BRX

1   Landzrelelani lizrandzru, na n’wilwela kukuma tinyiko ta moya, kambe ngopfungopfu ya kuprofeta.

2   Hikuva lweyi avulavulaka hi lidzrimi dzra kukazri angakaneli ni vhanu, kambe akanela na Xikwembu Nkulukumba, hikuva aku na mhunu lwayingisetaka, kambe avulavula svihundla sva Xikwembu Nkulukumba hi moya.

3   Kambe, lweyi aprofetaka akanela ni vhanu akuva avayaka, avatiyisa atlhela avachavelela.

4   Lweyi avulavulaka lidzrimi dzra kukazri otiyaka vusvakwe, kambe lweyi aprofetaka ayaka bandla.

5   Kutani ndzrinavela lesvaku hinkwenu n’wingavulavula hi tindzrimi, kambe ngopfungopfu akuva n’wiprofeta, hikusa lweyi aprofetaka atlula lweyi avulavulaka hi tindzrimi, handle ka loko yelweyo otlhamuxela lesvi asvikanelaka, akuva bandla dzrikuma kuyakiwa.

6   Kambe, vamakwezru, loko svosvi ndzrobuya ndzrivulavula na n’wine hi tindzrimi, afa ndzritan’wipfuna ha yini loko ndzringakaneli na n’wine hi mpfuletelo kumbe hi vutivi kumbe hi vuprofeta kumbe dondzro?

7   Svifanaka ni minchumu lemingahanyikiki, lemihumexaka mpfumawulu, ya kufana ni nanga kumbe xitsrendzre. Loko machayela ya mimpfumawulu mangahambanisiwi, xana svitativisiwa kuyini lesvichayiwaka hi nanga kumbe hi xitsrendzre?

8   Hikuva loko xipalapala xihumexa mpfumawulu lowungatwisisekiki, i mani xana lweyi angatibekiselaka kulwa yimpi?

9   Ni ku n’wine svi tanu, loko hi lidzrimi n’wingavulavuli minchumu lemihatlaka mitwisiseka, xana mhunu atasvitivisa kuyini lesvihlayiwaka? Kunene, n’witava na n’wovulavula sva kuka ndlela.

10   Kungahava ni mixaka ya kutala ya tindzrimi amisaveni, kambe awu kone muxaka wa lidzrimi ledzringeke na ntlhamuxelo.

11   Hikuva loko ndzringawutwisisi ntlhamuxelo wa mazritu lamavulavuliwaka, ndzritava mupfi ku lweyi avulavulaka, na yene lweyi avulavulaka atava mupfi ku mine.

12   Na n’wine, ke, lesvi n’winavelaka hi ntamu tinyiko ta moya, lwelani kutala hi tinyiko letitakayaka bandla.

13   Xilesvo, lweyi avulavulaka lidzrimi dzra kukazri aakhongote lesvaku akota kutoloka.

14   Hikuva loko ndzrikhongota hi lidzrimi dzra kukazri, i nyiko yanga ya moya leyikhongotaka, kambe miyanakanyu yanga amibindzruli nchumu.

15   Ndzritayenca yini kutani? Ndzritakhongota hi nyiko ya moya, kambe ndzritatlhela ndzrikhongota hi miyanakanyu yanga. Ndzritayimbelela xidzrumiso hi nyiko ya moya, kambe ndzritatlhela ndzriyimbelela xidzrumiso hi miyanakanyu yanga.

16   Loko svinge tanu, loko ukhensa hi kutizrisa moya, xana mhunu lweyi okosungula kuva makazri kwenu atahlayisa kuyini lesvaku “Amen” loko uheta kukhensa, na angasvitivi lesvi usvihlayaka?

17   Kunene, wene ukhensa ha hombe, kambe mhunu lwemun’wana angayakiwi.

18   Ndzritlangela Xikwembu Nkulukumba hi lesvi ndzrivulavulaka tindzrimi tinyingi kutlula n’wine hinkwenu.

19   Nambitanu, loko hihlengeletanile, ndzrivona sviyampsa kuvulavula ntlhanu wa mazritu hi ngqhondho yanga, akuva ndzritakota kutlhela ndzridondzrisa van’wana, kutlula dzana dzra madzana ya mazritu hi lidzrimi dzra kukazri.

20   Vamakwezru, n’wingapimiseni kufana ni svitsrongotwana, kambe vanani vatsrongwana ku lesva kubiha; n’wiva vakulu va vhanu amhakeni ya kukota kupimisa.

21   Anawini kutsraliwi lesvi: “‘Ndzritakanela ni tiko ledzri hi tindzrimi ta matiko mambeni ni hi mavulavulela ya vambeni. Kambe, nambilesvo, vangatindzriyingiseta’, kuhlaya Yehovha.”

22   Xilesvo, tindzrimi ahi xikombiso xa kukholwisa vapfumeli kambe xa kukholwisa lavangeke vapfumeli, kasi vuprofeta abzitizreli lavangeke vapfumeli kambe bzitizrela lavanga vapfumeli.

23   Kutani ke, loko bandla hinkwadzru dzrihlengeletanile ambangu wun’we na hinkwavu vavulavula hi tindzrimi ta kuhambanahambana, kutani kunhingena vhanu lava vokosungula kumbe lavangeke vapfumeli, xana vangatipimisa lesvaku n’wohlanya?

24   Kambe loko hinkwavu vaprofeta kutani kunhingena lwangeke mupfumeli kumbe mhunu lweyi okosungula, atapaluxiwa atlhela akambisisiwa hi hinkwavu.

25   Svihundla lesvinga mbilwini yakwe svitabekiwa alivaleni, lakakuva atawa hi mombo agandzrela Xikwembu Nkulukumba, aku: “Xikwembu Nkulukumba hakunene ale makazri kwenu.”

26   Kutani ke, hitayenca yini, vamakwezru? Loko n’wihlengeletana, mun’we a ni lisimu, mun’wana a ni dondzro, mun’wana a ni mpfuletelo, mun’wana a ni lidzrimi, kasi mun’wana a ni vusvikoti bza kutoloka. Hinkwasvu asviyenceliwe kuyakana.

27   Nakone loko mhunu akanela hi lidzrimi dzrimbeni, aagamele ku tibizri kumbe tizrazru ntsena, anyiselana ni vambeni, na ku ni mhunu wa kutoloka.

28   Kambe loko kunge na mhunu wa kutoloka, aamiyele anhlengeletanwini, avulavula vusvakwe na Xikwembu Nkulukumba.

29   Akuvulavule vaprofeta vabizri kumbe vazrazru, kutani lavan’wana vatwisisa lesviprofetiwaka.

30   Kambe loko mun’wana achuka anyikiwa mpfuletelo wa kukazri na atsrhamile, lwewa kusungula aamiyele.

31   Hikuva hinkwenu n’wingaprofeta ha mun’wemun’we, akuva hinkwavu vadondzra ni kuva hinkwavu vatiyisiwa.

32   Nakone kuhleveliwa hi moya loku vaprofeta vanga na kone kulawuliwa hi vone.

33   Hikusa Xikwembu Nkulukumba ahi Xikwembu Nkulukumba wa mpfilumpfilu kambe i wa kuzrula. Svanga hi le mabandleni hinkwawu ya vhanu va Xikwembu Nkulukumba lava kuxwenga,

34   vavasati lavanga mabandleni avamiyele, hikuva avapfumeleliwi kuvulavula. Kambe, avatibeke ahansi, svanga hesvi na wone Nawu wuhlayaka ha kone.

35   Loko vanavela kudondzra xa kukazri, avavutise vanuna vavu akaya, hikuva svikhomisa tingana loko wansati avulavula abandleni.

36   Kumbe zritu dzra Xikwembu Nkulukumba dzrehuma ku n’wine, kumbe dzrefamba dzriyagamela ku n’wine ntsena?

37   Loko mhunu wa kukazri apimisa lesvaku i muprofeta kumbe a ni nyiko ya kuhleveliwa hi moya, afanela kutwisisa lesvaku lesvi ndzrin’witsralelaka svone i xileleto xa Hosi.

38   Kambe loko mhunu wa kukazri atiyalisa, aabiwe hi makatla.

39   Kutani, vamakwezru, julani ngopfu kuprofeta, kambe n’wingasiveleni mhunu kuvulavula hi tindzrimi.

40   Kambe hinkwasvu asviyenciwe hi mfanelo ni hi nawu.