BRX

1   Kutani ndzrivona dzrin’wana hlolana ledzrikulu ni dzra kuhlamalisa atilweni: ntlhanu wa tintsrumi na tibizri ni ntlhanu wa makhombo na mabizri, ya vugamu, hikusa mahlundzru ya Xikwembu Nkulukumba mahetiseka ha wone.

2   Kutani ndzrivona xa kutsrhama svanga lwandle dzra vhidru dzripatsriwiki ni ndzrilo, ni lavahluliki xihazri xa nhova ni xifaniso xa xone ni nhlayu ya vito dzra xone, na vayimi ahenhla ka lwandle dzra vhidru, na vatameli svitsrendzre sva Xikwembu Nkulukumba.

3   Kutani afa vayimbelela lisimu dzra Moxe, nandzra wa Xikwembu Nkulukumba, ni lisimu dzra Xihambana, vaku: “I mikulu nakone mahlamalisa mintizro yaku, Yehovha Xikwembu Nkulukumba, Lwewa Ntamu Hinkwawu. Tindlela taku tilulamile nakone i ta xihlayelamfuzri, Hosi ya hi la kungahelikiki.

4   I mani lweyi angatikikuchava, Yehovha, angaphatimisi vito dzraku, lesvi unga wene ntsena lwaxwengiki? Hikuva vhanu va tinhlonge hinkwatu vatabuya vakugandzrela, hikusa sviboho svaku lesvilulamiki svipaluxiwile.”

5   Antsrhaku ka lesvi, ndzrilangusa; kutani mbangu wa kuxwenga wa tende dzra vumboni wupfuliwa atilweni;

6   kutani le mbangwini wa kuxwenga kuhuma tintsrumi leta ntlhanu na tibizri letinga ni makhombo laya ntlhanu na mabizri, na tiyambali linyu dzra ntlhohe ni dzra kuphatima titlhela tititsrimba svifuva hi mabandhi ya gole.

7   Kutani xin’we xa svivumbiwa sva mune lesvihanyaka xinyika tintsrumi leta ntlhanu na tibizri svibza sva ntlhanu na svibizri sva gole, lesvi afaka svitali hi mahlundzru ya Xikwembu Nkulukumba lwahanyaka hi masiku ni masiku.

8   Kutani mbangu wa kuxwenga wutala hi musi lowupfelaka akuphatimeni ka Xikwembu Nkulukumba ni le ntan’wini wakwe; kutani kungavi na mhunu lwakotaka kunhingena ambangwini lowa kuxwenga na kungasihetiseka makhombo laya ntlhanu na mabizri ya tintsrumi leta ntlhanu na tibizri.