-
2 Vakorinte 6
1 Kutani ke, lesvi hitizrisanaka na Xikwembu Nkulukumba, hin’witsratsriya lesvaku n’wingayamukeli vumbilu bza Xikwembu Nkulukumba n’wigama n’witlanga ha bzone.
2 Hikusa ali: “Ndzrikuyingelile hi nkama lowunene, nakone ndzrikupfunile hi siku dzra kuhuluxiwa.” Phela svosvi hi wone nkama lowunene wa kone. Phela svosvi hi dzro siku dzra kuhuluxiwa.
3 Ahiyenci nchumu ni wutsrongo wa kukhunguvanyisa mhunu, akuva kungakumiwi xisolo avutizrelini bzezru;
4 kambe aminchun’wini hinkwayu hativonekisa lesvaku hi vatizreli va Xikwembu Nkulukumba, hi kutiyisela aminchun’wini ya kutala, akuxanisekeni, avusiwaneni, akukazratekeni,
5 akubiweni, akukhomiweni, akupfukeliweni hi xitsrhungu, amintizrweni ya kusindzrisiwa, akuheleliweni hi vuzrongo, akupfumaleni ka svakuda;
6 hi kuhanya vutomi bza kubasa, hi vutivi, hi kulehisa mbilu, hi vunene, hi moya wa kuxwenga, hi lizrandzru dzra xihlayelamfuzri,
7 hi kukanela xihlayelamfuzri, hi ntamu wa Xikwembu Nkulukumba; hi matlhazri ya vululami axineneni ni le ximatsrini,
8 hi kudzrumisiwa ni kutsreketsreliwa, hi kuzrukiwa ni kukhensiwa. Hinkontiwa vakanganyisi kasi hikanela xihlayelamfuzri,
9 va kukala vangatibziwi kasi hatibziwa, lava vafaka kasi hi hine lava, hahanya! Svanga lavakhatisiwaka na kasi ahidlayiwi,
10 svanga lavaxukuvalaka kasi hanyonxa, svanga svisiwana kasi hiyenca vanyingi vava svipfundzri, svanga lavangeke na nchumu kasi hi ni hinkwasvu.
11 Hipfuli nomu hin’wibzela xa mbilu, n’wine vakorinte, nakone hin’wipfuleli mbilu yikumphaa!
12 Hin’wizrandzri na hingatifeleli kambe n’wine n’wihizrandzri na n’witifelela.
13 Kutani, akuva n’wihihakela (ndzrivulavula na n’wine svanga vananga), na n’wine pfulani timbilu tikumphaa!
14 N’wingasindzriseleni kuzrwala mpinga wun’we ni lavangapfumelikiki. Hikusa xana vululami ni vubihi bziyelana kwini? Kumbe xana livaningo ni munyama svi ni vuxaka bzini?
15 Nangweso, xana Kriste na Beliyale vatwanana kwini? Kumbe xana mupfumeli ni lwangeke mupfumeli vafana kwini?
16 Nakone xana tempele dzra Xikwembu Nkulukumba dzrifambelana kwini ni svikwembu sva svivatliwa? Hikusa hine hi tempele dzra Xikwembu Nkulukumba lwahanyaka; svanga hesvi Xikwembu Nkulukumba atiki: “Ndzritatsrhama makazri kwavu, ndzrifambafamba makazri kwavu, ndzriva Xikwembu Nkulukumba wavu, kutani vone vatava vhanu vanga.”
17 “‘Xilesvo, humani ku vone, n’witihambanisa navu’, kuhlaya Yehovha, ‘nakone n’wingahakhumbeni nchumu ni wa wun’we lowunyamiki”; “‘kutani ndzritan’wiyamukela.’”
18 “‘Kutani mine ndzritava tatana wenu, na n’wine n’witava vananga va xinuna ni va xisati’, kuhlaya Yehovha, wa ntamu hinkwawu.”