-
1 Yohani 3
1 Vonani lesvaku lizrandzru ledzri Tatana ahikombiki dzrone i dzrikulu sva kunhasi! Hitlhasi la hivitaniwaka vana va Xikwembu Nkulukumba; kutani hi vana vakwe. Hi xivangelo lexi, misava amihitivi, hikusa amimutivanga.
2 Vazrandzriwa, svosvi hi vana va Xikwembu Nkulukumba, kambe kutatlhasa svosvi asvisikombekisiwa lesvi hitakava svone. Hasvitiva lesvaku loko akombekisiwa, hitafana na yene, hikusa hitamuvonisa xilesvi anga xisvone.
3 Kutani mani na mani lwanga ni kudumba loku mayelanu na yene awatibasisa svanga hesvi na yene abasiki.
4 Mani na mani lwayencetelaka xidoho atlula nawu; kutani xidoho i kutlula ka nawu.
5 Nakone n’wine n’wasvitiva lesvaku yene akombekisiwile akuva atasusa svidoho svezru, nakone aku na xidoho ku yene.
6 Mani na mani lwatsrhamaka kun’we na yene angadoheteli; mani na mani lwadohetelaka angasami amuvona, ni kumutiva angamutivi.
7 Vananga, n’wingakanganyisiweni hi mhunu; lweyi ayencaka lesva kululama alulamile, svanga hesvi na yene alulamiki.
8 Lweyi ayencetelaka xidoho ahuma ku Diyavulosi, hikusa Diyavulosi adoha kusukela akusunguleni. Hi svosvo sviyenciki N’wana wa Xikwembu Nkulukumba akombekisiwa, lesvaku atatahelisa mintizro ya Diyavulosi.
9 Mani na mani lwabelekiwiki hi Xikwembu Nkulukumba angayenceteli xidoho, hikusa mbewu ya Xikwembu Nkulukumba yitsrhama ku yene, kutani angesvikoti kutsrhama hi kudoha, hikusa abelekiwi hi Xikwembu Nkulukumba.
10 Vana va Xikwembu Nkulukumba ni vana va Diyavulosi vatikombekisa hi lesvi: Mani na mani lwangayencikiki lesva kululama, angahumi ku Xikwembu Nkulukumba, nambi lweyi angamuzrandzrikiki makwavu.
11 Hikusa ledzri hi dzrone zritu ledzri n’widzriyingeliki kusukela akusunguleni, lesvaku hifanela kuzrandzranana;
12 hingafani na Kayini, lweyi ahumiki ku Lwemfani kutani adlaya makwavu. Nakone amudlayeli yini kee? Hilesvi mintizro yakwe afaka mibihile, kasi leya makwavu afa milulamile.
13 Vamakwezru, n’wingahlamaleni hilesvi misava min’wivengaka.
14 Hasvitiva lesvaku hihumi akufeni hinhingena avuton’wini, hikusa havazrandzra vamakwezru. Lweyi angakombisikiki lizrandzru atsrhama akufeni.
15 Mani na mani lwavengaka makwavu i mudlayi, kutani n’wasvitiva lesvaku aku na ni mun’we mudlayi lweyi vutomi lebzingahelikiki bzitsrhamaka ku yene.
16 Hitlhasi laha hitivaka lizrandzru hi kola ka lesvi: hilesvi yene angahifela. Kutani na hine hiboheka kufela vamakwezru.
17 Kambe loko mani na mani lwanga ni minchumu ya misava leyi ya kutihanyisa ha yone avona makwavu na apfumala, kambe ayala kumutwela vuzrombe, xana lizrandzru dzra Xikwembu Nkulukumba dzringatsrhamisa kuyini ku yene?
18 Vananga, ahizrandzreni, kunge hi nomu kumbe lidzrimi, kambe hi sviyenco ni xihlayelamfuzri.
19 Hitasvitiva hi lesvo lesvaku hisukela axihlayelamfuzrini, nakone hitatiyisa timbilu tezru amahlweni kwakwe,
20 hitibzela lesvaku loko timbilu tezru tichuka tihisola, Xikwembu Nkulukumba i nkulu kutlula timbilu tezru nakone ativa hinkwasvu.
21 Vazrandzriwa, loko timbilu tezru tingahisoli, hivulavula hi kuntsrhunxeka amahlweni ka Xikwembu Nkulukumba;
22 kutani xini na xini lexi hixikombelaka, Xikwembu Nkulukumba atahinyika, hikusa hiyingiseta svileleto svakwe nakone hiyenca minchumu lemimunyonxisaka.
23 Nakone xileleto xakwe hi lexi: hi lesvaku hifanela kupfumela avitweni dzra N’wanakwe Yesu Kriste, ni kuzrandzranana, svanga hesvi ahileletiki ha kone.
24 Ntlhantakubizri, lweyi ayingisetaka svileleto sva Xikwembu Nkulukumba atsrhama kun’we na yene, na ye Xikwembu Nkulukumba atsrhama kun’we na yene; nakone hasvitiva lesvaku atsrhama kun’we na hine hi mhaka ya moya lowu ahinyikiki wone.