BRX

1   Xilesvo, xa kusungula, ndzritsratsriya lesvaku kuyenciwa svikombelo, svikhongoto, svitsratsriyo, ni svikhenso, na sviyenceliwa vhanu hinkwavu,

2   ni tihosi ni hinkwavu lavanga vuhosini, akuva hikota kutihanyela ha hombe na hizrulile, avuton’wini bza kuchava Xikwembu Nkulukumba hi tindlela hinkwatu ni kuva ni xinthunzi.

3   Lesvi i svinene nakone svayamukeleka amahlweni ka Muhuluxi wezru, anga Xikwembu Nkulukumba,

4   lweyi anavelaka lesvaku vhanu va matsrhamela hinkwawu vahuluxiwa, vativa xihlayelamfuzri.

5   Hikusa ku na Xikwembu Nkulukumba mun’we, ni mutlhanganisi mun’we wa Xikwembu Nkulukumba ni vhanu, anga Kriste Yesu, wa lixaka dzra vhanu,

6   lwatinyikeliki svanga tizrulo ledzringahakeleliwa hinkwavu. Lebzi hi bzo vumboni lebzi afaka bziyimela nkama wa bzone.

7   Hi nkongometo wolowu, ndzribekiwi kuva muzrezri ni mupostola (lesvi ndzrisvihlayaka i xihlayelamfuzri, andzrihembi), ni kuva mudondzrisi wa matiko atimhakeni ta lipfumelo ni xihlayelamfuzri.

8   Xilesvo, ndzrinavela lesvaku, amimbangwini hinkwayu, loko vavanuna vahamba svikhongoto, vatlakuxa mavoko ya kubasa, na vange na mahlundzru kumbe kuphikisana.

9   Hi ndlela leyifanaka, na vone vavasati vafanela kutixongisa hi mpahla ya kutsrhamiseka, vakombisa lesvaku vatichava tingana nakone va ni miyanakanyu lemitizraka ha hombe; vangatixongisi hi malukela ya misisi, kumbe gole kumbe tindzralama, kumbe timpahla leta kudula kutlulisa mpimu,

10   kambe vatixongisa hi minchumu leyixongelaka vavasati lavatihlayaka lesvaku vachava Xikwembu Nkulukumba, minga mintizro leminene.

11   Wansati aadondzre na amiyelile hi kutibeka hansi hinkwaku.

12   Andzripfumeleli wansati lesvaku adondzrisa kumbe afuma wanuna, kambe aamiyele.

13   Hikusa kuzrangi kuhambiwa Adamu, kugama kulandzra Evha.

14   Nangweso, Adamu ahi yene angakanganyisiwa, kambe wansati hi yene angakanganyisiwa hi kuhelela agama atlula nawu.

15   Nambitanu, wansati atahuluxiwa hi kupsala vana; ntsena svojula lesvaku atsrhama alipfumelweni, ni le lizrandzrwini, ni le kuxwengeni, na a ni miyanakanyu lemitizraka ha hombe.