-
1 Vatesalonika 4
1 Hi vugamu, ke, vamakwezru, svanga hesvi n’wiyamukeliki xileleto ku hine mayelanu ni ndlela leyi n’wifanelaka kufamba ha yone akuva n’witanyonxisa Xikwembu Nkulukumba, svanga hesvi ni svosvi n’wifambisaka xisvone, hin’wikombela hitlhela hin’witsratsriya lesvi ha Hosi Yesu: Yencani ni sva kutlula kolahu.
2 Hikusa n’wasvitiva svileleto lesvi hisvinyikeliki ha Hosi Yesu.
3 Hikusa lesvi Xikwembu Nkulukumba asvijulaka hi lesvaku n’wiva lavaxwengiki ni kufambela kule ni vugangu.
4 Mun’wana ni mun’wana wenu afanela kutiva kulawula mizri yakwe hi ntshima hi kuxwenga ni xichavu,
5 kunge hi kupsha hi kunavela ka kunyonxisa svizro sva mbeleko ka kufana ni loku vanga naku vhanu va matiko lavangativikiki Xikwembu Nkulukumba.
6 Kungave na mhunu lweyi atlulaka mindzrilakana lemifaneliki kutani akanganyisa makwavu amhakeni leyi, hikusa Yehovha awakhatisa minchumu leyi hinkwayu, svanga hesvi hizrangikiki hin’wibzela hitlhela hin’wimamulela svinene.
7 Hikusa Xikwembu Nkulukumba angahivitanelanga mahanyela ya xambza, kambe ahivitaneli kuxwenga.
8 Xilesvo, lweyi amivonelaka hansi minchumu leyi, angayeyisi mhunu, kambe ayeyisa Xikwembu Nkulukumba, lweyi an’winyikiki moya wakwe wa kuxwenga.
9 Nambitanu, mayelanu ni lizrandzru dzra vukwavu, n’wine an’wahavileli kuva hin’witsralela nchumu, hikusa n’wine hi ntshima n’widondzrisiwa hi Xikwembu Nkulukumba kuzrandzranana.
10 Nakunene, hi svosvo n’wisviyencelaka vamakwezru hinkwavu le Masedonya hinkwaku. Kambe, vamakwezru, hin’witsratsriya lesvi: Yengetelani kutlula ni kolahu.
11 Lwelani kuhanya hi kuzrula ni kulandzrelela timhaka tenu, ni kutizra hi mavoko yenu, svanga hesvi hin’widondzrisiki ha kone,
12 akuva n’wikota kufamba hi ndlela leyixongiki amahlweni ka vhanu va le handle, n’wingakiyeleliwi hi nchumu.
13 Nangweso, vamakwezru, ahijuli lesvaku n’wisala ntsrhaku ku timhaka ta lava svosvi vatiyetleleliki, akuva n’wingavavisekisi xisvone lesvi lavambeni, lavangeke na dumbo, vavavisekisaka xisvone.
14 Hikusa loko hipfumela lesvaku Yesu afile atlhela apfuka, na ye Xikwembu Nkulukumba atabuyisa na yene lavatiyetleleliki hi kola ka Yesu.
15 Hikusa hin’wibzela lesvi hi zritu dzra Yehovha: Hine hihanyaka, lavahatakatama vava kone kuyatlhasa ankameni wa kuhumelela ka Hosi, hingatizrangela lavatiyetleleliki;
16 hikusa Hosi hi ntshima yitaxika hi le tilweni hi kubandlukana lokukulu, hi zritu dzra ntsrumi leyikulu ni hi xipalapala xa Xikwembu Nkulukumba, kutani lavafiki kun’we na Kriste vatazranga vapfuka.
17 Antsrhaku hine hihanyaka, lavahatakatama vava kone, hitatlakuliwa kun’we na vone, hifamba amatlavini hiyatlhangaveta Hosi ampfhukeni; kutani hi ndlela leyo hitatsrhama ni Hosi minkama hinkwayu.
18 Kutani ke, tiyisanani timbilu hi mazritu lawa