BRX

1   Kutani, axineneni xa Lweyi atsrhamiki axiluvelweni, ndzrivoni mukhwepa lowutsraliwiki amatlhelweni ha mabizri, na wupfaliwile, wulemiwa hi ntlhanu wa svinameko na svibizri.

2   Kutani ndzrivona ntsrumi yin’we leya ntamu na yibandlukana hi zritu ledzrikulu, yiku: “Hi mani lweyi afaneliwaka hi kupfula mukhwepa lowu, akwamula ni svinameko sva wone?”

3   Kambe akuvanga na mhunu atilweni kumbe la hansi amisaveni lweyi afaka akota kupfula mukhwepa kumbe kulangusa andzreni ka wone.

4   Kutani ndzridzrila ngopfu svinene hilesvi afaka kunge na mhunu ni mun’we lweyi afaka afaneliwa hi kupfula mukhwepa kumbe kuvona lesvinga ndzreni ka wone.

5   Kambe mun’we wa vakulu aku ku mine: “Ungadzrile. Lavisa! Ndzrawu ya lixaka dzra Yuda, limitsru dzra Davhida, yihlulile, akuva yipfula mukhwepa ni svinameko sva wone sva ntlhanu na svibizri.”

6   Kutani ndzrivona na makazri ka xiluvelo ni le ka mune wa svivumbiwa lesvihanyaka, ni le makazri ka vakulu, kuyimi xihambana lexi afaka xivoneka ingiki xitlhabziwile xifa, na xi ni ntlhanu wa timhondzro na tibizri ni ntlhanu wa mahlo na mabizri, nakone mahlo ya kone i ntlhanu na mibizri wa mimoya ya Xikwembu Nkulukumba lemizrumeliwiki amisaveni hinkwayu.

7   Kutani xitekela kutsrhindzrekela kusuhinyana xiyamukela mukhwepa avokweni dzra xinene dzra Lweyi atsrhamiki axiluvelweni.

8   Loko xiyamukeli mukhwepa lowuyani, svivumbiwa sva mune lesvihanyaka ni vakulu va makume mabizri na mune vawela hansi amahlweni ka Xihambana, kutani mun’wana ni mun’wana wa vone afa a ni xitsrendzre ni svibza sva gole lesvi afaka svitali hi muzri wa kunun’hwela. (Muzri wa kunun’hwela i svikhongoto sva vhanu va Xikwembu Nkulukumba lava kuxwenga.)

9   Kutani vayimbelela lisimu ledzrimpsha, vaku: “Svakufanela kuyamukela mukhwepa ni kupfula svinameko sva wone, hikuva utlhabziwile ufa nakone hi ngati yaku uxaveli Xikwembu Nkulukumba vhanu lavahumaka ku tinxaka hinkwatu, ni tindzrimi hinkwatu, ni svitsrhungu hinkwasvu, ni matiko hinkwawu,

10   nakone uvayenci tihosi ni vaprista va Xikwembu Nkulukumba wezru, kutani vatafuma ahenhla ka misava.”

11   Kutiloko ndzrilangusa, ndzroyingela pongwe dzra mazritu ya tintsrumi ta kutala amatlhelweni ka xiluvelo ni svivumbiwa lesvihanyaka ni vakulu, nakone nhlayu ya tone afa yili madzanadzana ya madzanadzana ni makumekume ya madzana.

12   Kutani afa tihlaya lesvi hi zritu ledzrikulu: “Xihambana lexingatlhabziwa xifa xafaneliwa hi kunyikiwa ntamu, ni vukosi, ni vutlhazri, ni vusvikoti, ni xihluwa, ni lidzrumu, ni kukhensiwa.”

13   Kutani ndzriyingela svivumbiwa hinkwasvu le tilweni ni le misaveni, ni le hansi ka misava ni le lwandle, ni minchumu hinkwayu leminga ku svone, sviku: “Kukhensiwa ni xichavu, ni lidzrumu, ni ntamu asviyisiwe ku Lweyi atsrhamiki axiluvelweni ni le ku Xihambana hi masiku ni masiku!”

14   Kutani svivumbiwa lesvihanyaka afa sviku: “Amen!” Kutani vakulu vawela hansi vagandzrela.