-
1 Petrosi 5
1 Mine, svanga mun’we wa vakulu ni mboni ya tinxanisa leti Kriste akumaniki natu, ni mun’we wa lavayaveliwiki kuphatima lokutakapfuleteliwa, ndzritsratsriya vakulu lavanga makazri kwenu, ndzriku:
2 Bzisani ntlhambi wa Xikwembu Nkulukumba lowunga makazri kwenu, n’wiwulavisela hi kusvizrandzra, kunge hi kusindzrisiwa; kunge hi kuzrandzra mali ya kukanganyisa, kambe hi kuzrandzra kutizra;
3 n’wingayenci ingiki n’wi tihosi ta vhanu va Xikwembu Nkulukumba lava angamitamelisa vone, kambe n’wiva svikombiso ku ntlhambi.
4 Kutani loko mubzisi lwenkulu atakombekisiwa, n’witayamukela ngiyana leyingabunikiki ya kuphatima.
5 Hi ndlela leyifanaka, n’wine vampsha, tibekani hansi ka vakulu va vhanu. Kambe hinkwenu yambalani kutitsrongahata amakazri kwenu, hikusa Xikwembu Nkulukumba alwa ni lavatikulisaka, kambe lavatitsrongahataka avakomba vumbilu.
6 Xilesvo, titsrongahatani hansi ka voko ledzra ntamu dzra Xikwembu Nkulukumba, akuva atan’witlakuxa hi nkama wa kone,
7 na n’wicukumetela ku yene hinkwasvu lesvin’wikazrataka, hikusa awazron’weka ha n’wine.
8 Tsrhamani na miyanakanyu mitlhazrihile, n’wivonelela! Nala wenu, Diyavulosi, afambafamba kufana ni ndzrawu leyibongaka, yijulaka wa kumuda.
9 Kambe simani n’wilwa naye, n’witiya n’wikunde alipfumelweni, na n’witiva lesvaku tinxanisa letifanaka tiyencekela hinkwavu vamakwenu amisaveni!
10 Kambe, antsrhaku ka loko n’wixanisekilenyana, Xikwembu Nkulukumba wa vumbilu, lwan’wivitaneliki kuphatimeni kwakwe lokungahelikiki na Kriste, yene hi ntshima atan’wiwupfisa hi matlhelo hinkwawu; atan’witiyisa, atan’winyika ntamu, an’wisimeka n’witiya amasungulwini.
11 Ku yene akuyisiwe ntamu hi la kungahelikiki! Amen.
12 Ndzrin’witsraleli papela ledzri hi mazritu matsrongo, hi voko dzra Silvhanu, lweyi, ku mine, anga makwezru lwadumbekaka, akuva ndzrin’wikuca ni kun’wibekela vumboni lebzitiyiki bza lesvaku lebzi hi bzone vumbilu bza Xikwembu Nkulukumba. Tsrhamani ku bzone.
13 Bandla ledzringa le Babilona, ledzringahlawuliwa na n’wine, dzran’widzrungula. Na yene n’wananga Marku awan’widzrungula.
14 Losananani hi kun’qutana ka lizrandzru. Kuzrula akuve na n’wine hinkwenu lavanga kun’we na Kriste!