BRX

1   Ankameni lowo, hosi Heroda asungula kuxanisa svizro sva kukazri sva bandla.

2   Kutani adlaya Yakobe, makwavu wa Yohani, hi lipanga.

3   Loko avona lesvaku lesvo svinyonxisa vayuda, aya mahlweni akhoma na Petrosi. (Kutani afa mali masiku ya Makati ya Kuka Handzrelo.)

4   Amukhoma amupfalela abohelweni, amunyiketa ku mune wa mintlawa leminga ni mune wa masocha wun’wana ni wun’wana akuva mimuvonelela, na ajula kumuhumexa amahlweni ka xitsrhungu antsrhaku ka Paxkwa.

5   Kutani Petrosi abekiwa abohelweni, kambe bandla afa dzrikhongota hi xiviti amahlweni ka Xikwembu Nkulukumba dzrimukombelela.

6   Kutani avusikwini lebzi mundzruku ka kone Heroda afaka ajula kumuhumexa ha bzone, Petrosi afa atiyetlelelile na astrimbiwi hi timpencana tibizri makazri ka masocha mabizri, nakone afa ku ni vazrindzri amahlweni ka xipfalu lava afaka vavonelela bohelo.

7   Kambe kuhumeleli ntsrumi ya Yehovha yitlhasa yiyima kone, kutani livaningo dzrivaninga bohelo. Kutani yikhumba zreve dzra Petrosi yimuhlakahla apfuka, yiku: “Hangwesa upfuka!” Kutani timpencana tiwa amavokweni yakwe.

8   Kutani ntsrumi yiku ku yene: “Yambala mpahla, ubekela ni masandhazi.” Ayenca svosvo. Yigama yiku ku yene: “Funekela mujasi, undzrilandzra.”

9   Kutani ahuma ayilandzra, kambe afa angasvitivi lesvaku lesvi afaka sviyenceka hi kola ka ntsrumi afa svoyenceka hakunene, hikusa afa apimisa lesvaku afa ovona xivoniso.

10   Kutani vahundzra vasiya muzrindzri wa kusungula ni wa vubizri, vayatlhasa anyangweni ya nsimbi leyigoxometaka adoropeni, kutani yitipfulekela. Kutiloko vahumile, vanhingena axitaratwini xin’we, kutani ntsrumi yitekela kusuka yimusiya.

11   Kutani Petrosi axalamuka, aku: “Svosvi ndzrasvitiva hakunene lesvaku Yehovha azrumeli ntsrumi yakwe kutandzrihuluxa avokweni dzra Heroda ni ku hinkwasvu lesvi vayuda afaka vasviyimelile.”

12   Loko atwisisi lesvo, aya akaya ka Mariya, mamana wa Yohani, lwavitaniwaka Marku, lomu afaka kuhlengeletani vhanu va kuhlawa vakhongota.

13   Kutani loko agongondzra xipfalu anyangweni, kubuya kuhlamula mun’we wa nhwanyana lweyi afaka ali xitizri, lwavitaniwaka Roda.

14   Kutani loko ayingela lesvaku zritu dzra kone i dzra Petrosi, anyonxa ngopfu lakakuva angasvikoti ni kupfula xipfalu, kambe atlhela hi kutsrutsruma, ayaku: “Petrosi ayimi anyangweni.”

15   Kutani vaku ku yene: “Wahlanya wene.” Kambe aphikelela, aku: “I xihlayelamfuzri lesvi ndzrin’wibzelaka svone.” Kutani vaku: “I ntsrumi yakwe.”

16   Kambe Petrosi aya mahlweni agongondzra xipfalu. Loko vapfula xipfalu, vamuvona, vatala hi kuhlamala.

17   Kambe akanela na vone hi voko avakombela kuva vamiyela, avatlhamuxela lesvi Yehovha amuhumexisiki xisvone abohelweni, agama aku: “Dzrungulelani Yakobe ni vamakwezru timhaka leti.” Agama asuka ayendzrela mbangu wun’wana.

18   Kutani loko bzixile, kuva ni mpfilumpfilu leyikulu amakazri ka masocha hi kujula kutiva lesvaku keyenceka yini hi Petrosi.

19   Kutani Heroda amujuletela, kambe angamukumi. Athethisa vazrindzri agama aleleta lesvaku vadlayiwa; antsrhaku asuka Yudeya afulamela Khezariya ayatsrhama kone.

20   Heroda afa ahlundzrukeli ngopfu vhanu va le Tire na Sidoni, kambe vamubuyela hi vumun’we vakanela naye. Kutani vatlhasa vakanela na Blaxtu akota apfumela, lweyi afaka ali mutameli wa muti wa hosi, vagama vakombela kuzrula ni hosi, hikusa tiko dzravu afa dzrihanya hi svakuda lesvihumaka atikweni dzra yone.

21   Kutani hi siku ledzribekisiwiki, Heroda ayambala sviyambalu sva vuhosi, atsrhamisa axitsrhan’wini xa vuyavanyisi akanela ni xitsrhungu.

22   Kutani xitsrhungu xihuwelela, xiku: “I zritu dzra xikwembu ledzro, ahi dzra mhunu!”

23   Kolahu, ntsrumi ya Yehovha yimuba, hilesvi angadzrumisangakiki Xikwembu Nkulukumba, kutani adiwa hi svivungu, afa.

24   Kambe zritu dzra Yehovha dzriya mahlweni dzrikula, dzrinava.

25   Kutani Barnaba na Sawlu, loko vaheti vutizreli bzavu le Yerusalema, vamuka na Yohani, lwavitaniwaka Marku.