-
Mintizro 6
1 Kutani amasikwini wolawo, ankama lowu nhlayu ya vadondzrisiwa afaka yiya yiyandzra, vayuda lava afaka vakanela xigrika vasungula kukhala hi mhaka ya vayuda lava afaka vakanela xiheberu, hikusa mafelwa yavu afa manganyikiwi nchumu loko kuphakeliwa svakuda siku ni siku.
2 Kutani lava khume na vabizri vavitana xitsrhungu xa vadondzrisiwa xitsrhindzrekela, vaku: “Ahi svinene kuva hitsrhiketa zritu dzra Xikwembu Nkulukumba hiyaphakela svakuda amatafuleni.
3 Xilesvo, vamakwezru, tihlawulelani ntlhanu wa vavanuna na vabizri lava kuhlayiwaka lesvinene ha vone amakazri kwenu, lavataliki hi moya ni vutlhazri, lesvaku hivabeka akuva valavisela ntizro lowu;
4 kambe hine hitatama hikhinyela akuhambeni ka svikhongoto ni le vutizrelini bza kudondzrisa zritu.”
5 Kutani zritu ledzro dzriyamukeleka ku xitsrhungu hinkwaxu; lesvi, ke, vahlawuliki Stefano, wanuna wa kutala hi lipfumelo ni moya lowa kuxwenga, kun’we na Filipi, Prokoru, Nikanori, Timoni, Parmena na Nikolawu wa le Antiyokiya, lweyi afaka anhingenisiwi ku xiyuda.
6 Vavayisa amahlweni ka vapostola, kutani vavahambela xikhongoto vagama vavatlhanteka mavoko.
7 Kutani zritu dzra Xikwembu Nkulukumba dzriya mahlweni dzriyandzra, ni nhlayu ya vadondzrisiwa yiya yikula ngopfu svinene Yerusalema; kutani xitsrhungu lexikulu xa vaprista xisungula kulandzra lipfumelo ledzri.
8 Kutani Stefano, lesvi afaka atali hi kuzrandzreka ni ntamu, afa ayenca svihlamaliso lesvikulu ni mahlolana amakazri ka vhanu.
9 Kambe kuhumelela van’we vavanuna va Sinagoga dzra Lavantsrhunxiwiki, ni van’wana va kuhuma Sireni ni va le Alexandriya, ni va kuhuma le Silisya ni le Azya vasungula kuphikisana na Stefano.
10 Kambe avasvikotanga kutiyisela amahlweni ka vutlhazri ni moya lowu afaka avulavula ha wone.
11 Kutani vaxava vhanu axihundleni akuva vaku: “Himuyingeli na akanela minchumu ya kusandzra Moxe na Xikwembu Nkulukumba.”
12 Kutani vahlohlotela xitsrhungu, vakulu ni vatsrali, vamutela, vamukhoma hi nkanu vamuyisa amahlweni ka Huvo ya Xiyuda.
13 Kutani vahumexa timboni ta madzrimi, tiku: “Mhunu lweyi angatsrhiki kuhlayetela minchumu ya kusandzra mbangu lowu wa kuxwenga ni Nawu.
14 Hikuva himuyingeli na aku Yesu wa le Nazareta atahohlota mbangu lowu acinca ni mikhuva leyi Moxe ahisiyeliki yone.”
15 Kutani loko hinkwavu lava afaka vatsrhami Hubzeni ya Xiyuda vamulangutisisa, vavona vuso bzakwe na bzifana ni vuso bza ntsrumi.