BRX

1   Xana loko mhunu a ni mhaka leyi alwisanaka ni mun’wana ha yone, awatiya ayiyisa ahubzeni ya kuthetha timhaka lesvaku yitsremiwa hi lava kuka vangalulamanga, amatsrhan’wini ya lava kuxwenga?

2   Kumbe n’woka n’wingasvitivi lesvaku lava kuxwenga vatayavanyisa misava leyi? Kutani loko misava leyi mitayavanyisiwa hi n’wine, xana an’wi nayu mfanelo ya kutsrema timhaka letitsrongo?

3   N’woka n’wingasvitivi lesvaku hitayavanyisa tintsrumi? Kutani ke, ahahahlayi sva vutomi lebzi!

4   Kutani, loko n’wi ni timhaka ta vutomi lebzi letijulaka kuthethiwa, i sva kuyini sva kuhlawula vhanu lavadzreliwaka andzreni ka bandla lesvaku vatitsrema?

5   Ndzrikanelisa xilesvo kumbe n’wingakota n’widana. Koka kunge na mhunu wa kutlhazriha amakazri kwenu lweyi angakotaka kuyavanyisela vamakwavu timhaka kee?

6   Kambe mun’we makwavu asuka ayazrambela makwavu ahubzeni ya kuthetha timhaka; ayenca lesvo amahlweni ka lavangeke vapfumeli!

7   Kunene, loko n’wikota n’wiyahlayelana ahubzeni ya kuthetha timhaka, svikomba lesvaku n’wihluliwile. Asviyampsi n’wipfumela kuyenceliwa vubihi kee? Asviyampsi n’wipfumela kukanganyisiwa kee?

8   Kambe n’wine, nambi vamakwenu n’wavayencela vubihi n’witlhela n’wivakanganyisa!

9   Kumbe n’woka n’wingasvitivi lesvaku lava kuka vangalulamanga vangatida pfindla dzra Mfumu wa Xikwembu Nkulukumba kee? N’wingapfumeleni kukanganyisiwa: Vhanu va vugangu, ni lavagandzrelaka svithombe, ni lavayencaka vumbuye, ni lavatiyencaka vavasati, ni lavanyonxisaka kunavela ka svizro sva mbeleko ni vaxinunakulobze,

10   ni vayivi, ni vhanu va makwanga, ni timpopsi, ni vazruketeli, ni vawutli, vangatida pfindla dzra Mfumu wa Xikwembu Nkulukumba.

11   Lesvi mfuzri hi lesvi van’wana venu afaka vali svone. Kambe n’wihlampsiwile nakone n’wixwengisiwile, n’witlhela n’wihlayiwa lava kululama hi vito dzra Hosi Yesu Kriste ni hi moya wa Xikwembu Nkulukumba wezru.

12   Ku mine, hinkwasvu svapfumeleliwa hi nawu, kambe ahi hinkwasvu svipfunaka. Ku mine, hinkwasvu svapfumeleliwa hi nawu, kambe ndzringatipfumelela nchumu ni wun’we wundzrifuma.

13   Svakuda svihambeliwi khuzri, na dzrone khuzri dzrihambeliwi svakuda, kambe Xikwembu Nkulukumba atahelisa hi vubizri bza svone. Nakone mizri amihambeliwanga kuyenca vugangu kambe mihambeliwi kutizrela Hosi, na yone Hosi yijula kutizrisa mizri.

14   Nakone Xikwembu Nkulukumba apfuxi Hosi; kutani na hine atahipfuxa akufeni hi ntamu wakwe.

15   N’woka n’wingasvitivi lesvaku mizri yenu i svizro sva Kriste kee? Kutani ke, ndzringateka svizro sva Kriste ndzriyasvipatsra ni nghwavana kee? Svingeyenceki lesvo!

16   N’woka n’wingasvitivi lesvaku mani na mani lwatipatsraka ni nghwavana andzruluka mizri min’we naye? Hikusa Xikwembu Nkulukumba ali: “Hi vubizri bzavu vatava nyama yin’we.”

17   Kambe lweyi atipatsraka ni Hosi andzruluka moya wun’we nayu.

18   Tsrutsrumani n’wichava vugangu! Xidoho xin’wana ni xin’wana lexi mhunu angahaxiyencaka xile handle ka mizri yakwe, kambe mani na mani lwayencaka vugangu adohela mizri hi ntshima.

19   Kumbe n’woka n’wingasvitivi lesvaku mizri yenu i tempele dzra moya wa kuxwenga lowunga ku n’wine, lowu n’wiwukumaka ku Xikwembu Nkulukumba kee? Handle ka lesvo, n’wine an’witilumbi,

20   hikuva n’wixaviwi hi kudula. Xilesvo, dzrumisani Xikwembu Nkulukumba hi mizri yenu.