-
Mintizro 20
1 Kutiloko dzolonga dzrihelile, Pawlu avitana vadondzrisiwa, avatiyisa timbilu, avalelela, agama akhoma ndlela ya kuya Masedonya.
2 Lesvi ahundzriki hi miganga leyo, avatiyisa timbilu hi mazritu laya kutala, agama aya Gresya.
3 Kutani atsrhama kone tihweti tizrazru, kambe lesvi vayuda vamuhambeliki xikungu xa kumudlaya ankama lowu afaka ajula kunhingena ngalaweni aya Sirya, agami ateliwa hi miyanakanyu ya kutlhela hi Masedonya.
4 Kutani afa aheketiwa hi Sopatru, n’wana Piru, wa le Bereya, Arixtarku na Sekundu, lava afaka vahuma Tesalonika, na Gayu, wa le Derbe, na Timotewu, kun’we na Tikiku na Trofemu, va xifundzrankulu xa Azya.
5 Kutani lava vazrangi vafamba vayahiyimela le Trowasi;
6 kambe hine hinhingeni ngalaweni ya kusuka Filipiya antsrhaku ka masiku ya Makati ya Kuka Handzrelo, higama hiyavakuma andzreni ka ntlhanu wa masiku le Trowasi, hitsrhama kone ntlhanu wa masiku na mabizri.
7 Kutani hi siku dzra kusungula dzra vhiki, hihlengeletana akuva hida kun’we. Kutani Pawlu asungula kuvanyika tidondzro, hikusa afa ajula kusuka mundzruku ka kone; kutani alehisa mazritu yakwe kuyatlhasa amakazri ka vusiku.
8 Ankameni wa kone, afa kutlhavikiwi mimotsre minyingi axilawini xa le henhla lomu afaka hihlengeletani kone.
9 Kutani mufana mun’wana lwavitaniwaka Ewutiku, lweyi afaka atsrhami hi le jineleni, akhomiwa hi vuzrongo lebzikulu ankama lowu Pawlu afaka aya mahlweni ni mazritu yakwe. Loko ahluliwi hi vuzrongo, awa hansi kusukela axitezini xa vuzrazru, vamutlakula na afile.
10 Kambe Pawlu axika, aticukumetela ahenhla kwakwe amuxingazra, aku: “N’wingabeneni tihuwa, hikuva awahanya.”
11 Agama aya henhla ayaphamela svakuda, ada. Abula navu nkama wa kuleha bzikota bzixa, ahangasuka.
12 Kutani vahuma ni mufana lweyo na ahanya; vachaveleleka ngopfu svinene.
13 Kambe hine hipfi hizranga hi ya ngalaweni, hiya Asosi, lomu afaka hijula kuhundzra hiteka Pawlu, hikuva hi lesvi angaleleta svone na yene abuya hi milenge.
14 Kutani loko ahikumile le Asosi, himukhwelisi ngalaweni hiya Mitileni.
15 Higama hisuka kone mundzruku ka kone, hiyatlhasa ka kulavisana na Kiyosi, kambe mundzruku ka kone, hiyitlhasa Samosi, hiva hiyatlhasa Miletu hi siku ledzrilandzrelaka.
16 Hikusa Pawlu afa abohi kuhundzra hi ngalawa hi Efesa akuva angasindzriseki kutsrhama xifundzrankulu xa Azya, hikuva afa atsrutsrumela kuyatlhasa Yerusalema hi Siku dzra Nkhuvu wa Pentekoxta, loko svikoteka.
17 Nambitanu, loko ali Miletu azrumeli zritu le Efesa, kuyavitana vakulu va bandla.
18 Kutani loko vamutlhaselile, aku ku vone: “N’wasvitiva n’wine lesvi ndzringahanyisa xisvone amakazri kwenu kusukela asikwini dzra kusungula ledzri ndzringatlhasa ha dzrone lomu ku xifundzrankulu xa Azya,
19 loko ndzritizrela Hosi hi kutitsrongahata hinkwaku ni hi minyembeti, ni mindzringo lemindzriweliki hi mhaka ya svikungu sva vayuda,
20 ni lesvaku andzritsrhikanga kun’wibzela nchumu wa kukazri lowupfunaka nambi kun’widondzrisa alivaleni ni hi yindlu ni yindlu,
21 na ndzribeka vumboni lebziheleliki ku vayuda ni vagrika mayelanu ni kutisola amahlweni ka Xikwembu Nkulukumba ni kuva ni lipfumelo ku Hosi yezru, Yesu.
22 Kutani svosvi, lavisani, moya wundzribohile. Ndzriya Yerusalema, na ndzringasvitivi lesvitakandzriyencekela kohala,
23 ntsena ndzrotiva lesvaku adoropeni dzrin’wana ni dzrin’wana moya lowa kuxwenga wundzrikombi hi vumboni hinkwabzu, lesvaku ndzriyimeliwa hi timpencana ni mahlomulo.
24 Kambe vutomi bzanga andzribzivoni na bzili bza lisima ku mine; ntsena lexi ndzrixijulaka i kuheta kutsrutsruma kwanga ni vutizreli lebzi ndzringanyikiwa bzone ha Hosi Yesu, akuva ndzrinyikela vumboni lebziheleliki bza madzrungula lamanene ya vumbilu bza Xikwembu Nkulukumba.
25 “Kutani lavisani! Ndzrasvitiva lesvaku anga kone ni mun’we wenu amakazri ka lava ndzrivazrezreliki mfumu atakatlhela ahavona liso dzranga.
26 Xilesvo, ndzritiyisa amahlweni kwenu namunhla lesvaku ndzribasile angatini ya vhanu hinkwavu,
27 hikuva andzritsrhikanga kun’wibzela hinkwasvu lesvinga kuzrandzra ka Xikwembu Nkulukumba.
28 Tivonelani n’wine ni ntlhambi hinkwawu, lowu moya lowa kuxwenga wun’wibekiki kuva n’wiva valaviseli va wone, akuva n’wibzisa bandla dzra Xikwembu Nkulukumba, ledzri angadzrixava hi ngati ya N’wanakwe.
29 Ndzrasvitiva lesvaku loko ndzrifambile kutanhingena amakazri kwenu mahava ya kulebza, lamangatikitsretsrelela ntlhambi,
30 nakone amakazri kwenu hi ntshima kutahumelela vavanuna lavatakavulavula minchumu ya kuhambana ni xihlayelamfuzri, akuva vatikokela vadondzrisiwa.
31 “Kutani ke, tsrhamani na n’wivonelela, n’widzrimuka lesvaku hi xipimu xa malembe mazrazru, vusiku ni nhlikanhi, andzringitsrhika kun’wiba ndleve ha mun’wemun’we na ndzridzrila.
32 Kutani svosvi ndzrin’wisiya amavokweni ya Xikwembu Nkulukumba ni le zritwini dzra vumbilu bzakwe, ledzringa ni ntamu wa kun’wiyaka ni kun’winyika pfindla amakazri ka hinkwavu lavaxwengisiwiki.
33 Mine andzrisamanga ndzrinavela mali ya mhunu ya silivhela kumbe ya gole, kumbe mpahla yakwe.
34 Nambi n’wine n’wasvitiva lesvaku hinkwasvu lesvi afaka svivileliwa ha mine ni lava afaka vali na mine, ndzresvitizrela hi mavoko lawa.
35 Atimhakeni hinkwatu, hi kutikazrata hi ndlela leyo na ndzringatitsretsri, ndzrin’wikombisile lesvaku svajuleka kupfuna lavangeke na ntamu, na n’widzrimuka mazritu ya Hosi Yesu, loko aku: ‘Kunyonxa kukulu kukumiwa hi kuhanana kutlula kuyamukela.’”
36 Kutiloko aheti kuhlaya lesvo, akhinsama navu hinkwavu akhongota.
37 Kutani hinkwavu vasungula kudzrila svinene, vayaxinghazrana na Pawlu vamun’quta,
38 na vatlhaveki ngopfu ambilwini hi mhaka ya zritu ledzri adzrihlayiki aku vangahatitlhela vavona liso dzrakwe ni siku ni dzrin’we. Vagama vamuheketa angalaweni.