-
Mintizro 11
1 Kutani vapostola ni vamakwezru lava afaka vali Yudeya vayingela lesvaku vhanu va matiko na vone vayamukeli zritu dzra Xikwembu Nkulukumba.
2 Kutani loko Petrosi atlhantukela le Yerusalema, lavaseketelaka kusoka vasungula kumusola,
3 vaku: “Wene unhingeni andlwini ya vavanuna lava kuka vangasokanga, uda na vone.”
4 Kutani Petrosi asungula kuvatlhamuxela ha xin’wexin’we, aku:
5 “Afa ndzrili kazri ndzrikhongota adoropeni dzra Yopa. Kutani loko ndzriweli vuzrongweni bza xivoniso, ndzrivi ni xivoniso laha ndzringavona xanchumu na xixika xa kufana ni kapulana ledzrikulu dzrixixiwaka hi le tilweni hi timponta ta mune ta dzrone, dzritlhasa ku mine.
6 Kutani loko ndzridzrilavisisa ha hombe, ndzrivoni svihazri sva mune wa milenge lesvinga kone amisaveni, ni svihazri sva nhova, svikokovi ni tinyanyana ta tilo.
7 Ndzritlhela ndzriyingela zritu na dzriku ku mine: ‘Petrosi, pfuka udlaya, uda!’
8 Kambe ndzriku: ‘Svingeyenceki lesvo, we Hosi, hikusa anon’wini wanga akungisama kunhingena nchumu wa kunyama kumbe wa kuka wungabasanga.’
9 Kambe zritu dzriyangula dzra vubizri na dzripfa tilweni, dzriku: ‘Lesvi Xikwembu Nkulukumba asvibasisiki ungasvihlaye lesvaku svinyamile.’
10 Kutani lesvi sviyenceki kuzrazru, hinkwasvu svigama svikhwelisiwa sviya tilweni.
11 Phela, nkama wolowo mfuzri, kuhumeleli vavanuna vazrazru, vatlhasa vayima amutini lowu afaka ndzritsrhama ku wone, na vazrumiwi kutatavonana na mine hi le Khezariya.
12 Kutani moya wundzribzela kufamba navu, na ndzringaganaganeki ni kutsrongo. Kambe ni vamakwezru lava va ntlhanu na mune na vone vafambi na mine, hiyanhingena andlwini ya wanuna lweyi angandzrivitana.
13 “Kutani ahidzrungulela lesvi angavonisa xisvone ntsrumi na yiyimi akaya kwakwe, yiku: ‘Zrumela vhanu le Yopa vayavitana Simoni lwavitaniwaka Petrosi.
14 Kutani atakubzela lesvi wene ni ndangu waku hinkwawu n’witakahuluka ha svone.’
15 Kambe loko ndzrisunguli kukanela, moya lowa kuxwenga wuvaxikela kufana ni lesvi sviviki xisvone ni le ku hine akusunguleni.
16 Kutani ndzridzrimuka zritu dzra Hosi, lesvi afaka yihamba yisvihlaya yiku: ‘Yohani kunene ababatisi hi mati, kambe n’wine n’witababatisiwa hi moya lowa kuxwenga.’
17 Kutani ke, loko Xikwembu Nkulukumba avanyiki nyiko yoleyo ya yin’we ni leyi anyikiki hine lavangapfumela ku Hosi Yesu Kriste, afa ndzrova mani mine lesvaku ndzringakota kusivela Xikwembu Nkulukumba?”
18 Loko vayingeli timhaka leto, vamiyela, vasungula kudzrumisa Xikwembu Nkulukumba, vaku: “Kasi Xikwembu Nkulukumba anyiki ni vhanu va matiko kutisola lokuyisaka vuton’wini!”
19 Kutani lava afaka vahangalasiwile hi nxanisa leyipfukiki hi mhaka ya Stefano vafambi vayatlhasa ni le Fenisya, Xipre ni le Antiyokiya, kambe afa vangabzeli mhunu zritu, handle ka vayuda ntsena.
20 Nambitanu, kuhumi vavanuna va kukazri amakazri ka vone lavahumaka Xipre ni le Sireni, vayiki le Antiyokiya vayakanela ni lavakanelaka xigrika, vazrezra madzrungula lamanene ya Hosi Yesu.
21 Nakone voko dzra Yehovha afa dzrili na vone, kutani vhanu vanyingi vapfumela, vandzruluka vadondzrisiwa va Hosi.
22 Kutani madzrungula yavu mayayingeliwa hi bandla ledzringa Yerusalema, kutani vazrumela Barnaba afamba ayatlhasa le Antiyokiya.
23 Loko atlhasa kone avona vumbilu bza Xikwembu Nkulukumba, anyonxa ava asungula kutsratsriya hinkwavu kuva vatiyisela ku Hosi hi mbilu ya kutiya;
24 hikuva Barnaba afa ali wanuna lwenene, wa kutala hi moya lowa kuxwenga ni lipfumelo. Kutani kuyengeteleka xitsrhungu xa kuhlawa ku Hosi.
25 Kutani asuka aya le Tarsu ayajuletela Sawlu.
26 Loko amukumile, abuya naye Antiyokiya. Kutani vaheta lembe hinkwadzru na vahlengeletana ni bandla, vadondzrisa xitsrhungu xa kuhlawa. Kutani kuvi le Antiyokiya lomu vadondzrisiwa vangasungula kone kuvitaniwa vakriste na svipfela ku Xikwembu Nkulukumba.
27 Kutani amasikwini lawo, le Antiyokiya kubuyi vaprofeta hi le Yerusalema.
28 Kutani kusekeleka mun’we wa vone, lwavitaniwaka Agabu, aprofeta hi moya lesvaku amisaveni hinkwayu afa kutava ni ndlala leyikulu, leyiviki kone ankameni wa Klawdu.
29 Kutani vadondzrisiwa vaboha lesvaku mun’wana ni mun’wana, hi la akotaka ha kone, atazrumela xipfunu ku vamakwezru lavatsrhamaka Yudeya.
30 Vavi vayenca tanu, vaxizrumela ku vakulu hi voko dzra Barnaba na Sawlu.