BRX

1   Svosvi, vamakwezru, ndzrin’wibzela madzrungula lamanene wolawa ndzringan’wizrezrela wone, lawa n’wingamapfumela n’witlhela n’witiya ku wone;

2   lawa mfuzri n’wihuluxiwaka ha wone loko n’witiya n’wikunde ku madzrungula lamanene lawa ndzrin’wizrezreliki wone, loko n’wingapfumelanga mahala.

3   Hikuva xin’we xa lesvi ndzringazranga ndzrin’witlhasisela svone hi lesvi na mine ndzrisviyamukeliki, lesvaku Kriste afeli svidoho svezru hi kulandzra lesvi Matsralwa masvihlayaka;

4   ni lesvaku alahliwile, atlhela apfuxiwa hi siku dzra vuzrazru hi kulandzra lesvi Matsralwa masvihlayaka;

5   ni lesvaku ayitivonekisa ku Kefasi, agama ativonekisa ku lava khume na vabizri.

6   Antsrhaku ka lesvo, ativonekisi ku vamakwezru va kutlula ntlhanu wa madzana hi nkama wun’we, lava ntalu wavu vahahanyaka kutatlhasa svosvi, kambe van’wana vafile.

7   Antsrhaku ka lesvo, ativonekisi ku Yakobe, agama ativonekisa ku vapostola hinkwavu.

8   Kambe, hi vugamu, ativonekisi ni le ku mine svanga hi loko ndzrebelekiwa na kungasitlhasa nkama.

9   Hikuva mine ndzri lwentsrongo ngopfu ku vapostola, nakone andzrifaneliwi hi kuvitaniwa mupostola, hikusa ndzrixanisi nhlengeletanu ya Xikwembu Nkulukumba.

10   Kambe hi vumbilu bza Xikwembu Nkulukumba, mine ndzri lesvi ndzringa svone. Nakone vumbilu lebzi andzrikombiki bzone abzivanga bza mahala, kambe ndzritizri ngopfu kutlula vone hinkwavu; kambe ahi mine, kambe kuvi vumbilu bza Xikwembu Nkulukumba lebzi afaka bzili na mine.

11   Xilesvo, nambi ali mine kumbe vone, lesvi hi lesvi hizrezrisaka xisvone, nakone hi lesvi n’wine n’wikholwisiki xisvone.

12   Kutani, loko kuzrezriwa lesvaku Kriste apfuxiwile akufeni, xana van’we amakazri kwenu vahlayisa kuyini lesvaku aku na kupfuka ka vafi?

13   Loko kunene kunge na kupfuka ka vafi, svijula kuhlaya lesvaku Kriste angapfuxiwanga.

14   Kambe loko Kriste angapfuxiwanga, svijula kuhlaya lesvaku kuzrezra kwezru ahi ka nchumu, na dzrone lipfumelo ahi dzra nchumu.

15   Handle ka lesvo, hitlhela hikumeka na hili timboni ta madzrimi ta Xikwembu Nkulukumba, hikusa himubekeli vumboni, hiku: “Xikwembu Nkulukumba apfuxi Kriste”, na kasi angamupfuxanga, loko kuli lesvaku vafi hakunene vangatipfuxiwa.

16   Hikuva loko kuli lesvaku vafi vangatipfuxiwa, nambi Kriste angapfuxiwanga.

17   Nangweso, loko Kriste angapfuxiwanga, lipfumelo dzrenu adzripfuni nchumu, mfuzri n’wehe svidohweni svenu.

18   Nakone svijula kuhlaya lesvaku lavafiki ku Kriste vafeli vugamu.

19   Loko kuli lesvaku hidumbi Kriste ku vutomi bzobzi ntsena, hi hine vambuyangwana va kone ku vhanu hinkwavu.

20   Kambe, ke, Kriste apfuxiwile akufeni, ava yene wa kusungula kupfuxiwa amakazri ka lavafiki.

21   Hikuva svanga hesvi lifu dzringa kone hi mhunu mun’we, na kone kupfuka ka vafi kutava kone hi mhunu mun’we.

22   Hikuva svanga hesvi vhanu hinkwavu vafaka hi kola ka Adamu, hi kola ka Kriste hinkwavu na vone vatatlhela vahanya.

23   Kambe mun’wana ni mun’wana hi nxaxamelo wakwe hi ntshima: Kriste, lwewa kusungula wa kone, kulandzra lavalumbaka Kriste hi nkama wa kuhumelela kwakwe.

24   Antsrhaku ka lesvo, kutatlhasa vugamu, kunga nkama lowu atakanyiketa mfumu ku Xikwembu Nkulukumba ni Tatana wakwe, loko atava na ahelisi mimfumu hinkwayu, ni vuhosi hinkwabzu, ni ntamu hinkwawu.

25   Hikuva afanela kufuma kuyatlhasa ku nkama lowu Xikwembu Nkulukumba atakabeka valala hinkwavu ahansi ka minkondzro yakwe.

26   Kutani nala wa vugamu lweyi atakahelisiwa i lifu.

27   Hikuva Xikwembu Nkulukumba abeki minchumu hinkwayu ahansi ka minkondzro yakwe. Kambe loko kuhlayiwa lesvaku “abeki minchumu hinkwayu ahansi ka minkondzro yakwe”, svile livaleni lesvaku akupatsriwi lweyi abekiki minchumu hinkwayu ahansi kwakwe.

28   Kambe loko minchumu hinkwayu mitava mibekiwi ahansi kwakwe, kutani N’wana hi ntshima na yene atatibeka ahansi ka lweyi abekiki minchumu hinkwayu ahansi kwakwe, akuva Xikwembu Nkulukumba ava hinkwasvu ku hinkwavu.

29   Loko svinge tanu, xana lava vababatiseliwaka kufa vatayenca yini? Loko kuli lesvaku vafi vangatipfuxiwa ni siku ni dzrin’we, hayini vhanu vababatiseliwa kufa?

30   Na hine, hayini hitsrhama akhombzeni nkama hinkwawu?

31   Siku ni siku ndzrivhikisana ni lifu. Leyi i mhaka leyitiyiki svanga hesvi ndzritibumisaka xisvone ha n’wine, vamakwezru, amahlweni ka Kriste Yesu, Hosi yezru.

32   Loko, kufana ni vhanu vambeni, ndzrilwi ni svihazri sva nhova le Efesa, svindzripfuna ha yini svosvo? Loko kuli lesvaku vafi vangatipfuxiwa, ahideneni, hinwa, hikuva mundzruku hitafa.

33   N’wingakanganyisiweni. Xinghanunghanu xa kubiha xibolisa mahanyela lamanene.

34   Buyelelisani ngqhondho hi kuyenca lesva kululama, n’witsrhika kudoha; hikuva van’we ni kumutiva Xikwembu Nkulukumba avamutivi. Ndzrihlaya lesvi kun’wikhomisa tingana.

35   Kambe, mun’we ataku: “Xana vafi vatapfuxisiwa kuyini? Nakone vatatlhela na va ni mizri ya muxaka muni?”

36   Awupimisi wene! Phela, lexi uxibzalaka axitlheli xihanya loko xingazrangi hi kufa.

37   Nakone lexi uxibzalaka, ahi mizri lemitakakula, kambe ubzala mbewu ntsena, yingavaka ya tizriku kumbe ya muxaka wun’wana;

38   kambe Xikwembu Nkulukumba ayinyika mizri xilesvi asvijulisaka xisvone, nakone anyika mbewu yin’wana ni yin’wana muxaka wa yone wa mizri.

39   Nyama hinkwayu ahi nyama yin’we, kambe ku ni nyama yin’we ya vhanu, ku ni nyama yin’wana ya svifuyo, nyama yin’wana ya tinyanyana, ni yin’wana ya tinhlampfi.

40   Nakone ku ni mizri ya tilo ni mizri ya misava; kambe kuphatima ka mizri ya tilo i ka muxaka wa kukazri, kasi kuphatima ka mizri ya misava i ka muxaka wumbeni.

41   Kuphatima ka dambu i ka muxaka wa kukazri, kasi kuphatima ka hweti i ka muxaka wumbeni, nakone kuphatima ka tinyeleti i ka muxaka wumbenyana; nakone mfuzri, nyeleti ni nyeleti yihambanile ni tin’wana hi kuphatima.

42   Svafana ni kupfuka ka vafi. Mizri mibzaliwa na mili lemibolaka; mipfuxiwa na mili lemingabolikiki.

43   Mibzaliwa na midanisa; mipfuxiwa na miphatima. Mibzaliwa na mitsranile; mipfuxiwa na mi ni ntamu.

44   Mibzaliwa na mili mizri ya nyama; mipfuxiwa na mili mizri ya moya. Loko ku ni mizri ya nyama, na yone mizri ya moya mi kone.

45   Svi hi la svingatsraliwa ha kone: “Mhunu wa kusungula, Adamu, avi hika ledzrihanyaka.” Adamu wa vugamu avi moya lowuhanyisaka.

46   Nambitanu, lexizrangaka ahi xone xa moya. Kuzranga lexa nyama, kulandzra lexa moya.

47   Mhunu wa kusungula i wa la misaveni nakone ahambiwi hi ntsrhuzri; mhunu wa vubizri i wa le tilweni.

48   Kufana ni lweyi ahambiwiki hi ntsrhuzri, va tanu ni volava vahambiwiki hi ntsrhuzri; nakone kufana ni lweyi wa le tilweni, va tanu ni volava vanga va le tilweni.

49   Nakone svanga hesvi hiyambaliki xifaniso xa lweyi ahambiwiki hi ntsrhuzri, hitayambalisa xisvosvo xifaniso xa lwewa le tilweni.

50   Kambe ndzrin’wibzela lesvi, vamakwezru, lesvaku nyama ni ngati asvi na kuda pfindla dzra Mfumu wa Xikwembu Nkulukumba; nambi kubola aku na kuda pfindla dzra kungaboli.

51   Lavisani! Ndzrin’wibzela xihundla xa Xikwembu Nkulukumba: Ahi hinkwezru hitakayetlela akufeni, kambe hinkwezru hitandzrulutiwa,

52   hi nkamanyana, hi kubzavuta ka tihlo, hi nkama wa kubiwa ka xipalapala xa vugamu. Hikuva kutabiwa xipalapala, kutani vafi vapfuxiwa na vangahaboli svin’wana, hiva hindzrulutiwa.

53   Hikuva kujuleka lesvaku lexibolaka xiyambala kungaboli, ni lexifaka kujuleka xiyambala kungafi.

54   Kambe loko lexibolaka xiyambala kungaboli, ni lexifaka xiyambala kungafi, kutani kutahetiseka zritu ledzritsraliwiki dzriku: “Lifu dzriheliseliwi vugamu!”

55   “Lifu, ku kwini kuhlula kwaku kee? Lifu, wu kwini ntsrhombo waku kee?”

56   Ntsrhombo wa lifu i xidoho, ni ntamu wa xidoho i nawu.

57   Kambe ahikhenseni Xikwembu Nkulukumba, hikuva ahinyika kuhlula hi kola ka Hosi yezru Yesu Kriste!

58   Xilesvo, vamakwezru lavazrandzrekaka, tiyani n’wikunde, n’wingatsrekatsreki, n’witsrhama na n’wi ni svinyingi sva kusviyenca antizrweni wa Hosi, na n’witiva lesvaku ntizro wenu ahi wa mahala amahlweni ka Hosi.