BRX

1   Kutani, mayelanu ni lesvi n’wingandzritsralela ha svone, svayampsa akuva wanuna angakhumbi wansati;

2   kambe, lesvi vugangu bzingatalisa xilesvi, wanuna mun’wana ni mun’wana aave ni nsati wakwe hi ntshima ni wansati mun’wana ni mun’wana aave ni nuna wakwe hi ntshima.

3   Nuna aanyike nsati wakwe mfanelo yakwe, na yene nsati aayence hi la kufanaka ku nuna wakwe.

4   Nsati angamifumi mizri yakwe hi ntshima, kambe mifumiwa hi nuna; hi svosvosvo, na yene nuna angamifumi mizri yakwe, kambe mifumiwa hi nsati.

5   N’wingatsronaneni, handle ka loko n’weyenca hi kutwanana svosvo hi nkama wa kukazri, akuva n’wiwisanyana n’witatinyika nkama wa kukhongota, n’witlhela n’wiva kun’we, akuva Sathana angan’widzringi hi mhaka ya kupfumala kwenu kutikhoma.

6   Kambe, lesvi ndzrihlayela kun’wipfulela mukhandlu; ahi xileleto.

7   Kasi lexi mine afaka ndzrixinavela afa kuli lesvaku vavanuna hinkwavu vafana na mine. Kambe mun’wana ni mun’wana a ni nyiko yakwe hi ntshima leyipfaka ku Xikwembu Nkulukumba; kunene mun’we a ni leyi, kasi mun’wana a ni liyani.

8   Kutani ndzribzela lavangachatangakiki ni mafelwa ndzriku svayampsa vatsrhamisisa xisvosvo kufana na mine.

9   Kambe loko vahluleka kutikhoma, avachate, hikuva sviyampsa ngopfu kuchata kutlula kupsha hi kunavela.

10   Lavachatiki ndzrivanyika xileleto lexi, na ange mine, kambe na ali Hosi: nsati angafanelanga kuhambana ni nuna.

11   Kambe loko ahambana naye, aatsrhame na angachatanga, kumbe, loko svinge tanu, aatlhelelane ni nuna; na yene nuna angafanelanga kutimisa muchatu ni nsati.

12   Kambe lavan’wana, mine, na kunge Hosi, ndzrivabzela lesvi: Loko makwezru a ni nsati lwangeke mupfumeli kambe anyonxelaka kutsrhama naye, angatimise muchatu ni nsati lweyo;

13   na yene wansati, loko a ni nuna lwangeke mupfumeli kambe anyonxelaka kutsrhama naye, angatimise muchatu ni nuna lweyo.

14   Hikusa nuna lwangeke mupfumeli axwengisiwa hi nsati, na yene nsati lwangeke mupfumeli axwengisiwa hi makwezru; loko afa svinge tanu, vanenu inha vangabasanga, kambe svosvi vaxwengile.

15   Kambe loko lwangeke mupfumeli alanga kufamba amusiya, aafambe; ku lesvo makwezru wa xinuna kumbe wa xisati angabohiwanga, kambe Xikwembu Nkulukumba an’wivitani akuva n’wikuma kuzrula.

16   Hikuva wene nsati, usvitivisa kuyini lesvaku kumbe utahuluxa nuna kee? Kumbe, wene nuna, usvitivisa kuyini lesvaku kumbe utahuluxa nsati kee?

17   Kambe mun’wana ni mun’wana aafambe hi kulandzra xiyimu lexi Hosi yingamuyavela xone, hi la Xikwembu Nkulukumba amuvitaniki ha kone. Nakone xileleto lexi ndzrixinyika mabandla hinkwawu.

18   Xana a kone lweyi angavitaniwa na asokile? Angandzruluke wa kuka angasokanga. A kone lweyi angavitaniwa na angasokanga kee? Angasoke.

19   Kusoka ahi nchumu, ni ko kuka mhunu angasokanga ahi nchumu; xa lisima i kubekisa svileleto sva Xikwembu Nkulukumba.

20   Mun’wana ni mun’wana aatsrhame ku xiyimu lexi avitaniwiki ku xone.

21   Xana uvitaniwi na uli xikazrawa? Ungavaviseke ha svone; kambe loko usvikota kuntsrhunxeka, svayampsa ulondzrovota.

22   Hikusa mani na mani lwavitaniwiki hi Hosi na ali xikazrawa i muntsrhunxiwa wa Hosi. Hi ndlela leyifanaka, mani na mani lwavitaniwiki na antsrhunxekile i xikazrawa xa Kriste.

23   N’wixaviwe hi kudula; n’wingahatameni n’wiva svikazrawa sva vhanu.

24   Vamakwezru, mun’wana ni mun’wana aatsrhame na Xikwembu Nkulukumba ku xiyimu xini na xini lexi angavitaniwa ku xone.

25   Kutani, mayelanu ni lavanga tinghwendzra letibasiki, andzri na xileleto lexipfaka ku Hosi, kambe ndzrinyikela mavonela yanga svanga lweyi, hi timpsalu ta Hosi, ndzringavoniwa na ndzridumbeka.

26   Kutani ke, ndzrivona lesvaku svayampsa akuva mhunu atsrhamisisa xisvosvi anga xisvone hi mhaka ya svikazratu sva nkama lowu.

27   Xana u ni nsati lweyi ungatiboha ku yene? Ungajule kutintsrhunxa. Xana untsrhunxekile ku wansati? Ungajule nsati.

28   Kambe ni koloko uchata, awudohi. Ni loko lwanga nghwendzra leyibasiki achata, angadohi. Kambe lavachataka vatava ni nhlomulo anyameni. Kutani mine ndzrojula kun’wiphula.

29   Mfuzri ndzritlhela ndzrihlaya lesvi, vamakwezru: nkama lowusaliki i wutsrongo. Kusukela svosvi, lavanga ni vasati avayence ingiki ava navu,

30   ni lavadzrilaka avayence ingiki avadzrili, ni lavanyonxaka avayence ingiki avanyonxi, ni lavaxavaka avayence ingiki ava na nchumu,

31   ni lavatizrisaka misava avayence ingiki avamitizrisi hi kuhelela; hikuva lesvi misava leyi minga xisvone svitsrhama hi kucinca.

32   Phela, ndzrojula lesvaku n’wingahanyi hi kukazrateka. Lweyi akaka angachatanga akazrateka hi minchumu ya Hosi, lesvaku angayencisa kuyini akuva Hosi yinyonxa ha yene.

33   Kambe lwachatiki akazrateka hi minchumu ya misava, lesvaku angayencisa kuyini akuva anyonxisa nsati,

34   kutani akumeka na ayavanile. Kasi wansati lwangachatangakiki ni lwabasiki, akazrateka hi minchumu ya Hosi, akuva axwenga amizrini ni le moyeni wakwe. Kambe wansati lwachatiki akazrateka hi minchumu ya misava, lesvaku angayencisa kuyini akuva anyonxisa nuna.

35   Kutani lesvi ndzrisvihlayela akuva svipfuna n’wine; ahi kuva ndzrojula kun’witsrimbelela, kambe ndzrojula kun’wikomba lesva hombe ni kutizrela Hosi na n’wingahingeleteliwi hi nchumu.

36   Kambe loko mhunu avona lesvaku angatikhomi ha hombe ku vunghwendzra bzakwe, ni loko kutani awupfile, loko svifanela kuyencekisa xisvosvo, aayence lesvi asvijulaka; angadohi. Vhanu lava vangachata.

37   Kambe loko ku ni lweyi atibekiseliki ambilwini yakwe, nakone angeke na xivilelo, kambe akotaka kufuma kunavela kwakwe, na abohi ambilwini yakwe hi ntshima kutsrhama na ali nghwendzra leyibasiki, atayenca svone.

38   Kutani ke, lweyi achataka ayenca svone, kambe lweyi akaka angachati atayenca svone hi kutlulisa.

39   Nsati wa mhunu abohiwile loko nuna ahahanya. Kambe loko nuna ofa, antsrhunxekile kuchata ni lweyi amuzrandzraka, ntsena hi yencela dzra Hosi.

40   Kambe, atakuma kunyonxa lokutlulisaka loko atsrhamisisa xisvosvi anga xisvone. Lawo i mavonela yanga, kambe ndzripimisa lesvaku na mine ndzri ni moya wa Xikwembu Nkulukumba.