BRX

1   Lexi afaka xili kone kusukela akusunguleni, lexi hixiyingeliki, lexi hixivoniki hi mahlo yezru, lexi hixilangutisiki ha hombe, ni lexi hixikhumbiki hi mavoko yezru, mayelanu ni zritu dzra vutomi;

2   (nakone vutomi bzikhanyisiwile hiva hibzivona, kutani hibeka vumboni hitlhela hin’widzrungulela vutomi lebzingahelikiki lebzi afaka bzili kone na Tatana lebzi hikhanyiseliwiki bzone)

3   lexi hixivoniki hiva hixiyingela, han’widzrungulela xone na n’wine, akuva na n’wine n’witava ni vuxaka na hine. Kutlula kolahu, vuxaka lebzi bza ka kwezru bzihitlhanganisa na Tatana ni N’wanakwe, Yesu Kriste.

4   Kutani hin’witsralela minchumu leyi akuva kutsrhava kwezru kutatatiseka.

5   Ledzri hi dzrone zritu ledzri hidzriyingeliki ku yene, ledzri hin’witivisaka dzrone, lesvaku Xikwembu Nkulukumba i livaningo nakone aku na munyama ni wutsrongo ku yene.

6   Loko hiku: “Hi ni vuxaka na yene”, nakuve hifamba amunyameni, hahemba mfuzri ahixilandzri xihlayelamfuzri.

7   Nambitanu, loko hifamba alivaningweni svanga hesvi yene hi ntshima anga livaningweni, hi ni vuxaka hi xihine, nakone ngati ya N’wanakwe Yesu yahibasisa asvidohweni hinkwasvu.

8   Loko hiku: “Ahi na xidoho”, hotikanganyisa nakone xihlayelamfuzri axi kone ku hine.

9   Loko hitihlaya svidoho svezru, yene awadumbeka nakone alulamile. Xilesvo, angahidzrivalela svidoho svezru ni kuhibasisa avubihini hinkwabzu.

10   Loko hiku: “Ahidohanga”, himuyenca muhembi, nakone zritu dzrakwe adzri kone ku hine.