BRX

1   Xilesvo, lesvi hinga ni svidumbiso lesvi, vazrandzriwa, ahitibasiseni ku minchumu hinkwayu leminyamisaka nyama ni moya, hihetisekisa kuxwenga hi kuchava Xikwembu Nkulukumba.

2   Hitsrhikani hinhingena timbilwini tenu. Ahingiyencela mhunu vubihi, ahingikanganyisa mhunu, nakone ahingidela mhunu nchumu.

3   Lesvi andzrihlayeli kun’wisola. Hikusa ndzrasami ndzrihlaya lesvaku n’wine n’wile timbilwini tezru nakone n’witafa na hine n’witlhela n’wihanya na hine.

4   Ndzrikanela na n’wine na ndzringatilumalumi ni kutsrongo. Ndzritibuma svinene ha n’wine. Ndzritiyisiwa ngopfu nhlana ha n’wine; akuxanisekeni kwezru hinkwaku, ndzritala hi kutsrhava lokutlhelaka kuhalakela.

5   Hikusa, loko hitlhasi Masedonya, ahikumanga kuwisa ni kutsrongo, kambe hikamekile hi tindlela hinkwatu; kukumeka lesvaku le handle i tiyimpi, le ndzreni i kuchava.

6   Kambe Xikwembu Nkulukumba, lwachavelelaka lavaheliki ntamu, ahichavelelile hi kuhumelela ka Tito;

7   kunge ntsena hi kuhumelela kwakwe kambe ni hi mazritu ya kutiyisa nhlana lawa n’wimuchaveleliki ha wone, hikusa ahidzrungulelile lesvaku n’windzrixuva svinene, ni lesvaku n’wivaviseka ngopfu nakone n’wizron’weka ngopfu ha mine. Xisvosvo, ndzrinyonxisisi ngopfu.

8   Hikusa, nambiloko ndzrin’witsrhovi timbilu hi papela dzranga, andzrititwi nandzru. Akusunguleni ndzrititwi nandzru hi kuvona lesvaku papela ledzro dzrin’witsrhovi timbilu, nambilesvi svingatekangakiki nkama wa kuleha.

9   Kambe svosvi ndzranyonxa, na ndzringanyonxi hilesvi n’witsrhovekiki timbilu ntsena, kambe hilesvi n’wikotiki n’witisola hi kutwa timbilu kuvavisa. Hikusa n’wivaviseki hi mavavisekela ya mhunu lwachaka Xikwembu Nkulukumba, xilesvo an’wigamanga hi kukhunguvanyisiwa ha hine.

10   Hikusa kuvaviseka hi mavavisekela ya mhunu lwachavaka Xikwembu Nkulukumba kuyenca mhunu atisola, akuma kuhuluka, ava asala na angatitwi nandzru ha nchumu; kambe kuvaviseka hi mavavisekela ya misava kupsala lifu.

11   Vonani ha bzenu lesvaku kuvaviseka kwenu hi mavavisekela ya mhunu lwachavaka Xikwembu Nkulukumba kun’wiyenci yini! N’wizron’wekile, ina, n’witibasisi nandzru, ina, n’winyenyentsekile hi sva kubiha, ina, n’wichavile, ina, n’winaveli ngopfu, ina, n’wihisekile, ina n’wilulamisi lesvihoxekiki! N’witikombisi hi tindlela hinkwatu lesvaku n’wibasile amhakeni leyi.

12   Nambiloko ndzrin’witsralelile, andzriyencelanga lweyi ahoxiki kumbe lweyi ahoxeliwiki, kambe ndzriyenceli akuva svitikomba amakazri kwenu lesvaku n’wazron’weka ha hine amahlweni ka Xikwembu Nkulukumba.

13   Hi mhaka leyo, hichavelelekile. Kambe handle ka kuchaveleleka kwezru, hitlheli hinyonxisisa hi kuvona Tito na anyonxile, hilesvi n’wine hinkwenu n’wingamuzrulisa mbilu.

14   Hikusa loko ndzritibumi ha n’wine ku yene, andzridanisiwanga; kambe svanga hesvi hinkwasvu lesvi hin’wibzeliki svone svitiyiki, ni ko kutibuma kwezru amahlweni ka Tito kutiyisiwile.

15   Nangweso, lesvi an’wizrandzrisaka xisvone asvihlayeki loko adzrimuka lesvi n’wimuyingisetisiki xisvone, lesvi n’wimuhoyozelisiki xisvone hi kuchava ni kuzruzrumela.

16   Ndzranyonxa hilesvi ndzringan’widumbaka aminchun’wini hinkwayu.