-
Mintizro 25
1 Kutani ke, antsrhaku ka masiku mazrazru na atlhasi ku xifundzrankulu lexo, Fextu asuki Khezariya atlhantukela Yerusalema.
2 Kutani vaprista lavakulu ni vazrangeli va vayuda vayazrambela Pawlu, vamutsratsriya,
3 vakombela kuva avasiza hi kuvitana Pawlu aya le Yerusalema, nakuve vamuhambeli xikungu xa kumudlaya na ehe ndleleni.
4 Kambe Fextu ahlamula, aku: “Pawlu afanela kuvoneleliwa le Khezariya; na mine ndzritatlhelela kone kunge kungani”.
5 Atlhela aku: “Xilesvo, lavanga ni ntamu amakazri kwenu, avafulamele na mine. Loko kunene ku ni xa kubiha lexi wanuna lweyo axiyenciki, avayemuzrambela!”
6 Kutani loko aheti ntlhanu wa masiku na mazrazru kuya ka khume na ali na vone, atlheleli Khezariya. Kutani mundzruku ka kone, atsrhamisa axitsrhan’wini xa vuyavanyisi aleleta kuva vayabuyisa Pawlu.
7 Loko anhingenile, vayuda lava afaka vabuyi hi le Yerusalema vayima amatlhelweni kwakwe, vamuzrwexa milandzru leya kutala ya kubindzra, leyi afaka vangakoti kumiseketela hi vumboni.
8 Kambe Pawlu atiyimelela, aku: “Mine andzridohelanga Nawu wa vayuda, nambi tempele, nambi Khezari.”
9 Fextu, hi kujula kunyonxeliwa hi vayuda, ahlamula Pawlu, aku: “Xana wasvijula kuya le Yerusalema ndzriyakuyanyisa kone hi timhaka leti?”
10 Kambe Pawlu aku: “Ndzriyimi amahlweni ka xitsrhamu xa vuyavanyisi xa Khezari, lomu ndzrifanelaka kuyavanyisiwa kone. Andzriyencanga nchumu wa kubiha ku vayuda, hi la na wene usvitivisisaka ha kone.
11 Xilesvo, loko kunene ndzriyenci sva kubiha kumbe ndzriyenci nchumu wa kukazri wa kufaneliwa hi lifu, andzriyali kufa. Kambe loko kunge na nchumu lowu vandzrizrwexaka nandzru ha wone, anga kone lweyi angandzrinyiketaka ku vone hi kuvasiza. Ndzrikombela kuyayavanyisiwa hi Khezari!”
12 Kutani Fextu, antsrhaku ka kukombisana ni huvo yakwe ya madoda, ahlamula, aku: “Lesvi ukombeliki kuyayavanyisiwa hi Khezari, utaya ku Khezari.”
13 Kutani antsrhaku ka masikunyana, kutlhasi hosi Agripa na Berenisi vatatapfuxela Fextu le Khezariya.
14 Kutani lesvi vangaheta masiku ya kutala kone, Fextu abeki mhaka ya Pawlu ku hosi Agripa, aku: “Ku ni mun’we wanuna angasiyiwa hi Felksi abohelweni,
15 lweyi loko ndzrili le Yerusalema vaprista lavakulu ni vakulu va vayuda vabuyiki vandzritlhamuxela sva kukazri ha yene, vakombela lesvaku ayavanyisiwa,
16 laha ndzrivahlamuliki ndzriku ahi mayencela ya xiroma kunyiketa mhunu hi kusiza na lweyi azrwexiwaka nandzru angasilavisana mombo hi mombo ni lavamuzrwexaka nandzru, ni kuva akuma mukhandlu wa kutiyimelela ku lesvi azrwexiwaka nandzru ku svone.
17 Kutani loko vatlhasi halenu, andzrihlwelanga. Mundzruku ka kone ndzritsrhami xitsrhan’wini xa vuyavanyisi ndzrileleta lesvaku vabuyisa lweyo wanuna.
18 Loko vasekelekile, vazrambeli vakwe avasvikotanga kumuzrwexa nandzru ni wa wun’we ku lesvi afaka ndzriyimela lesvaku atava na atluli milawu ya tiko ku svone.
19 Kambe ntsena vedokadokisana naye hi timhaka ta vukhongoti bzavu ni hi mhaka ya mun’we wanuna lwavitaniwaka Yesu, lweyi afiki kambe lweyi Pawlu aliki awahanya.
20 Kutani lesvi mine afaka ndzringativi lesvaku mholova leyo ndzringayitlhantlhisa kuyini, ndzrimuvutisi lesvaku kumbe angasvinyonxela kuya le Yerusalema ayayavanyisiwa kone hi timhaka leti.
21 Kambe loko Pawlu akombeli kutama atsrhama bohelweni na ayimela kuyayavanyisiwa hi Muchaviseki Lwenkulu, ndzrileleti lesvaku atama apfaleliwa ndzriko ndzrimuzrumela ku Khezari.”
22 Kutani Agripa aku ku Fextu: “Na mine afa ndzrinavela kuyingela mhunu lweyo.” Aku: “Mundzruku lwe bzixaka utamuyingela.”
23 Kutani mundzruku ka kone Agripa na Berenisi vatlhasa na vavombisela vhanu hi sviphatiphati svinyingi, vanhingena vatsrhama ahubzeni ya kuthetha timhaka, kun’we ni tihosi ta masocha ni vhanu lava afaka vali vamanyana adoropeni. Fextu agama azruma vhanu vayateka Pawlu.
24 Kutani Fextu aku: “Hosi Agripa na n’wine hinkwenu n’winga la na hine, mamuvona mhunu lweyi xitsrhungu hinkwaxu xa vayuda xindzrikombeliki le Yerusalema ni kolomu, na xibandlukana xiku angafanelanga kutama ahahanya.
25 Kutani ndzritwisisa lesvaku angayencanga nchumu wa kufaneliwa hi lifu, kambe lesvi yene ha bzakwe atikombeleliki kuyayavanyisiwa hi Muchaviseki Lwenkulu, ndzrivoni sviyampsa kumuzrumela.
26 Kambe andzri na nchumu wa kukongoma wa kuwutsrala mayelanu na yene ku hosi yanga. Xilesvo, ndzrimubuyisi amahlweni kwenu hinkwenu, ngopfungopfu amahlweni kwaku, wene hosi Agripa, akuva loko kuheli kukambisisa ka vuyavanyisi, ndzritakuma sva kusvitsrala.
27 Hikuva ndzrivona lesvaku asvitwisiseki kuzrumela mubohiwa na ungakongometi ni milandzru leyi azrwexiwaka yone.”