BRX

1   Pawlu, Silvhanu na Timotewu, ku bandla dzra vatesalonika, ledzringa kun’we na Xikwembu Nkulukumba lwanga Tatana, kupatsra na Hosi Yesu Kriste: hin’winavelela vumbilu ni kuzrula!

2   Minkama hinkwayu hikhensa Xikwembu Nkulukumba loko hin’wiphata hinkwenu asvikhongotweni svezru,

3   hikusa nkama ni nkama hidzrimukela ntizro wenu lowa kudumbeka, kutihita kwenu loka lizrandzru, ni kutiyisela kwenu hi kola ka kulavisela loku n’winga naku ku Hosi yezru Yesu Kriste amahlweni ka Xikwembu Nkulukumba wezru ni Tatana wezru.

4   Hikusa hasvitiva, vamakwezru lavazrandzriwaka hi Xikwembu Nkulukumba, lesvaku an’wilangile.

5   Hikusa madzrungula lamanene lawa himazrezraka aman’witlhaselanga hi kuvulavula ntsena, kambe ni hi ntamu, ni hi moya wa kuxwenga, ni kudumba lokukulu, svanga hesvi n’wisvitivaka lesvaku hitihambi vhanu va muxaka muni amakazri kwenu hi mhaka yenu.

6   Kutani n’wine n’windzruluki vayetiseli vezru ni va Hosi, hilesvi n’wiyamukeliki zritu hansi ka nhlomulo wukulu hi kutsrhava ka moya wa kuxwenga,

7   lakakuva n’windzruluki xikombiso ku hinkwavu vapfumeli va le Masedonya ni le Akaya.

8   Mhaka hi lesvaku, zritu dzra Yehovha adzriyingeliwanga ntsena kusukela ku n’wine le Masedonya ni le Akaya, kambe lipfumelo dzrenu ku Xikwembu Nkulukumba dzrihangalaki dzriyatlhasa ni le matikweni amimbangwini hinkwayu, lakakuva asvahajuli hahahlaya nchumu.

9   Hikusa vone hi ntshima vatsrhama hi kudzrungula lesvi vavonanisiki xisvone na n’wine hi khambi dzra kusungula ni lesvi n’wingandzrulukisa xisvone n’wiya ku Xikwembu Nkulukumba, n’witsrhika svikwembu svenu sva svivatliwa, akuva n’witizrela Xikwembu Nkulukumba lwahanyaka ni wa xihlayelamfuzri,

10   ni kuyimela N’wanakwe na apfa hi le matilweni, lweyi amupfuxiki akufeni, anga, Yesu, lweyi atakahihuluxa amahlundzrwini lamataka