BRX

1   Xana hotlhela hi sungula kutiyimelela? Kumbe, kufana ni vambeni, hivilela mapapela ya kuhiyimelela ku n’wine kumbe na masukela kwenu?

2   Hi n’wine hi ntshima n’winga papela dzrezru, ledzritsraliwiki atimbilwini tezru, ledzritiviwaka dzritlhela dzridondzriwa hi vhanu hinkwavu.

3   Hikusa svatikomba lesvaku n’wine n’wi papela dzra Kriste ledzritsraliwiki hi hine svanga vatizreli, ledzritsraliwiki hi moya wa Xikwembu Nkulukumba lwahanyaka, kunge hi ntinta; ku sviphephezrele sva kuhambiwa hi timbilu ta nyama, kunge ku sviphephezrele sva kuhambiwa hi mazribze.

4   Kutani hi ni kudumba loku amahlweni ka Xikwembu Nkulukumba ha Kriste.

5   Ahi lesvaku hine ha bzezru hokota kuyenca nchumu akuva hingahlaya lesvaku xa kukazri xipfa ku hine, kambe vusvikoti bzezru bzipfa ku Xikwembu Nkulukumba,

6   lwahiyenciki hifaneleka kutizra svanga vatizreli va xipfumelelanu leximpsha, kunge xa milawu ya kutsraliwa, kambe xa moya; hikusa milawu ya kutsraliwa yitisa lifu, kambe moya wunyika vutomi.

7   Kutani, loko vutizreli lebzitisaka lifu hi milawu lemingatsraliwa amazribzeni bzibuyi hi kuphatima lokukulu, lakakuva vana va Yisrayele vangatiyi ni kulangusa vuso bza Moxe hi mhaka ya kuphatima ka vuso bzakwe, kunga kuphatima loku afaka kutahelisiwa,

8   i yini xingayencaka lesvaku vutizreli bza moya bzingavi na kuphatima lokutlulisaka?

9   Hikusa loko vutizreli lebzitisaka xikhatiso afa bziphatima, vutizreli lebzibasisaka milandzru bziphatima hi ndlela leyitlulisaka!

10   Hikusa, nakunene, nhambi nchumu lowu afaka wuphatima ankameni lowuya awahaphatimi, hi mhaka ya kuphatima lokuwusiyaka kule svinene.

11   Hikusa loko lesvi afaka svitahelisiwa svinhingenisiwi hi kuphatima, kuphatima ka lesvitsrhamaka hi masiku afa kutava lokukulu hi ndlela leyitlulisaka!

12   Lesvi hinga ni kudumba koloko, hivulavula na hingatilumalumi,

13   nakone ahifani na Moxe lweyi afaka ahamba atipfala vuso hi ntuzru akuva vana va Yisrayele vangasvikoti kulangutisa vugamu bza lesvi afaka svitagama hi kuhelisiwa.

14   Kambe tinhloko tavu titiyelile. Hikusa ni namunhla ntuzru wutsrhama na wungasukanga loko kudondzriwa xipfumelelanu xa khale hi zritu dzra le henhla, hikuva wosusiwa ntsena ha Kriste.

15   Kunene, ni namunhla, loko vadondzra matsralwa ya Moxe hi zritu dzra le henhla, kutsrhama ntuzru atimbilwini tavu.

16   Kambe loko mhunu andzruluka aya ku Yehovha, ntuzru wasuka.

17   Hikuva Yehovha i Moya, kutani lomu kunga ni moya wa Yehovha ku ni ntsrhunxeko.

18   Kutani hinkwezru, lesvi hifunukuliwiki vuso, hikombekisa kuphatima ka Yehovha kufana ni svivonivoni, nakone hindzrulutiwa hifana na yene, hisuka ku maphatimela ya kukazri hiya ku man’wana, hi la sviyenciwaka ha kone ha Yehovha, lwanga Moya.