BRX

1   Kutani kuvoneka hlolana ledzrikulu atilweni: Mun’we wansati afa ayambali dambu, nakone hansi ka minkondzro yakwe afa ku ni hweti, na nhlokweni yakwe ku ni ngiyana ya khume dzra tinyeleti na tibizri,

2   na hala mfuzri akhonsile. Kutani afa atlomba hi kulun’wa ni kutwa kuvavisa ka kuphuluka.

3   Kutlhela kuvoneka hlolana dzrin’wana atilweni. Kuhumelela lesvaku afa ku ni dragona ledzrikulu dzra libungu, dzra ntlhanu wa tinhloko na tibizri ni khume dzra timhondzro na tinhlokweni ta dzrone ku ni ntlhanu wa tingiyana na tibizri;

4   kutani nkila wa dzrone wukoka xiyenge xa vuzrazru xa tinyeleti ta le tilweni, wuticukumetela amisaveni. Kutani dragona dzrikutsetsezrele amahlweni ka wansati lweyi afaka ajula kuphuluka, lesvaku loko aphuluka, dzritakota kuda n’wana wakwe!

5   Kutani aphuluka n’wana wa jaha, lweyi atakabzisa matiko hinkwawu hi nhonga ya nsimbi. Kutani n’wanakwe awutliwa ayisiwa ku Xikwembu Nkulukumba ni le xiluvelweni xakwe.

6   Kutani lweyo wansati atsrutsrumela ahuleni, lomu anga ni mbangu lowululamisiwiki ha Xikwembu Nkulukumba ni lomu afaka vatamuphamela kone kudzringana khume dzra madzana na madzana mabizri ni ntlhanu wa mukume na dzrin’we wa masiku.

7   Kutani kupfuka yimpi atilweni: Mikayele ni tintsrumi takwe valwa na dragona, kutani dragona ni tintsrumi ta dzrone valwa,

8   kambe dragona ni tintsrumi takwe vahluliwa, kuva kungahakumiwi mbangu wa kuva vangahatsrhama atilweni.

9   Kutani dzricukumetisiwa xisvosvo dragona ledzrikulu, yinga nyoka ya le kusunguleni, leyivitaniwaka Diyavulosi na Sathana, lweyi akanganyisaka misava hinkwayu. Dzricukumeteliwa hansi amisaveni, ni tintsrumi ticukumeteliwa hansi kun’we na dzrone.

10   Kutani ndzriyingela zritu ledzrikulu atilweni dzriku: “Svosvi kutlhasi huluku ni ntamu ni Mfumu wa Xikwembu Nkulukumba wezru ni ntamu wa Kriste wakwe, hikusa mulumbeti wa vamakwezru acukumeteliwi ahansi, lweyi avalumbetaka nhlikanhi ni vusiku amahlweni ka Xikwembu Nkulukumba wezru!

11   Kutani vamuhlulile hi ngati ya Xihambana ni hi kola ka zritu dzra vumboni bzavu, nakone avazrandzranga vutomi bzavu nambiloko valavisani ni lifu.

12   Xilesvo, nyonxani, n’wine matilo na n’wine n’witsrhamaka ku wone! Yowee n’wine misava ni lwandle, hikusa Diyavulosi an’wixikelile, na ahlundzruki ngopfu svinene, hi kutiva lesvaku a ni nkama wa kugoma.”

13   Kutani loko dragona dzrivoni lesvaku dzricukumeteliwi ahansi amisaveni, dzrihlongolisa wansati lweyi angaphuluka n’wana wa jaha.

14   Kambe lweyo wansati anyikiwa timpapa tibizri ta gama ledzrikulu, akuva akota kuhaha aya le huleni ambangwini wakwe, lomu afanelaka kudisiwa kone kudzringana nkama ni minkama ni hamfu ya nkama na ali kule ni lomu nyoka yinga kone.

15   Kutani nyoka yikampfula mati ya kufana ni nambu anon’wini wa yone antsrhaku ka lweyo wansati, kuyencela lesvaku akokiwa hi nambu, afa.

16   Kambe misava mibuya milamulela lweyo wansati, kutani misava mipfula nomu wa yone mimita nambu lowu dragona dzriwukampfuliki hi nomu wa dzrone.

17   Kutani dragona dzrihlundzrukela lweyo wansati dzriva dzrisuka dzrifamba dzriyalwa ni lavasaliki va vana vakwe, lavabekisaka svileleto sva Xikwembu Nkulukumba ni lavanga ni ntizro wa kubeka vumboni bza Yesu.