu ni hinkwasvu lesvi vayuda vandzrizrwexaka nandzru ha svone, we hosi Agripa, ndzritihlaya lwewa njombo lesvi kunga amahlweni kwaku laha ndzritiyimelelaka kone namunhla,
3 ngopfungopfu lesvi unga ntivi ya mikhuva hinkwayu ya vayuda ni timhaka leti vaphikisanaka ha tone. Kutani ke, ndzrikukombela lesvaku undzriyingela hi mbilu ya kuleha.
4 “Kunene, mahanyela yanga kusukela vumpsheni kuya amahlweni amakazri ka tiko dzranga ni le Yerusalema, vamativa vayuda hinkwavu,
5 lava vandzritiviki kusukela khale, loko vanganavela kunyikela vumboni, lesvaku ndzrihanyi svanga mufarisi hi kulandzra xikole lexitsravukiki lexa kukazrata xa kone.
6 Kambe svosvi ndzrikota ndzriyima laha ndzrithethisiwa hi mhaka ya lesvi ndzrilaviselaka minchumu leyi Xikwembu Nkulukumba angamidumbisa vatatana vezru;
7 leyi tinxaka tezru ta khume na tibizri tilaviselaka kumivona miyenceka, hi kutizrela Xikwembu Nkulukumba hi mbilu hinkwayu vusiku ni nhlikanhi. We hosi, i mayelanu ni xidumbiso lexo ndzrizrwexiwaka nandzru hi vayuda.
8 “Hayini n’wipimisa lesvaku asvikholweki lesvaku Xikwembu Nkulukumba awasvikota kupfuxa vafi?
9 Mine yelweyi, nakunene, afa ndzripimisa lesvaku afa ndzrifanela kuyenca hinkwasvu lesvi ndzringasvikotaka kulwisa vito dzra Yesu wa le Nazareta,
10 anga lesvi ndzrisviyenciki le Yerusalema. Vhanu vanyingi va Xikwembu Nkulukumba lava kuxwenga ndzrivapfaleli bohelweni, hikusa afa ndzrinyikiwi ntamu hi vaprista lavakulu; nakone loko vadlayiwa, afa ndzriyima ndzrisviseketela lesvo.
11 Nakone afa ndzrivakhatisa kunyingi amasinagogeni hinkwawu, ndzrivasindzrisa kusandzra Xikwembu Nkulukumba. Kutani, lesvi afaka ndzrivahlundzrukeli kutlula mpimu, ndzrikoti ndzriyavahlongolisela ni le madoropeni ya le matikweni.
12 “Na ndzriyenca lesvo, ankama lowu afaka ndzrili ndleleni ya kuya Damaxku, na ndzri ni ntamu ni nseketelo wa vaprista lavakulu,
13 hi nkama wa dina, we hosi, le ndleleni ndzrivoni livaningo dzra kutlula ni kuphatima ka dambu na dzripfa atilweni, dzrindzrivaninga amatlhelweni hinkwawu, mine ni lava afaka vafamba na mine.
14 Kutani loko hinkwezru hiweli ahansi, ndzriyingeli zritu dzriku ku mine hi lidzrimi dzra xiheberu: ‘Sawlu, Sawlu, undzrixanisela yini? Kudlivetela tinsungunu svitatlhela hi wene.’
15 Kambe ndzriku: ‘Hi we mani, Hosi?’ Kutani Hosi yiku: ‘Hi mine Yesu, lweyi umuxanisaka.
16 Kambe sekeleka uyima, hikusa ndzrikoti ndzrihumelela amahlweni kwaku hi mhaka leyi, akuva ndzrikuhlawula lesvaku uva nandzra ni mboni ya lesvi usvivoniki ku mine ni lesvi ndzrahatakakuvonisa svone.
17 Ndzritakuhuluxa ku vhanu va tiko dzraku ni va matiko mambeni, lava ndzrikuzrumaka ku vone,
18 akuva uyavapfula mahlo, uvasusa amunyameni vaya alivangweni, uvasusa ni le ntan’wini wa Sathana vaya ku Xikwembu Nkulukumba, akuva vakuma kudzrivaleliwa svidoho ni kuva vanyikiwa pfindla kun’we ni lavaxwengisiwiki hilesvi vapfumeliki ku mine.’
19 “Xilesvo, hosi Agripa, andzrixikanyanga xivoniso lexo xa le tilweni,
20 kambe kusungula hi lava afaka vali Damaxku ni lava afaka vali le Yerusalema, ni le tikweni hinkwadzru dzra le Yudeya, ni le ku va matiko, ndzrifambi ndzrivabzela lesvaku vafanela kutisola, vatlhelela ku Xikwembu Nkulukumba hi kuyenca mintizro ya kufambelana ni kutisola.
21 Hi svosvo vayuda vandzrikhomeliki svone atempeleni, vadzringisa kundzridlaya.
22 Xilesvo, hi kupfuniwa hi Xikwembu Nkulukumba, kutatlhasa namunhla, ndzriyi mahlweni ndzribekela vumboni lavatsrongo ni lavakulu, na ndzringahlayi svin’wana handle ka lesvi vaprofeta kupatsra na Moxe vangahlaya lesvaku svitayenceka,
23 anga lesvaku Kriste afa ataxaniseka ni lesvaku svanga lwewa kusungula kupfuxiwa akufeni, afa atakomba livaningo vhanu va tiko dzrakwe ni va matiko mambeni.”
24 Kutani na Pawlu ahahlaya lesvo akutiyimeleleni kwakwe, Fextu aku hi zritu ledzrikulu: “Wahlanya, Pawlu! Lesva kudondzra ngopfu svakuhlanyisa!”
25 Kambe Pawlu aku: “Andzrihlanyi, we Muchaviseki Fextu, kambe ndzrivulavula mazritu ya xihlayelamfuzri ni ya kutwisiseka.
26 Hikuva, yo hosi leyi ndzritiyaka ndzrikanela nayu yatitiva timhaka leti. Ndzradumba lesvaku ayi kone ni yin’we ya timhaka leti leyifihlekiki ku yone, hikuva ni yin’we ya tone ayisamanga yiyenceka axihundleni.
27 We hosi Agripa, wapfumela ku vaprofeta? Ndzrasvitiva lesvaku wapfumela.”
28 Kambe Agripa aku ku Pawlu: “Afa kesala kutsrongo akuva undzrikholwisa kundzruluka mukriste.”
29 Kutani Pawlu aku: “Hi nkama wa wutsrongo kumbe wa wunyingi, lesvi afaka ndzrinavela svone ku Xikwembu Nkulukumba hi lesvaku wene ni hinkwavu lavandzriyingelaka namunhla n’wingafana na mine, handle ka timpencana leti.”
30 Kutani hosi Agripa asekeleka, na yo hosi ya xifundzrankulu, na Berenise, ni lava afaka vatsrhami na yone.
31 Kambe ankama lowu vasukaka, vasungula kubzelana lesvi: “Mhunu lweyi angayenci nchumu wa kufaneliwa hi lifu kumbe kupfaleliwa abohelweni.”
32 Agripa agama aku ku Fextu: “Mhunu lweyi inhaka antsrhunxiwile loko afa angakombelanga kuyayavanyisiwa hi Khezari.”