BRX

1   Vazrandzriwa, n’wingakholweni mun’wana ni mun’wana lwahleveliwaka hi moya, kambe dzringani vhanu va kone lavahleveliwaka hi moya akuva n’witavona lesvaku vahuma ku Xikwembu Nkulukumba kumbe ihina, hikusa kuhumeleli vaprofeta vanyingi va madzrimi amisaveni.

2   N’witasvitivisa xilesvi loko mhunu lwahleveliwaka hi moya ahuma ku Xikwembu Nkulukumba: Mun’wana ni mun’wana lwahleveliwaka hi moya lweyi apfumelaka lesvaku Yesu Kriste atile hi nyama, lweyo ahuma ku Xikwembu Nkulukumba,

3   kambe mun’wana ni mun’wana lwahleveliwaka hi moya lweyi angapfumelikiki Yesu, lweyo angahumi ku Xikwembu Nkulukumba. Nakone lweyo hi lwahumaka ku nala wa Kriste, lweyi n’wisviyingeliki lesvaku awata, mfuzri svosvi kutani a kone laha misaveni.

4   Vananga, n’wine n’wihuma ku Xikwembu Nkulukumba, nakone n’wivahlulile vhanu lavo, hikusa lweyi anga kun’we na n’wine i nkulu kutlula lweyi anga kun’we ni misava.

5   Vone vahuma la misaveni; hi svolesvo vakanelaka lesvipfelaka misaveni kutani misava mavayingiseta.

6   Hine hihuma ku Xikwembu Nkulukumba Lweyi ativaka Xikwembu Nkulukumba awahiyingiseta; lweyi angahumikiki ku Xikwembu Nkulukumba angahiyingiseti. Himutivisa xilesvo lwahleveliwaka hi moya wa xihlayelamfuzri ni lwahleveliwaka hi moya wa madzrimi.

7   Vazrandzriwa, ahitsrhameni hikuzrandzranana, hikusa lizrandzru dzripfa ku Xikwembu Nkulukumba, kutani mani na mani lwakombisaka lizrandzru abelekiwi hi Xikwembu Nkulukumba nakone awamutiva Xikwembu Nkulukumba.

8   Lweyi angakombisikiki lizrandzru, angasimutiva Xikwembu Nkulukumba, hikusa Xikwembu Nkulukumba i lizrandzru.

9   Lizrandzru dzra Xikwembu Nkulukumba dzrikombekisiwi hi ndlela leyi ku hine: Hi lesvaku Xikwembu Nkulukumba azrumeli N’wanakwe wa kubelekiwa vusvakwe amisaveni, akuva hikuma vutomi hi kola kwakwe.

10   Lizrandzru dzritikombisisi xilesvi: Ahi svone lesvaku hi hine hingazrandzra Xikwembu Nkulukumba, kambe hi yene angahizrandzra ava azrumela N’wanakwe lesvaku ava xitlhavelo xa kukombela ha xone kudzrivaleliwa svidoho svezru.

11   Vazrandzriwa, lesvi Xikwembu Nkulukumba ahizrandzrisiki xilesvi, na hine hifanela kuzrandzranana.

12   Anga kone lweyi angasama avona Xikwembu Nkulukumba. Loko hitsrhama hikuzrandzranana, Xikwembu Nkulukumba atsrhama kun’we na hine nakone lizrandzru dzrakwe dzriwupfile hi matlhelo hinkwawu amakazri kwezru.

13   Hisvitivisa xilesvi lesvaku hitsrhama kun’we naye ni lesvaku na yene atsrhama kun’we na hine: Hilesvi ahinyikiki moya wakwe.

14   Nakone hisvivonile hiva hibeka vumboni bza lesvaku Tatana azrumeli N’wanakwe svanga Muhuluxi wa misava.

15   Mani na mani lwapfumelaka lesvaku Yesu Kriste i N’wana wa Xikwembu Nkulukumba, Xikwembu Nkulukumba atsrhama kun’we naye kutani na yene atsrhama kun’we na Xikwembu Nkulukumba.

16   Nakone hitlhasi la kutani hitivaka hiva hikholwa lizrandzru ledzri Xikwembu Nkulukumba anga nadzru ha hine. Xikwembu Nkulukumba i lizrandzru, kutani lweyi atsrhamaka alizrandzrwini atsrhama kun’we na Xikwembu Nkulukumba, na yene Xikwembu Nkulukumba atsrhama kun’we naye.

17   Lizrandzru dzriwupfisi xilesvo hi matlhelo hinkwawu amakazri kwezru, akuva hikota kuvulavula na hingatilumalumi asikwini dzra yavanyiso, hikusa lesvi yene anga xisvone, hi svolesvo na hine hinga xisvone amisaveni leyi.

18   Aku na kuchava alizrandzrwini, kambe lizrandzru ledzriwupfiki hi matlhelo hinkwawu dzrihlongola kuchava, hikusa kuchava kuyelana ni xikhatiso. Nakone lweyi achavaka angasiwupfa hi matlhelo hinkwawu alizrandzrwini.

19   Lexi xihiyencaka hizrandzra hilesvi Xikwembu Nkulukumba azrangiki ahizrandzra.

20   Loko mhunu aku: “Ndzramuzrandzra Xikwembu Nkulukumba”, nakuve avenga makwavu, i muhembi. Hikuva lweyi angazrandzrikiki makwavu, lweyi amuvonaka, angesvikoti kuzrandzra Xikwembu Nkulukumba, lweyi angikisama amuvona.

21   Nakone hi yene lwangahinyika xileleto lexi, xa lesvaku lweyi azrandzraka Xikwembu Nkulukumba afanela kuzrandzra ni makwavu.