BRX

1   Ndzriyetiselani, kufana na mine ndzriyetiselaka Kriste.

2   Ndzrin’wibela mavoko hikusa n’wandzridzrimuka aminchun’wini hinkwayu, nakone n’wilandzrelela tidondzro leti ndzringamitluleta tone xisvosvi ndzrin’widondzrisisiki xisvone.

3   Kambe ndzrijula lesvaku n’wisvitiva lesvaku nhloko ya wanuna mun’wana ni mun’wana i Kriste; kutani, nhloko ya wansati i wanuna; kutani, nhloko ya Kriste i Xikwembu Nkulukumba.

4   Wanuna mun’wana ni mun’wana lwahambaka xikhongoto kumbe lwaprofetaka na a ni nchumu anhlokweni adanisa nhloko yakwe;

5   kambe wansati mun’wana ni mun’wana lwahambaka xikhongoto kumbe lwaprofetaka na angafuneketanga nhloko adanisa nhloko yakwe, hikusa i svin’we nakone svifana ni loko abzevuli nhloko.

6   Hikusa loko wansati angafuneketi nhloko, aavatsrhike vamutsremeta misisi hinkwayu; kambe loko svidanisa kuva wansati atsremetiwa misisi hinkwayu kumbe abzevuliwa nhloko, afanela kuyifuneketa.

7   Hikusa wanuna angafanelanga kufuneketa nhloko, hikuva i xifaniso xa Xikwembu Nkulukumba ni kuphatima kwakwe, kambe wansati i kuphatima ka wanuna.

8   Hikuva wanuna angahumanga ku wansati, kambe wansati hi yene lwahumiki ku wanuna.

9   Hikusa, mfuzri, wanuna angavumbiwanga hi mhaka ya wansati, kambe wansati hi yene lwangavumbiwa hi mhaka ya wanuna.

10   Xilesvo, wansati afanela kuva ni xikombiso xa kufumiwa anhlokweni, hi mhaka ya tintsrumi.

11   Nambitanu, amahlweni ka Hosi, wansati ahi wa nchumu handle ka wanuna, na yene wanuna ahi wa nchumu handle ka wansati.

12   Hikusa, svanga hesvi wansati ahumaka ku wanuna, na yene wanuna abelekiwa hi wansati; kambe hinkwasvu svihuma ku Xikwembu Nkulukumba.

13   Yavanyisani ha bzenu: Svafaneleka kuva wansati ahamba xikhongoto ku Xikwembu Nkulukumba na angafuneketanga nhloko?

14   Xana ntumbuluku hi ntshima awun’widondzrisi lesvaku misisi ya mikulu mimususa lisima wanuna,

15   kambe loko wansati ali ni misisi ya mikulu, ku yene, i kuphatima? Hikusa anyikiwi misisi akuva atifuneketa ha yone.

16   Nambitanu, loko wa kukazri ajula kulwela xihena xin’wana, hine ahi na ximbeni, nambi mabandla ya Xikwembu Nkulukumba ama naxu.

17   Kambe, ku lesvi ndzrijulaka kun’wileleta svone svosvi, andzrin’wibeli mavoko, hikusa, loko n’witlhangana, an’witlhanganeli sva svinene kambe sva kubiha hi kutlulisa.

18   Hikuva, xa kusungula, ndzriyingela lesvaku kunene loko n’witlhangana abandleni, kuhumelela kuyavana amakazri kwenu; kutani lesvi ndzrasvikholwanyana.

19   Hikuva kunene kutapatsra ni kupsaleka mintlawa lemitsravukiki amakazri kwenu, akuva svitakota svitikomba lesvaku i vamani lavanga xiyin’wini lexinene.

20   Hikuva, loko n’witlhangana ambangu wun’we, a’nwitlhanganeli kuda Xilalelo xa Hosi.

21   Hikuva loko n’wixida, mun’wana ni mun’wana azranga alalela, kutani mun’we akumeka na a ni ndlala kambe mun’wana na apopsile.

22   N’woka n’winge na makaya akuva n’wida n’witlhela n’winwa kone? Kumbe n’wodzrela bandla dzra Xikwembu Nkulukumba n’witlhela n’widanisa lavangeke na nchumu? N’wijula ndzrin’wibzela lesvaku yini? N’wijula ndzrin’wibela mavoko? Ku lesvi, andzrin’wibeli mavoko.

23   Hikuva ndzriyamukeli ku Hosi lesvi na mine ndzringan’witluleta svone, lesvaku Hosi Yesu, avusikwini lebzi angadlayisiwa ha bzone, ateki kati,

24   kutani antsrhaku ka loko akhensile, adzrikhemelelile, aku: “Lesvi i mizri yanga, leminyikeliwaka kupfuna n’wine. Yencani lesvi akuva n’windzridzrimuka.”

25   Ayenca lesvifanaka ni hi vhinyo, loko aheti kulalela, aku: “Lesvi i xipfumelelanu leximpsha hi kola ka ngati yanga. Yencani lesvi, nkama hinkwawu loko n’winwa, akuva n’windzridzrimuka.”

26   Hikuva nkama hinkwawu n’widaka kati ledzri n’wiva n’winwa vhinyo ledzri, n’witava na n’wotlangela lifu dzra Hosi, yiko yibuya.

27   Xilesvo, mani na mani lwadaka kati kumbe anwaka vhinyo dzra Hosi hi ndlela leyingafanekelikiki atava ni nandzru wa mizri ni ngati ya Hosi.

28   Kutani mun’wana ni mun’wana aatikambele hi ndlela leyi, antsrhaku hi kone angadaka kati ava anwa vhinyo.

29   Hikuva lweyi adaka atlhela anwa, na angavoni lisima dzra mizri, ada atlhela anwa yavanyiso ledzritakamuwela.

30   Hi mhaka yoleyi, vanyingi amakazri kwenu avatiyanga nakone vavabza, mfuzri va kuhlawa vafile.

31   Kambe, loko afa hotivona lesvi hinga svone, inhaka hingatiyavanyisiwa.

32   Nambitanu, loko hiyavanyisiwa, holulamisiwa hi Yehovha, akuva hingatibiwa kun’we ni misava.

33   Xilesvo, ke, vamakwezru, loko n’witlhanganela kuda, yimelanani.

34   Loko mhunu atwa ndlala, aade akaya kwakwe, akuva n’wingatlhanganeli kuyavanyisiwa. Kambe loko ali timhaka letingasala, ndzritabuya ndzritilulamisa loko ndzritlhasa.