BRX

1   Antsrhaku ka lesvi, ndzriti ndzrilangusa, ndzrovona xipfalu xekemphaa atilweni! Kutani zritu dzra kusungula ledzri ndzringadzriyingela na dzrikanela na mine afa dzrifana ni mpfumawulu wa xipalapala, dzriku: “Tlhantukela halenu, ndzritakukomba lesvifanelaka kuyenceka.”

2   Kolahu, ndzritekiwa hi moya. Kutani kukumeka lesvaku afa ku ni xiluvelo atilweni, ni lweyi atsrhamisiki axiluvelweni!

3   Lweyi atsrhamisiki axiluvelweni afa afana ni zribze dzra yaspi ni zribze dzra sardu, nakone hinkwaku amatlhelweni ka xiluvelo afa ku ni nkwangulatilo wa kufana ni emeralda.

4   Hinkwaku amatlhelweni ka xiluvelo afa ku ni makume mabizri ni mune wa sviluvelo, nakone asviluvelweni lesvi ndzrivoni na kutsrhami makume mabizri ni mune wa vakulu na vayambali sviyambalu sva ntlhohe, na tinhlokweni tavu va ni tingiyana ta gole.

5   Afa kuhuma kuhatima ka tilo, ni mazritu, ni kudzruma ka tilo axiluvelweni; nakone afa ku ni ntlhanu wa mimotsre na mibizri ya ndzrilo lemipfuzraka amahlweni ka xiluvelo, minga ntlhanu wa mimoya na mibizri ya Xikwembu Nkulukumba.

6   Kutani amahlweni ka xiluvelo afa ku ni xa kutsrhama svanga lwandle dzra vhidru, kufana krixtali. Kutani amakazri ka xiluvelo ni le matlhelweni ka xiluvelo afa ku ni mune wa svivumbiwa lesvihanyaka, lesvi afaka svitali hi mahlo amahlweni ni le ntsrhaku.

7   Kutani xivumbiwa xa kusungula lexihanyaka afa xifana ni ndzrawu; kutani xivumbiwa xa vubizri lexihanyaka afa xifana ni xinkuzana; kutani xivumbiwa xa vuzrazru lexihanyaka afa xi ni vuso bza kufana ni bza mhunu; kutani xivumbiwa xa vumune lexihanyaka afa xifana ni gama ledzrihahaka.

8   Kutani svivumbiwa lesvihanyaka sva mune, xin’wana ni xin’wana xa svone afa xi ni ntlhanu wa timpapa na yin’we; nakone afa svitali hi mahlo hinkwaku amatlhelweni ni le ndzreni. Kutani nhlikanhi ni vusiku svihlaya na svingayimi, sviku: “Axwengile, axwengile, axwengile Yehovha Xikwembu Nkulukumba, Lwewa Ntamu Hinkwawu, lweyi afaka ali kone, lweyi anga kone, ni lweyi ataka!”

9   Kutani ankama wini na wini lowu svivumbiwa lesvihanyaka sviyisaka lidzrumu ni xihluwa, ni svikhenso, ku Lweyi atsrhamiki axiluvelweni, anga Lweyi ahanyaka hi masiku ni masiku,

10   vakulu va makume mabizri na mune vawela hansi amahlweni ka Lweyi atsrhamiki axiluvelweni, vagandzrela Lweyi ahanyaka hi masiku ni masiku, vava vacukumetela tingiyana tavu amahlweni ka xiluvelo xakwe, vaku:

11   “Svakufanela, Yehovha, Xikwembu Nkulukumba wezru, kunyikiwa lidzrumu, ni xihluwa, ni ntamu, hikusa utumbuluxi minchumu hinkwayu, nakone mivi kone mitlhela mitumbuluxiwa hi kola ka kuzrandzra kwaku.”