BRX

1   Ledzri i khambi dzra vuzrazru na ndzrin’wiyendzrela. Mhaka yin’wana ni yin’wana yifanela kutiyisiwa hi vumboni bza timboni tibizri kumbe tizrazru.”

2   Hi la ndzrihlayiki ha kone na ndzrili na n’wine ku liyendzro dzra vubizri, nambilesvi ndzringeke na n’wine svosvi, ndzrimamulela lavangasama vadoha, ni lavan’wana hinkwavu, ndzriku: Loko ndzrochuka ndzritlhela ndzribuya, ndzringatitsretsrelela mhunu,

3   hikusa n’wijula vumboni bza lesvaku Kriste kunene akanela ha mine, nakuve ku n’wine ahi mhunu wa kupfumala ntamu, kambe i wa ntamu amakazri kwenu.

4   Hikusa, kunene, agongondzreliwi amhandzreni na ange na ntamu, kambe awahanya hi ntamu wa Xikwembu Nkulukumba. Hikusa, na hine hipfumala ntamu na yene, kambe hitahanya kun’we na yene hi ntamu wa Xikwembu Nkulukumba lowutisiwaka ku n’wine.

5   Tikambisisani n’wivona lesvaku kumbe n’wehe ndzreni ka lipfumelo kumbe ihina; tikambelani. Kumbe n’woka n’wingasvivoni lesvaku Yesu Kriste a na n’wine kee? Ahanti loko n’wibi hansi.

6   Kambe hadumba lesvaku n’witasvivona lesvaku hine ahibanga hansi.

7   Kutani lexi hixikombelaka ku Xikwembu Nkulukumba i kuva n’wingayenci nchumu wa kubiha. Lesvo ahiyenceli kuva svihamba ingiki hi vanene, kambe akuva n’wiyenca sva kuxonga, nambiloko svihamba ingiki hine ahi vanene.

8   Hikusa hingeyenci nchumu kulwa ni xihlayelamfuzri, kambe ntsena kuseketela xihlayelamfuzri.

9   Hanyonxa loko hiyingela lesvaku hipfumala ntamu kambe n’wine n’wi ni ntamu. Kambe ni svosvi hin’wikombelela lesvi: lesvaku n’wipfumela kululamisiwa.

10   Hi mhaka yoleyo ndzritsralaka minchumu leyi na ndzrili kule, kuyencela lesvaku loko ndzrili na n’wine, ndzringan’wikazrateli loko ndzritizrisa ntamu lowu Hosi yindzrinyikiki wone, wa kuyaka, kunge wa kuhohlota.

11   Hi vugamu, vamakwezru, nyonxani; pfumelani kululamisiwa; tiyani nhlana; longolokani hi miyanakanyu; hanyani hi kuzrula. Kutani Xikwembu Nkulukumba wa lizrandzru ni wa kuzrula atava na n’wine.

12   Losanani hi kun’qutana ka kuxwenga.

13   Hinkwavu vhanu va Xikwembu Nkulukumba lava kuxwenga van’widzrungula.

14   Vumbilu bza Hosi Yesu Kriste ni lizrandzru dzra Xikwembu Nkulukumba, ni kunyikiwa ka moya wa kuxwenga, asvive na n’wine hinkwenu!