BRX

1   Nambiloko ndzrovulavula tindzrimi ta vhanu ni ta tintsrumi, loko ndzringe na lizrandzru, ndzrifana ni xigubu xa nsimbi lexitinganaka loko xibiwa kumbe ni mugqomo lowupfumaka loko wubiwa.

2   Ni loko ndzrova ni nyiko ya vuprofeta ni ya kutwisisa svihundla hinkwasvu ni vutivi hinkwabzu, ni loko ndzrova ni lipfumelo hinkwadzru lakakuva ndzringasusa tinhava, kambe loko ndzringe na lizrandzru, andzri nchumu.

3   Ni loko ndzronyikela minchumu yanga hinkwayu akuva ndzridisa van’wana, ni loko ndzringonyiketa mizri yanga akuva ndzritatibuma ha svone, kambe loko ndzringe na lizrandzru, andzripfuneki ha nchumu.

4   Lizrandzru dzrilehisa mbilu nakone dzrizrandzra kupfuna vhanu. Lizrandzru adzri na vukwele. Adzritidzrumisi, adzritikukumuxi,

5   adzriyenci sva tingana, adzritijuleli sva dzrone ntsena, adzri na xikwatisana. Adzribekelani xiviti.

6   Adzrinyonxi hi vubihi, kambe dzrinyonxa hi xihlayelamfuzri.

7   Dzribzatsrha minchumu hinkwayu, dzrikholwa minchumu hinkwayu, dzrilavisela minchumu hinkwayu, dzritiyisela aminchun’wini hinkwayu.

8   Lizrandzru adzriheli ni siku ni dzrin’we. Kambe loko kuli kuprofeta, kutahela; loko tili tindzrimi, titayima; loko bzili vutivi, bzitahela.

9   Hikuva hotiva sva svitsrongo nakone hoprofeta sva svitsrongo,

10   kambe loko kutatlhasa lesviheleliki, lesva svitsrongo svitahela.

11   Na ndzrehe mutsrongo, afa ndzrihamba ndzrivulavula svanga ntsrongwana, ndzripimisa svanga ntsrongwana, ndzrivona minchumu svanga ntsrongwana. Kambe lesvi kutani ndzrikuliki, ndzritsrhiki hinkwasvu sva vutsrongwana.

12   Hikuva svosvi hivona hi xivonivoni xa kumphuma, kambe ankameni wa kone hitavona mombo hi mombo. Svosvi ndzrotiva sva svitsrongo, kambe ankameni wa kone ndzritativisisa hi vuyeti svanga hesvi na mine ndzritivisisiwaka hi vuyeti.

13   Kambe svosvi kusala minchumu lemizrazru: lipfumelo, dumbo ni lizrandzru; kambe lexikulu ku svone i lizrandzru.