BRX

1   Xana mine ndzroka ndzringantsrhunxekanga kee? Andzri mupostola kee? Ndzroka ndzringamuvonanga Yesu, Hosi yezru? Xana n’wine an’wi wone ntizro lowu ndzringawuyenca amahlweni ka Hosi?

2   Nambiloko ku van’wana ndzringe mupostola, ku n’wine ndzri yene hakunene! Hikusa hi n’wine xifungu xa kutiyisa vupostola bzanga amahlweni ka Hosi.

3   Lesvi ndzritiyimelelaka ha svone ku lava vandzriyavanyisaka hi lesvi:

4   Xana hine hoka hinge na mfanelo ya kuda ni kunwa kee?

5   Xana hoka hinge na mfanelo ya kuchata ni makwezru wa xisati, hifambafamba naye, kufana ni vapostola lavan’wana, ni vamakwavu va Hosi, na Kefasi kee?

6   Kumbe kova mine ntsena na Barnaba hingeke na mfanelo ya kutsrhika kutizra sva kutihanyisa ha svone kee?

7   Hi wini musocha lweyi ayaka ayimpini hi mali yakwe hi ntshima? Hi mani lwabzalaka nsimu ya mavhinya agama angadi mihandzru ya kone? Kumbe hi mani lwabzisaka ntlhambi agama anganwi masi ya svifuyu sva kone?

8   Xana ndzrokombisa mavonela ya vhanu ntsena? Kumbe na wone nawu awuhlayi svone lesvi?

9   Hikusa anawini wa Moxe kutsraliwi lesvi: “Ungasive nomu wa homu loko yihula mavele.” Xana Xikwembu Nkulukumba a ni mhaka ni tihomu?

10   Kumbe ahlaya lesvi hi mhaka yezru? Svitsraleliwi hine, hikusa mhunu lweyi adzrimaka, ni mhunu lweyi ahulaka mavele, afanela kuyenca tanu na adumba lesvaku atakuma xanchumu.

11   Lesvi hibzaliki minchumu ya moya amakazri kwenu, xana hotlulisa mpimu loko hizrindzrela lesvaku n’wihipfuna hi minchumu ya nyama kee?

12   Loko van’wana va ni mfanelo leyi ahenhla kwenu, xana hine ahi nayu hi kutlulisa kee? Nambitanu, ahiyitizrisanga mfanelo leyi. Amatsrhan’wini ya lesvo, hitiyisela ku hinkwasvu akuva hingatichuka hisivela madzrungula lamanene ya Kriste.

13   N’woka n’wingasvitivi lesvaku lava vatizraka atempeleni vada ku svosva le tempeleni, ni lesvaku lava vapfunisaka akuhiseni ka magandzrelo vada ku svolesvi kuhisiwaka magandzrelo ha svone?

14   Xisvosvo, na yone Hosi yileleti lesvaku lava vatwalisaka madzrungula lamanene vafanela kuhanya hi madzrungula lamanene.

15   Kambe mine andzritizrisanga ni yin’we ya timfanelo leti. Mfuzri andzritsralanga minchumu leyi lesvaku ndzriyenceliwa yone, hikusa ku mine afa svitayampsa ndzrifa; anga kone lwangahlayaka lesvaku ndzrotibuma mahala!

16   Hikusa loko ndzritwalisa madzrungula lamanene, axi kone xivangelo lexi ndzrifanelaka kutibuma ha xone, hikuva i ntsrhwalu lowu ndzringazrwexiwa wone. Kambe yoo mine, loko ndzringatwalisi madzrungula lamanene!

17   Loko ndzriyenca lesvi hi kusvizrandzra, ndzri ni hakelo; kambe nambiloko ndzrisviyenca na ndzringasvijuli, ndzriyenca ntizro lowu ndzritamelisiwiki wone.

18   Kutani ke, hi dzrini hakelo dzranga? I kuva loko ndzritwalisa madzrungula lamanene, ndzrikota kumanyikela hi mahala, akuva ndzritaka ndzringatlangi ha yone mfanelo yanga andzreni ka madzrungula lamanene.

19   Hikuva nambilesvi ndzrintsrhunxekiki ku vhanu hinkwavu, ndzritiyenci xikazrawa ku hinkwavu, lesvaku ndzritakota kukuma ntalu wa lavakotekaka.

20   Ku vayuda ndzritiyenci muyuda akuva ndzritakota kukuma vayuda; ku lavanga hansi ka nawu ndzritiyenci svanga lwanga hansi ka nawu, nambilesvi mine ndzringeke hansi ka nawu, akuva ndzritakota kukuma lavanga hansi ka nawu.

21   Ku lavangeke na nawu ndzritiyenci svanga lwangeke na nawu, nambilesvi ndzringeke wa kukala nawu ku Xikwembu Nkulukumba kambe ndzringa hansi ka nawu amahlweni ka Kriste, akuva ndzritakota kukuma lavangeke na nawu.

22   Ku lava kuka vangatiyanga ndzritiyenci wa kuka angatiyanga, akuva ndzritakota kukuma lava kuka vangatiyanga. Ndzritiyenci hinkwasvu ku vhanu hinkwavu, akuva hi tindlela hinkwatu ndzritakota kuhuluxa van’we.

23   Kambe ndzriyenca hinkwasvu hi mhaka ya madzrungula lamanene, akuva ndzritakota kuva mun’we wa lava vamatlhasisaka ku van’wana.

24   Xana n’woka n’wingasvitivi lesvaku lavanga ampalisanwini wa kutsrutsruma vatsrutsruma hinkwavu, kambe lweyi akumaka hakelo i mun’we ntsena? Tsrutsrumani hi ndlela ya kuva n’wikota kukuma hakelo.

25   Kutani mun’wana ni mun’wana lweyi akumekaka ku mintlangu leyi awatikhoma aminchun’wini hinkwayu. Vone, nakunene, vayencela kukuma ngiyana ya sviluva leyihonekaka, kambe hine hiyencela kukuma leyingahonekiki.

26   Xilesvo, loko ndzritsrutsruma, andzritsrutsrumi muhulahula; lesvi ndzrilwisaka xisvone andzrijuli kuba moya;

27   kambe ndzriba mizri yanga ndzriva ndzrimiyenca xikazrawa, akuva svingayenceki lesvaku, antsrhaku ka loko ndzrizrezreli vambeni, mine wa kone ndzrichuka ndzridzreliwa.